បរទេស ៖ បច្ចេកវិទ្យាឆ្លាតវ៉ៃ AI , បច្ចេកវិទ្យាស្វ័យប្រវត្តិ Automation និងព្រមទាំងបច្ចេកវិទ្យាទំនើបផ្សេងទៀតដូចជា Machine Learning និង Data Management ជាដើម កំពុងរីកចម្រើនយ៉ាងខ្លាំង ដើម្បីបម្រើ និងតម្រូវតាមសេចក្ដីត្រូវការរបស់មនុស្សជាតិនៅគ្រប់វិស័យ។ កត្តានេះហើយបានធ្វើឲ្យសកម្មភាពនៃការធ្វើរោងចក្រខ្នាតតូច ឬយើងហៅថា Microfactories អាចទាញយកអត្ថប្រយោជន៍បានយ៉ាងច្រើន និងអាចក្លាយទៅជាទំនោរថ្មីដែលមិនអាចមើលរំលងបានឡើយសម្រាប់ពិភពលោកនាពេលអនាគត។

តើអ្វីទៅជារោងចក្រខ្នាតតូច ឬ Microfactories ?

គំនិតនៃការបង្កើតរោងចក្រខ្នាតតូចនេះត្រូវបានចាប់ផ្តើមឡើងតាំងតែពីឆ្នាំ១៩៩០ មកម្ល៉េះ (REWO.IO) ដែលវាផ្តោតសំខាន់ទៅលើសកម្មភាពផលិតដូចគ្នា ប៉ុន្តែប្រើប្រាស់បច្ចេកវិទ្យាស្វ័យប្រវត្តិកម្មទំនើបបំផុត។ វាជារោងចក្រខ្នាតតូច ប៉ុន្តែអាចបញ្ចូលគ្នានូវសង្វាក់ផលិតកម្មទាំងស្រុងចាប់តាំងពីដំណើរការដំបូងទៅដល់ទីបញ្ចប់ដែលស្ថិតនៅនឹងកន្លែងតែមួយសម្រាប់ការផលិតចេញជាផលិតផល។

បច្ចុប្បន្ននេះ Microfactories កាន់តែមានប្រសិទ្ធភាព និងកាន់តែមានប្រជាប្រិយភាព ដោយក្នុងនោះអ្នកជំនាញជាច្រើនបានមើលឃើញថាអត្ថប្រយោជន៍ជាច្រើនរបស់អាជីវកម្មប្រភេទនេះ អាចធ្វើឲ្យ Microfactories កាន់តែពេញនិយមបំផុតសម្រាប់វិស័យផលិតកម្មនៅពេលខាងមុខ។

Microfactories អាចជួយសម្រួល និងគាំទ្រពិភពលោកបានយ៉ាងច្រើន ជាពិសេសទៅលើការធ្វើឲ្យនិរន្តភាពសម្រាប់បរិស្ថាន និងការជួយកាត់បន្ថយឧស្ម័នកាបូនឌីអុកស៊ីត។បច្ចេកវិទ្យា Microfactories អាចសន្សំសំចៃការប្រើប្រាស់ធនធានទឹកបានទៅដល់៩០ភាគរយធៀបទៅនឹងរោងចក្រធម្មតា អាចជួយកាត់បន្ថយការប្រើប្រាស់សារធាតុគិមីបានពាក់កណ្តាលនៃរោងចក្រធម្មតា និងសន្សំសំចៃថាមពលអគ្គិសនីដល់ទៅ៨០ភាគរយ។ មិនត្រឹមតែប៉ុណ្ណោះ ម៉ូឌែលរោងចក្រខ្នាតតូចទាំងនោះអាចផ្តល់នូវជម្រើសច្រើនប្រភេទនៃសង្វាក់ផលិតកម្ម កាត់បន្ថយពេលវេលា និងកាន់តែអស្ចារ្យជាងនេះទៅទៀត គឺជួយកាត់បន្ថយថ្លៃដើមផលិត និងវិនិយោគបានច្រើនមុខ។

ដោយឡែកការជួសជុល និងថែរក្សាក៏ត្រូវការចំណាយតិចតួច ងាយស្រួលដំណើរការឡើងវិញបានភ្លាមៗក្រោយពេលជួសជុល ពីព្រោះភាគច្រើននៃប្រតិបត្តិការខាងក្នុង គឺពឹងផ្អែកលើកម្មវិធីដំណើរការស្វ័យប្រវត្តិ ដែលមានភាពងាយស្រួលក្នុងការកំណត់ទីតាំងខូច និងវិធីសាស្ត្រដោះស្រាយមានច្រើនជម្រើស។ អ្វីដែលគួរឲ្យចាប់អារម្មណ៍បំផុតនោះគឺថារោងចក្រនខ្នាតតូចមានមុខងារកែប្រែជម្រើសនៃផលិតផលទៅតាមអ្វីដែលអតិថិជនចង់បាន ងាយស្រួលជាងរោងចក្រខ្នាតធំ ពីព្រោះថាវាទាមទារនូវការកែប្រែមុខងារតិចតួច ហើយលឿនទៅតាមអ្វីដែលអតិថិជនចង់ផ្លាស់ប្តូរភ្លាមៗ។ ជាឧទាហរណ៍កន្លងមក រោងចក្រនខ្នាតតូច (Microfactories) ដែលជាគំរូម៉ូឌែលល្បីៗលើពិភពលោកកំពុងដំណើរការបានយ៉ាងល្អ និងជោគជ័យ ដែលក្នុងនោះមានដូចជា រោងចក្រ Arrival របស់ចក្រភពអង់គ្លេស ដែលជាអ្នកជំនាញផលិតយានយន្តក្នុងស្រុក។

សម្រាប់អ្នកវិនិយោគ ឬអ្នកចង់រកស៊ីខាងផ្នែកវិស័យផលិតកម្មខ្នាតតូចបែបនេះ ពួកគេនឹងធ្វើការចំណាយទៅលើការវិនិយោគសាងសង់តិចតួចបំផុត ឬប្រមាណជា៥ភាគរយប៉ុណ្ណោះនៃការវិនិយោគសាងសង់រោងចក្របែបប្រពៃណី ឬគិតជាប្រាក់ប្រហែលជា៥០លានដុល្លារប៉ុណ្ណោះក្នុងការបង្កើតរោងចក្រមួយដែលមានឧបករណ៍ជាកញ្ចប់។