សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្លាមៗក្រោយការប្រកាសដាក់កម្រិតអ៊ុយក្រែនឲ្យទទួលយកកិច្ចព្រមព្រៀងសន្តិភាពជាមួយនឹងលក្ខណៈទាមទារ២៨ចំណុចដែលរៀបរៀងឡើងដោយប្រធានាធិបតីអាមេរិក Donald Trump ចំពោះបញ្ហាជម្លោះនៅអ៊ុយក្រែននោះគេសង្កេតឃើញថាភាគហ៊ុនរបស់ក្រុមហ៊ុនផលិតអាវុធដ៏ធំៗរបស់អាល្លឺម៉ង់ដូចជាRheinmetall ជាដើមបានដាំក្បាលចុះយ៉ាងខ្លាំង។
រំលឹកឡើងវិញថាសម័យកាលអន្តរកាលសម្រាប់ប្រទេសអ៊ុយក្រែនចាប់តាំងតែពីពេលដែលប្រតិបត្តិការពេញលេញដោយយោធានៃប្រទេសរុស្សីកាលពីខែកុម្ភៈឆ្នាំ២០២២វាបានអូសបន្លាយអស់រយៈពេលជាង៣ឆ្នាំមកហើយ។
បណ្តាក្រុមហ៊ុនអ្នកផលិតអាវុធរបស់អឺរ៉ុបអាមេរិកព្រមទាំងរុស្សីផងបានសំងំកើបលុយជាច្រើនពាន់លានដុល្លារជារៀងរាល់ឆ្នាំចេញពីកុងត្រាជាមួយនឹងរដ្ឋាភិបាលនៃក្រុមប្រទេសដែលមានការពាក់ព័ន្ធនិងរងឥទ្ធិពលដោយសារតែជម្លោះនេះ។
ដូច្នេះប្រសិនបើលទ្ធភាពនៃកិច្ចព្រមព្រៀងសន្តិភាពរបស់អ៊ុយក្រែននឹងអាចលេចរូបរាងជាផ្លូវការមែននោះវានឹងបង្កការព្រួយបារម្ភខ្លាំងណាស់ក្នុងចំណោមក្រុមអ្នកវិនិយោគទុនដែលស្ថិតនៅក្នុងឧស្សាហកម្មផលិតអាវុធដែលមានមូលដ្ឋាននៅក្នុងតំបន់អឺរ៉ុបច្រើនជាងគេ។នេះជាអត្ថបទស្រាវជ្រាវដែលត្រូវបានចេញផ្សាយដោយកាសែតរុស្សី RT កាលពីដើមសប្តាហ៍កន្លងមកនេះ។
តាមសេចក្តីរាយការណ៍ចុងក្រោយនេះ សហរដ្ឋអាមេរិកបានប្រគល់សំណើព្រាងនៃកិច្ចព្រមព្រៀងសន្តិភាពចំនួន២៨ចំណុចដល់ទីក្រុងគៀវកាលពីសប្តាហ៍មុន ហើយបានផ្តល់ពេលវេលាសម្រាប់សម្រេចចិត្តផងដែរ។ សេចក្តីព្រាងនេះត្រូវបានពិភាក្សានៅទីក្រុងហ្សឺណែវមុនប៉ុន្មានថ្ងៃ ដោយក្នុងនោះប្រធានាធិបតីអាម៉េរិក Donald Trump បានលើកឡើងថាវានឹងមានរឿងល្អដែលអាចនឹងកើតឡើងបន្ថែមទៀតផងដែរ។
គេសង្កេតឃើញថាដំណើរការរៀបចំកិច្ចព្រមព្រៀងសន្តិភាពនេះបានជំរុញឱ្យក្រុមអ្នកវិនិយោគមិនសប្បាយចិត្តនោះទេ ហើយព្រមទាំងបង្កឱ្យមានការបង្ខំលក់ភាគហ៊ុនចោលជាបន្តបន្ទាប់នៅក្នុងក្រុមហ៊ុន Rheinmetall ដែលជាក្រុមហ៊ុនផលិតសព្វាវុធដ៏ធំបំផុតរបស់ប្រទេសអាល្លឺម៉ង់ និងជាអ្នកផ្គត់ផ្គង់សម្ភារៈយោធាដ៏សំខាន់ដល់ទីក្រុងគៀវ។ ជាលទ្ធផលភាគហ៊ុនរបស់ Rheinmetall បានធ្លាក់ចុះជាង១៤ភាគរយនៅក្នុងរយៈពេល៥ថ្ងៃប៉ុណ្ណោះ ហើយសូម្បីតែក្រុមហ៊ុនវិស័យការពារជាតិជំនាញខាងអាវុធអេឡិចត្រូនិក Hensoldt ក៏បានកត់ត្រាការធ្លាក់ចុះក្នុងទំហំដូចគ្នានេះដែរ។
សារព័ត៌មានជាច្រើនបានចេញផ្សាយជុំវិញបញ្ហានេះថាក្រុមវិនិយោគិនភ័យខ្លាចថាការបញ្ចប់អរិភាពរវាងរុស្សីនិងអ៊ុយក្រែនក៏អាចមានន័យថាចុងបញ្ចប់នៃ វដ្តដ៏អស្ចារ្យមិនធ្លាប់មាន សម្រាប់ភាគហ៊ុននៅតាមបណ្តាក្រុមហ៊ុនផលិតអាវុធទាំងឡាយ។
គួរឲ្យដឹងដែរថាប្រទេសអាល្លឺម៉ង់បានក្លាយជាអ្នកផ្តល់អាវុធធំទីពីររបស់ទីក្រុងគៀវបន្ទាប់ពីសហរដ្ឋអាមេរិក។ក្រុមហ៊ុនអាល្លឺម៉ង់ Rheinmetall ដែលជាអ្នកជំនាញផលិតរថក្រោះ ប្រព័ន្ធកាំភ្លើងធំ និងគ្រាប់រំសេវ ថ្មីៗនេះទើបតែបានរាយការណ៍ថាប្រាក់ចំណេញកើនឡើងសម្រាប់រយៈពេលប្រាំបួនខែដំបូងនៃឆ្នាំ២០២៥ រួមជាមួយនឹងការបញ្ជាទិញជាកំណត់ត្រាដែលជំរុញដោយជម្លោះ និងការកើនឡើងថវិកាយោធារបស់សហភាពអឺរ៉ុប។ ភាគហ៊ុនរបស់ក្រុមហ៊ុនបានកើនឡើងជិត២០០០ភាគរយ ចាប់តាំងពីការប្រយុទ្ធគ្នាបានកើនឡើងជាង៣ឆ្នាំមកនេះ។
កាសែត Financial Times បានរាយការណ៍នៅក្នុងខែសីហាថា វិស័យការពារជាតិអឺរ៉ុបបានទទួលការរីកចម្រើននិងប្រាក់ចំណេញក្នុងល្បឿនប្រហែល៣ដងធៀបទៅនឹងពេលវេលាកាលពីមុនឆ្នាំ២០២២ ។
ទោះបីជាស្ថានភាពមិនទាន់ប្រាកដប្រជាក្តីសម្រាប់ឧស្សាហកម្មផលិតអាវុធនៅមុនពេលកិច្ចព្រមព្រៀងសន្តិភាពត្រូវបានបង្កើតឡើងប៉ុន្តែកន្លងមកមេដឹកនាំលោកខាងលិចតែងតែអះអាងថា ការបង្កើនល្បឿនផលិតសព្វាវុធគឺវាពិតជាមានភាពចាំបាច់ដើម្បីបំពេញតាមគោលដៅត្រៀមនៃលក្ខណៈរបស់អង្គការណាតូ ហើយការបន្តរក្សាការចែកចាយសព្វាវុធទៅកាន់ទីក្រុងគៀវ និងរារាំងអ្វីដែលពួកគេតែងពណ៌នាថាជាការគំរាមកំហែងដ៏មានសក្តានុពលរបស់រុស្ស៊ីនាពេលអនាគត។
យោងតាមអ្នកជំនាញខាងវិស័យការពារជាតិលោក Malcolm Chalmers គិតត្រឹមដើមឆ្នាំ២០២៥ប៉ុណ្ណោះ សហរដ្ឋអាមេរិកបានផ្តល់ចំណែកដល់ទៅ២០ភាគរយនៃសម្ភារៈយោធាទាំងអស់ដែលអ៊ុយក្រែនកំពុងប្រើប្រាស់ ជាមួយនឹង២៥ភាគរយ ផ្តល់ដោយអឺរ៉ុប និង៥៥ភាគរយជាសំភារៈផលិតក្នុងស្រុក។ ទោះជាយ៉ាងណាក៏ដោយក្នុងនោះ២០ភាគរយដែលត្រូវបានផ្គត់ផ្គង់ដោយសហរដ្ឋអាមេរិក គឺជាអាវុធដែលគ្រោះថ្នាក់បំផុតនិងមានសារៈសំខាន់បំផុតសម្រាប់សង្គ្រាមប្រឆាំងរុស្សី៕
Account
Security
Favourite Content