បរទេស ៖ ថ្មីៗនេះ អាមេរិកបានប្រកាសព័ត៌មានអំពីការសម្រេចចិត្តជ្រើសយករូបរាងដែលរចនាសម្រាប់ប្រព័ន្ធការពារដែនអាកាសថ្មី ដើរដោយបច្ចេកវិទ្យាកាន់តែទំនើបអស្ចារ្យមួយដែលមានឈ្មោះថា Golden Dome ។ កម្មវិធីអាវុធដ៏ថ្មីស្រឡាងនេះត្រូវបានគេដឹងដែរថា វានឹងក្លាយជាបន្ទុកចំណាយរបស់រដ្ឋាភិបាលក្រុងវ់ាស៊ិនតោនប្រមាណជា១៧៥ពាន់លានដុល្លារ ហើយវាបានចាប់ផ្តើមអនុវត្តការអភិវឌ្ឍនិងស្រាវជ្រាវដំបូងតាមបញ្ជារបស់លោក Donald Trump តាំងតែពីខែមករា ឆ្នាំ២០២៥នេះមកម្ល៉េះ។

តើអ្វីទៅជាប្រព័ន្ធការពារអាកាស Golden Dome ហើយវាទំនើបខុសពីប្រព័ន្ធការពារផ្សេងទៀតបែបណា ?

អ្វីដែលគួរឱ្យចាប់អារម្មណ៍ជាងគេបំផុត និងដំបូងបំផុតអំពីបច្ចេកវិទ្យាថ្មីនេះគឺ Golden Dome មានលក្ខណៈខុសប្លែកខ្លាំងពីបច្ចេកវិទ្យាការពារនាពេលបច្ចុប្បន្ន ដោយក្នុងនោះ Golden Dome គឺជាបណ្តាញការពារដែលកើតចេញពីការបញ្ចូលគ្នាដោយផ្កាយរណបយ៉ាងច្រើន ពោលគឺរហូតទៅដល់រាប់រយគ្រឿងនៅក្នុងលំហអាកាសដែលអាចមានសមត្ថភាពធ្វើការងាររួមគ្នាដើម្បីតាមដាន និងទប់ស្កាត់ប្រឆាំងទៅនឹងគ្រប់ប្រភេទមីស៊ីលទាំងអស់របស់សត្រូវ។

មេបញ្ចាការទ័ពសម្រាប់ទីអាវកាស U.S. Space Force លោក Michael Guetlein ត្រូវបានតែងតាំងដោយផ្ទាល់ពីសំណាក់លោក Trump ដើម្បីគ្រប់គ្រងទៅលើកម្មវិធី Golden Dome និងការអនុវត្តផែនការទាំងឡាយក្រោមបញ្ជាផ្ទាល់ពីប្រធានាធិបតីអាមេរិករូបនេះផងដែរ។ បើមិនមានអ្វីប្រែប្រួលទេនោះ ប្រព័ន្ធការពារដែនអាកាសដែលមានតម្លៃ១៧៥ពាន់លានដុល្លារនេះនឹងអាចចាប់ផ្តើមប្រតិបត្តិការនៅចុងអាណត្តិរបស់លោក Trump នាខែមករា ឆ្នាំ២០២៩ ប៉ុន្តែយ៉ាងណាក្តីក្រុមអ្នកជំនាញនៅក្នុងឧស្សាហកម្មជាច្រើនបានបង្ហាញភាពមិនជឿជាក់ថាវានឹងអាចកើតឡើងតាមផែនការ និងតម្លៃដែលគ្រោងចំណាយនោះទេ។

អ្នកជំនាញនៃវិទ្យាស្ថានសម្រាប់ការងារយុទ្ធសាស្ត្រ និងការសិក្សាអន្តរជាតិ លោក Tom Karako បានលើកឡើងថា ពេលវេលានៃការអភិវឌ្ឍ Golden Dome នឹងអាចលើសពី១០ឆ្នាំ ឬទៅដល់២០ឆ្នាំ ហើយទំហំនៃការចំណាយនឹងអាចកើនឡើងទៅដល់ ៨៣១ពាន់លានដុល្លារដោយក្នុងនោះបច្ចេកវិទ្យា និងជំនាញនៃក្រុមអ្នកជំនាញអាវុធនៅ Silicon Valley នឹងអាចមានសមត្ថភាពក្នុងការគ្រប់គ្រងការផលិតព្រមទាំងការបូកបញ្ចូលប្រព័ន្ធបច្ចេកវិទ្យាមីស៊ីលដែលមានស្រាប់មួយចំនួនផងដែរ។

យ៉ាងណាក្តី មកទល់ពេលនេះ ប្រភពមូលនិធីសម្រាប់កម្មវិធីផលិត Golden Dome នៅមិនទាន់មានភាពច្បាស់លាស់នៅឡើយទេ ប៉ុន្តែសមាជិកសភាមកពីបក្សសាធារណជាច្រើនបានអះអាងថា ទុនវិនិយោគដំបូងសម្រាប់កិច្ចការងារនេះមានចំនួនប្រមាណជា ២៥ពាន់លានដុល្លាររួចទៅហើយ ខណៈដែលចំណែកជាច្រើនទៀតនឹងត្រូវប្រឈមុខឧបសគ្គជាច្រើនដំណាក់កាលនៅក្នុងការប្រជុំកំពូលរបស់សភាជាតិ។

រំលឹកដែរថា កាលពីអតីតកាលប្រធានាធិបតីអាមេរិក លោក Ronald Reagan អំឡុងសម័យទសវត្សរ៍ឆ្នាំ៨០ ក៏ធ្លាប់មានផែនការក្នុងការរៀបចំប្រព័ន្ធអាវុធបែបនេះដែរ ប៉ុន្តែបច្ចេកវិទ្យារបស់អាមេរិក និងពិភពលោកកាលពីគ្រានោះនៅមិនទាន់អាចសម្រេចបាននូវប្រភេទដែលអាចប្រើប្រាស់ផ្កាយរណបទៅជាឧបករណ៍ការពារមីស៊ីលជំនួសឲ្យប្រព័ន្ធការពារដែលបាញ់ចេញពីផ្ទាល់ដី ឬអាកាសនៅឡើយនោះទេ៕