សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពពី The Diplomat បានរាយការណ៍ថា ឥណ្ឌូណេស៊ី បានហាមឃាត់ Apple មិនឱ្យលក់ទូរស័ព្ទស៊េរីចុងក្រោយរបស់ខ្លួន iPhone 16 នៅក្នុងប្រទេស។
បច្ចុប្បន្ននេះ ស្ថានភាព ឥណ្ឌូណេស៊ី និង Apple កំពុងស្ថិតក្នុងភាពច្របូកច្របល់ពាក់ព័ន្ធនឹងការចូលទីផ្សារ និងការវិនិយោគ។ អាជ្ញាធរឥណ្ឌូនេស៊ីមិនអនុញ្ញាតឱ្យ Apple លក់ផលិតផលចុងក្រោយរបស់ខ្លួនគឺ iPhone 16 នៅក្នុងប្រទេស ដោយលើកមូលហេតុថា ពួកគេចង់ឱ្យ Apple វិនិយោគបន្ថែមទៀតនៅក្នុងផលិតកម្មក្នុងស្រុករបស់ឥណ្ឌូណេស៊ីជាថ្នូរនឹងការចូលទីផ្សារ។ បច្ចុប្បន្ននេះ Apple មិនមានកន្លែងផលិតណាមួយនៅក្នុងប្រទេសឥណ្ឌូនេស៊ីទេ ខណៈដែលទូរស័ព្ទ iPhone ២,៣ លានគ្រឿងត្រូវបានលក់ដោយអ្នកលក់រាយក្នុងស្រុកកាលពីឆ្នាំ២០២៣។ ទន្ទឹមនឹងនេះ ឥណ្ឌូនេស៊ី ចង់ឲ្យឧស្សាហកម្មបច្ចេកវិទ្យាខ្ពស់ទទួលការផលិតបន្ថែមទៀតដើម្បីជំរុញកំណើន។ ដូច្នោះហើយ ដោយមើលឃើញពីទំហំទីផ្សារក្នុងស្រុក រដ្ឋាភិបាលបានបង្កើនកិច្ចខិតខំប្រឹងប្រែងដើម្បីទទួលបានទិន្នផលកាន់តែច្រើន និងការផលិតបន្ថែមទៀតពី Apple ។
ជាលទ្ធផល ផែនការនេះទទួលបានផ្លែផ្កាបណ្តើរៗ ដោយពីដំបូង Apple បានយល់ព្រមវិនិយោគ ១០០ លានដុល្លារ ប៉ុន្តែក្រោយមកបានបង្កើនការវិនិយោគបន្ថែមដល់ទៅ ១ ពាន់លានដុល្លារ ដើម្បីសាងសង់រោងចក្រផលិតនៅ Batam ។ យ៉ាងណាមិញ iPhone 16 នៅតែត្រូវបានហាមឃាត់មិនឱ្យលក់នៅតាមហាងលក់រាយក្នុងឥណ្ឌូនេស៊ីកាលពីដើមខែមករា។ គេសង្ស័យថា រដ្ឋាភិបាលអាចទាមទារបន្ថែមទៀតដូចជាការវិនិយោគលើការស្រាវជ្រាវ និងការអភិវឌ្ឍន៍បន្ថែមពីលើសម្បទានដំបូងពី Apple។ ទន្ទឹមនឹងនេះ មនុស្សមួយចំនួនយល់ឃើញថា ប្រភេទគោលនយោបាយបែបនេះខ្វះភាពច្បាស់លាស់ ដែលជាហេតុផលចម្បងធ្វើឱ្យ Apple សម្រេចចិត្តមិនវិនិយោគនៅក្នុងប្រទេសឥណ្ឌូនេស៊ីអស់រយៈពេលជាច្រើនឆ្នាំ។
យ៉ាងណាមិញ គេមិនមានភាពភ្ញាក់ផ្អើលសម្រាប់រឿងមួយនេះទេ ដោយសារឥណ្ឌូណេស៊ីតែងតែប្រើវិធីសាស្ត្រនេះ ដើម្បីធានាលក្ខខណ្ឌនៃការវិនិយោគឲ្យប្រសើរជាងនេះ។ ក្នុងរយៈពេលប៉ុន្មានឆ្នាំថ្មីៗនេះ ឥណ្ឌូណេស៊ី ធ្លាប់ប្រើវិធីសាស្ត្រនេះរួមមាន៖ ការហាមឃាត់ TikTok, ការបិទកម្មវិធី Netflix, និងការបដិសេធមិននាំចេញរ៉ែនីកែល រហូតដល់ពួកគេទទួលបានការវិនិយោគលើលក្ខខណ្ឌដែលចាត់ទុកថាមានប្រយោជន៍ជាងសម្រាប់ផលប្រយោជន៍ជាតិ។ ជាលទ្ធផល ឥណ្ឌូណេស៊ីតែងតែទទួលបានផ្លែផ្កាពីការប្រើប្រាស់វិធីសាស្រ្តនេះ ដោយ TikTok បានកាន់កាប់កម្មវិធីរបស់ឥណ្ឌូណេស៊ី Tokopedia ដែលធ្វើឲ្យបុត្រសម្ព័ន្ធរបស់ខ្លួន GoTo រកប្រាក់ចំណេញបាន។ លើសពីនេះ ក្រុមហ៊ុន Netflix បានចាប់ផ្តើមវិនិយោគលើមាតិកាក្នុងស្រុករបស់ឥណ្ឌូណេស៊ីជាច្រើន។ នេះគឺជាការឆ្លុះបញ្ចាំងពីការផ្លាស់ប្តូរសេដ្ឋកិច្ចនយោបាយអន្តរជាតិ ដែលប្រទេសមានសេដ្ឋកិច្ចរីកចម្រើនយ៉ាងឆាប់រហ័សដូចជា ឥណ្ឌូនេស៊ីមានអារម្មណ៍ថាពួកគេមានអំណាចលើការចរចាច្រើនជាងពីមុន។ ប្រសិនបើប្រៀបធៀបទៅកាលពី ១០ ឆ្នាំមុន ឥណ្ឌូនេស៊ីប្រហែលមិនអាចមានប្រៀបលើក្រុមហ៊ុន Apple ដូចបច្ចុប្បន្ននេះទេ ដោយសារទីផ្សារក្នុងស្រុកសម្រាប់ទូរស័ព្ទ iPhone មានទំហំតូចកាលពីមុន ហើយការហាមឃាត់បែបនេះនឹងធ្វើឲ្យប្រទេសអនុវត្តពាណិជ្ជកម្មសេរី ក៏ដូចជាអង្គការពាណិជ្ជកម្មពិភពលោកដាក់សម្ពាធលើឥណ្ឌូណេស៊ី។
ដោយឡែក បច្ចុប្បន្ននេះ អ្វីៗគឺខុសស្រឡះ ទីមួយគឺប្រទេសជាច្រើនហាក់បីដូចជាមិនព្រួយបារម្ភអំពីការដាក់ទណ្ឌកម្មលើគោលនយោបាយពាណិជ្ជកម្មការពារនិយមទៀតទេ។ ចំណុចទីពីរ ឥណ្ឌូណេស៊ីមានអំណាចទិញច្រើនជាងមុន និងសេដ្ឋកិច្ចធំជាងកាលពីមួយទសវត្សរ៍មុន។ ចំណុចទីបី ប្រសិនបើ Apple នឹងមិនបំពេញតាមលក្ខខណ្ឌរបស់ពួកគេទេ ក្រុមហ៊ុនផ្សេងទៀតអាចនឹងចាប់យកឱកាសនេះ។ ជាក់ស្តែង ក្រុមហ៊ុនផលិតស្មាតហ្វូនចិន Oppo បានដំណើរការរោងចក្រនៅ West Java របស់ឥណ្ឌូណេស៊ីតាំងពីឆ្នាំ២០២២។ ថ្មីៗនេះ ក្រុមហ៊ុននេះគ្រោងនឹងពង្រីកផលិតកម្មក្នុងស្រុករបស់ឥណ្ឌូណេស៊ី។ លើសពីនេះ ក្រុមហ៊ុនផលិតស្មាតហ្វូនចិនមួយទៀតឈ្មោះ Honor នឹងចាប់ផ្តើមសាងសង់កន្លែងផលិតនៅក្នុងប្រទេសឥណ្ឌូនេស៊ីផងដែរ។ ពួកគេបានប្រកាសពីផែនការនេះ ខណៈដែលមានភាពតានតឹងរវាងរដ្ឋាភិបាលឥណ្ឌូនេស៊ី និង Apple កំពុងមានកំដៅ៕
Account
Security
Favourite Content