សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងគោលបំណងទាក់ទាញភ្ញៀវទេសចរជាតិ និងអន្តរជាតិ ទៅលេងកម្សាន្ត និងសម្រាកលំហែនៅតំបន់ឆ្នេរបានកាន់តែច្រើន រាជរដ្ឋាភិបាល បាន និងកំពុងរៀបចំអភិវឌ្ឍន៍ឆ្នេរខ្សាច់ចំនួនពីរបន្ថែមទៀត ដោយមួយស្ថិតនៅក្នុងខេត្តកែប និងមួយកន្លែងទៀតស្ថិតនៅក្នុងខេត្តព្រះសីហនុ ។
កាលពីចុងសប្ដាហ៍កន្លងទៅនេះ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ឯកឧត្តម សាយ សំអាល់ ក៏បានជួបសំណេះសំណាលជាមួយម្ចាស់ដីតាមបណ្ដោយឆ្នេរប្រវែង២៧០០ ម៉ែត្រនៅខេត្តកែប និងបានស្នើសុំឱ្យម្ចាស់ដីមានការឯកភាព ដើម្បីអនុវត្តការងារគម្រោងអភិវឌ្ឍន៍រមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់ ដែលត្រូវបានដាក់ឈ្មោះថា «ឆ្នេរតេជោសន្តិភាពកែប»។
ឯកឧត្តមឧបនាយករដ្ឋមន្ត្រី សាយ សំអាល់ បានបញ្ជាក់ថា ការងារអភិវឌ្ឍន៍គម្រោងរមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់នេះនឹងចាប់ផ្ដើមនៅក្នុងរដូវប្រាំងនេះ ដោយដំបូងនឹងត្រូវសាងសង់ទំនប់រលកជាមុនសិន និងរៀបចំប្រព័ន្ធលូបង្ហូរកខ្វក់នៅខាងក្រោម និងអាចចាក់ខ្សាច់ក្នុងពេលតែមួយដែលនេះគឺជាបន្ទុករបស់ម្ចាស់ដី ។
ឯកឧត្តមបានមានប្រសាសន៍ថា ៖
«ប្រសិនបើការងារទាំង៣ នេះអាចដំណើរការព្រមៗគ្នានោះគឺជាការល្អ ហើយការធ្វើគឺអាចមានជម្រើសដែលម្ចាស់ដីអាចធ្វើដោយខ្លួនឯង រឺក៏អាចមានការឯកភាពគ្នាធ្វើជាក្រុមនោះនឹងអាចចំណាយធូរស្រាលជាងនេះ និងមានប្រសិទ្ធភាពជាង។ ជំហានដែលត្រូវធ្វើបន្ទាប់ពីនេះគឺការដាំដើមឈើលម្អនៅពីមុខក្បាលដីនីមួយៗតាមបណ្ដោយឆ្នេរស្របតាមការជ្រើសរើសរបស់ម្ចាស់ដីក្នុងនោះមានប្រភេទដើមដូង ដើមកោងកាង ឬដើមស្ងាវ ពីព្រោះដើមឈើទាំងនេះគឺជាអត្តសញ្ញាណសម្រាប់បណ្ដាខេត្តនៅជាប់មាត់សមុទ្ររបស់ប្រទេសកម្ពុជា»។
ឯកឧត្តមបន្ថែមថា ទំនប់ទប់រលកក្នុងខេត្តកែបនេះត្រូវចាប់ផ្ដើមធ្វើពិធីក្រុងពាលីបើកការដ្ឋានសាងសង់តាមទំនៀមទម្លាប់ប្រពៃណីខ្មែរនាថ្ងៃទី ២២ ខែមករាឆ្នាំ ២០២៥ នេះ ដើម្បីបួងសួងសុំឱ្យការអនុវត្តគម្រោងនេះដំណើរការបានដោយរលូនសម្រាប់ជាឧត្តមប្រយោជន៍របស់ប្រជាពលរដ្ឋក្នុងខេត្តកែប កំពត និងខេត្តព្រះសីហនុផងដែរ ។
ទន្ទឹមនឹងការអភិវឌ្ឍឆ្នេរខ្សាច់កម្សាន្តសាធារណៈកម្រិតខ្ពស់នៅខេត្តកែបនេះ រាជរដ្ឋាភិបាល តាមរយៈគណៈកម្មាធិការគ្រប់គ្រង និងអភិវឌ្ឍន៍តំបន់ឆ្នេរ ក៏គ្រោងនឹងអភិវឌ្ឍន៍ឆ្នេរខ្សាច់កម្សាន្តមួយខ្សែទៀតនៅក្រុងព្រះសីហនុ ខេត្តព្រះសីហនុ គឺឆ្នេរព្រែកត្រែង ដែលជាឆ្នេរខ្សាច់សមុទ្រមានទឹកសមុទ្រថ្លាល្អ ស័ក្តិសមនឹងភ្ញៀវទេសចរជាតិ និងអន្តរជាតិមកសម្រាក និងកម្សាន្ត ជាពិសេសនៅរដូវវិស្សមកាលធំៗ សម្រាប់ភ្ញៀវទេសចរមកពីតំបន់អឺរ៉ុប ។
នៅក្នុងផែនការមេ អភិវឌ្ឍន៍ខេត្តព្រះសីហនុរបស់រាជរដ្ឋាភិបាល ក៏គ្រោងនឹងកែប្រែខេត្តព្រះសីហនុ ទៅជាមជ្ឈមណ្ឌលពាណិជ្ជកម្ម និងទេសចរណ៍ដ៏ពិសិដ្ឋលើពិភពលោក ហើយរំពឹងថានឹងទទួលបានការវិនិយោគពីវិនិយោគិនក្នុងនិងក្រៅប្រទេស ក៏ដូចជាទទួលបានភ្ញៀវទេសចរបរទេសជាច្រើនទៀតផងដែរ ។
បច្ចុប្បន្ននេះ ក្នុងខេត្តព្រះសីហនុ មានគម្រោងអភិវឌ្ឍន៍ធំៗមួយចំនួនគួរឱ្យកត់សម្គាល់ ដែលមានទឹកប្រាក់ខ្ទង់ពាន់លានដុល្លារអាមេរិក ក្នុងនោះមានគម្រោងអភិវឌ្ឍន៍រមណីយដ្ឋានឆ្នេរមាស ឆ្នេរប្រាក់ គ្រោងចំណាយប្រមាណ៥ពាន់លានដុល្លារអាមេរិក គម្រោងអភិវឌ្ឍន៍តំបន់វិស្សមកាល Bay Of Light ដែលគ្រោងចំណាយទឹកប្រាក់រហូតដល់១៦ពាន់លានដុល្លារអាមេរិក និងគម្រោងអភិវឌ្ឍន៍សណ្ឋាគារ មជ្ឈមណ្ឌលពាណិជ្ជកម្ម Peninsula Integrated ក្នុងក្រុងព្រះសីហនុ ដែលមានទឹកប្រាក់ជិត១ពាន់លានដុល្លារអាមេរិក ៕
Account
Security
Favourite Content