បច្ចេកទេសបញ្ជូនថាមពលអគ្គិសនីដោយប្រើប្រាស់ខ្សែភ្លើងបានជួយឲ្យជីវិតលើភពផែនដីមានភាពងាយស្រួលអស់រយៈពេលជាច្រើនសតវត្សរ៍មកហើយ ហើយរហូតមកដល់ពេលនេះមានទាំងបច្ចេកវិទ្យា Bluetooth អាចសាកថ្មដោយឥតខ្សែ ដែលកាន់តែធ្វើឲ្យមានភាពងាយស្រួលហួសពីការស្មាន។

ទោះបីជាយ៉ាងណាក្តី របៀបនៃការបញ្ជូន ឬផ្ទេរថាមពលចំងាយឆ្ងាយដោយឥតខ្សែបានស្ថិតនៅក្នុងក្តីស្រម៉ៃរបស់ក្រុមអ្នកវិទ្យាសាស្ត្រអស់រយៈពេលជាច្រើនឆ្នាំមកហើយ ដោយពួកគេសង្ឃឹមថាបច្ចេកវិទ្យាបែបនេះនឹងអាចត្រួសត្រាយពិភពលោកឲ្យកាន់តែមានប្រសិទ្ធភាពបន្ថែមទៀត ខណៈដែលបច្ចុប្បន្នវិស័យផលិតកម្មផង ធ្វើដំណើរគ្រប់ប្រភេទផងកំពុងងាកទៅរកថាមពលអគ្គិសនីរួចទៅហើយ រួមទាំងកង់ ម៉ូតូ រថយន្ត រថក្រោះ នាវា និងរហូតទៅដល់យន្តហោះទៀតផង។

បច្ចុប្បន្ននេះ ក្តីសុបិននេះហាក់ដូចជានៅមិនឆ្ងាយទៀតឡើយ ដោយសារតែ DARPA ឬ the Defense Advanced Research Projects Agency ដែលជាទីភ្នាក់ងារសិក្សាវិទ្យាសាស្ត្រនិងបច្ចេកវិទ្យានវានុវត្តរបស់រដ្ឋាភិបាលអាមេរិកទើបតែបានប្រកាសថា កាលពីពេលថ្មីនេះខ្លួនបានអភិវឌ្ឍនូវបច្ចេកវិទ្យាថ្មីដែលអាចបញ្ជុនថាមពលក្នុងរយៈចំងាយឆ្ងាយរហូតដល់ទៅរាប់ពាន់គីឡូម៉ាល (១ម៉ាលស្មើនឹង១,៦គីឡូម៉ែត្រ)។

បច្ចេកវិទ្យាបញ្ជូនថាមពលដ៏អស្ចារ្យ និងមិនត្រូវការប្រើប្រាស់ខ្សែនេះត្រូវបានហៅឈ្មោះថា POWER ដែលបានមកពីពាក្យ The Persistent Optical Wireless Energy Relay និងជំនួសមកវិញនូវការប្រើប្រាស់កាំរស្មីឡាស៊ែរជំនួសវិញ។

អត្ថប្រយោជន៍របស់ POWER ត្រូវបានគេមើលឃើញថាអាចផ្តល់ឲ្យទាំងសម្រាប់វិស័យបម្រើការឲ្យស៊ីវិល និងទាំងវិស័យយោធាផងដែរ។ សម្រាប់រដ្ឋាភិបាលអាមេរិក​ បច្ចេកវិទ្យានេះមានន័យថាសព្វាវុធរបស់អាមេរិកដែលរួមមានទាំងយន្តហោះចម្បាំងរហូតទៅដល់នាវាចម្បាំងនាពេលអនាគត នឹងមិនចាំបាច់សុំចត ឬត្រឡប់មកស្ថានីយវិញដើម្បីបំពេញថាមពលទៀតឡើយ ហើយវានឹងធ្វើឲ្យប្រតិបត្តិការយោធារបស់ខ្លួនអាចធ្វើទៅបានយូរជាងមុននិងកាន់តែឆ្ងាយជាងមុនថែមទៀតផង។

ដោយឡែកសម្រាប់វិស័យសាធារណៈវិញ POWER នឹងជួយគាំទ្រដល់ការទាញយកថាមពលសូឡា ឬថាមពលទាញយកពីខ្យល់ ដែលស្ថិតនៅចំងាយឆ្ងាយពីតំបន់រស់នៅរបស់ពលរដ្ឋ។

ទោះបីជាយ៉ាងណាក្តី បច្ចេកវិទ្យាបញ្ជូនថាមពល POWER កំពុងស្ថិតនៅក្នុងដំណាក់កាលទី១នៅឡើយដែលវានៅទាមទារឲ្យមានការឌីសាញ និងគូសប្លង់ពីប្រព័ន្ធរៀបចំផលិតឧបករណ៍ដែលដើរតួសម្រាប់ទទួលថាមពលឲ្យបានត្រឹមត្រូវ និងច្បាស់លាស់ជាងនេះបន្ថែមទៀត ខណៈដែលបច្ចុប្បន្នសមត្ថភាពរបស់វាអាចបញ្ជូលថាមពលកម្លាំងដល់ទៅ១០គីឡូវ៉ាត់ ឬស្មើនឹងការប្រើប្រាស់របស់ផ្ទះមួយមាន៥បន្ទប់ទៅកាន់យន្តហោះចម្បាំងដែលមានចំងាយនៅប្រមាណជា១២៥ម៉ាលដោយមានប្រសិទ្ធភាពបំផុត។

វានឹងមិនមានបញ្ហាលំបាកទៀតឡើយដែលត្រូវរៀបចំស្ថានីយស្តុកថាមពល ឬបញ្ជូនពីកន្លែងមួយទៅកន្លែងមួយទៀត ឬមានន័យថា វានឹងអាចបញ្ចូនទៅកាន់ពលរដ្ឋដោយផ្ទាល់តាមរយៈលំនៅដ្ឋានរបស់ពួកគេរៀងៗខ្លួនតែម្តង។