តុលាការ​ព្រហ្មទណ្ឌ​អន្តរជាតិ (International Criminal Court) ត្រូវបានបង្កើតឡើងកាលពី​ថ្ងៃទី​១ ខែកក្កដា ឆ្នាំ​១៩៩៨ នៅក្នុង​ក្រុង​រ៉ូមប្រទេសអ៊ីតាលី ប៉ុន្តែ​លិខិត​បទ​ដ្ឋាន​អន្តរជាតិរបស់ ICC មិនបាន​ចូល​ជា​ធរមានភ្លាមៗឡើយរហូតដល់​ឆ្នាំ២០០២​។ យ៉ាងណាក៏ដោយ ថ្វីត្បិតតែត្រូវបានចាត់ទុកថាជាប្រព័ន្ធតុលាការអន្តរជាតិដ៏ធំបំផុតមួយរបស់ពិភពលោកក្តី ប៉ុន្តែ ICC ក៏ទទួលរងនូវការរិះគន់ជាច្រើននៅឡើយពាក់ព័ន្ធទៅនឹងបញ្ហាកង្វះខាតកិច្ចការងារសំខាន់ៗជាច្រើនបូករួមកង្វះខាតធនធានគ្រប់គ្រាន់ ជាពិសេសបញ្ហាកង្វះខាតសមាសភាពចូលរួមផងដែរពីសំណាក់មហាអំណាចធំៗមួយចំនួន។

គិតត្រឹមឆ្នាំ២០១៩ សមាជិកនៃតុលាការ ICC មានសរុបដល់ទៅ១២៣ប្រទេស ប៉ុន្តែបែរជាមិនមានវត្តមានរបស់ប្រទេសដែលមានឥទ្ធិពលខ្លាំងៗចូលរួមទៅវិញដែលក្នុងនោះមានប្រមាណជា៦ប្រទេសដែលស្ថិតនៅខាងក្រៅបញ្ជីសមាជិកដូចជា ស៊ូដង់, អ៊ីស្រាអ៊ែល, ឥណ្ឌូនេស៊ី, ឥណ្ឌា, រុស្ស៊ី, ចិន ជាពិសេសអាមេរិក ហើយបន្ថែមលើសពីនេះកាលពីឆ្នាំ២០២១កន្លងទៅនេះ ហ្វីលីពីនក៏បានប្រកាសដកខ្លួនចេញពីបញ្ជីសមាជិក ICC ដែរ។ អ្វីដែលគួរឲ្យចាប់អារម្មណ៍បំផុតចំពោះសមាសភាពរបស់សហរដ្ឋអាមេរិកដែលចាប់តាំងតែការកើតឡើងនៃគំនិតផ្តួចផ្តើមអាមេរិកគឺត្រូវបានរាប់បញ្ចូលជាសហស្ថាបនិកមួយដែររបស់ ICC ។ គោលនយោបាយការបរទេសរបស់សហរដ្ឋអាមេរិកជាមួយនឹងនឹងតុលាការអន្តរជាតិ ICC មានការប្រែប្រួល និងបត់បែនជាប់ជានិច្ចពីអាណត្តិមួយទៅអាណត្តិមួយ។

រំលឹកឡើងវិញ រដ្ឋបាលអតីតប្រធានាធិបតីលោក Bill Clinton ដែលជាអ្នកចូលរួមជួយរៀបចំកិច្ចចរចាដើម្បីបង្កើត ICC និងក៏ជាអ្នកបានចុះហត្ថលេខាលើលក្ខន្តិកៈទីក្រុងរ៉ូមក្នុងឆ្នាំ២០០០ផងដែរ ប៉ុន្តែមិនបានបញ្ជូនវាសម្រាប់ការផ្តល់សច្ចាប័នពីព្រឹទ្ធសភានោះទេ។ ក្រោយមក រដ្ឋបាលរបស់អតីតប្រធានាធិបតីលោក George W. Bush ដែលជារដ្ឋបាលរបស់សហរដ្ឋអាមេរិកនៅពេលបង្កើត ICC បាននិយាយថា ខ្លួននឹងមិនចូលរួមជាមួយ ICC ទៅវិញ និងបន្ទាប់មកនៅក្នុងអំឡុងពេលនៃរដ្ឋបាលរបស់លោក​អតីតប្រធានាធិបតី Barak Obama សហរដ្ឋអាមេរិក​បានចាប់ផ្តើម​បង្កើត​ទំនាក់ទំនង​ការងារ​ជាមួយ​តុលាការ​ជា​បន្តបន្ទាប់​ឡើងវិញ ប៉ុន្តែនៅក្នុង​នាម​ជា​អ្នក​សង្កេតការណ៍ប៉ុណ្ណោះ។

មានការចេញផ្សាយកាលពីគ្រាកន្លងមកជាច្រើន ដូចជានៅ Wikipedia, Nomad Capitalist និង Reuter ជាដើមបានផ្សព្វផ្សាយអំពីមូលហេតុដែលនាំឲ្យមានការសម្រេចចិត្តដោយរដ្ឋាភិបាលក្រុងវ៉ាស៊ិនតោនក្នុងការមិនចូលរួមជាសមាជិករបស់តុលាការអន្តរជាតិ ICC​ នោះក៏ដោយសារតែមានការព្រួយបារម្ភថារដ្ឋាភិបាលរបស់ខ្លួនព្រមទាំងបុគ្គលមួយចំនួនទៀតអាចនឹងប្រឈមមុខទៅនឹងទោសទណ្ឌនៃបទឧក្រិដ្ឋកម្មសង្គ្រាមប្រឆាំងនឹងមនុស្សជាតិតាមរយៈសង្គ្រាមជាច្រើនដែលមានអាមេរិកជាអ្នកគាំទ្រពីក្រោយក្នុងនោះដូចជាសង្គ្រាមនៅអាហា្គនីស្ថានជាដើម។

គួរឲ្យដឹងដែរថា តុលាការ ICC មានសិទ្ធិអំណាចក្នុងការកាត់ទោសទៅលើបទល្មើស​ព្រហ្មទណ្ឌ​អន្តរជាតិ​ចំនួន​៤ប្រភេទដែលកន្លងមកត្រូវបាន​អនុម័តដែលក្នុងនោះ​មានដូចជា​បទឧក្រិដ្ឋប្រល័យពូជសាសន៍​(genocide) បទឧក្រិដ្ឋ​ប្រឆាំង​មនុស្សជាតិ​(crime against humanity) បទឧក្រិដ្ឋ​សង្គ្រាម​(war crime) និង​បទឧក្រិដ្ឋ​ឈ្លានពាន (crime of aggression)​៕