នៅទីបំផុត ក្រោយការរង់ចាំ និងខិតខំអំពាវនាវអស់រយៈពេលជាច្រើនខែមកហើយនោះ បណ្តាប្រទេសលោកខាងលិចដែលមានរួមទាំងអាមេរិក, អង់គ្លេស, អាល្លឺម៉ង់ និងប៉ូឡូញផងដែរ បានសម្រេចចិត្តបន្តបន្ទាប់គ្នាក្នុងការផ្គត់ផ្គង់រថក្រោះប្រយុទ្ធជួរមុខទំនើបៗ និងដ៏មានតម្លៃខ្លួនរបស់​ខ្លួនទៅឲ្យកងកម្លាំងយោធានៃប្រទេសអ៊ុយក្រែនហើយ។

អង់គ្លេស ជាប្រទេសដំបូងគេប្រកាសផ្គត់ផ្គង់រថក្រោះប្រភេទ  Challenger 2 ចំនួន១៤គ្រឿង និងបន្តបន្ទាប់ដោយអាមេរិកសន្យាផ្តល់រថក្រោះជួរមុខ M1 Abram ចំនួន៣១គ្រឿងអាល្លឺម៉ង់សម្រេចផ្តល់រថក្រោះ Leopard  ចំនួន១៤គ្រឿង ហើយប៉ូឡូញក្រោយទទួលបានភ្លើងខៀវពីអាល្លឺម៉ងហើយនោះក៏បានសន្យាផ្តល់រថក្រោះប្រភេទ Leopard នេះចំនួន១៤គ្រឿងដូចគ្នាផងដែរ។

សង្គ្រាមនៅអ៊ុយក្រែនឈានចូលមកដល់ការប្រើប្រាស់សព្វាវុធកាន់តែទំនើប ខណៈដែលមានប្រភពលេចដំណឹងបន្ថែមទៀតថាបណ្តាប្រទេសលោកខាងលិចក៏កំពុងពិចារណាទៅលើការផ្គត់ផ្គង់កាន់តែគ្រោះថ្នាក់ថែមទៀត សូម្បីតែយន្តហោះចម្បាំងផងឲ្យទៅឲ្យអ៊ុយក្រែន។

តើរថក្រោះទាំងនោះមានបច្ចេកវិទ្យាទំនើបយ៉ាងណា និងតម្លៃថ្លៃកម្រិតណា?

Leopard ជារថក្រោះផលិតនៅអាល្លឺម៉ង់មានទំងន់៥៥តោនមានសមត្ថភាពទាំងប្រយុទ្ធផង និងការពារផងហើយអាចសម្របខ្លួនទៅនឹងគ្រប់ប្រភេទសមរភូមិបានយ៉ាងងាយស្រួល។រថក្រោះប្រភេទនេះអាចមានតម្លៃប្រហែលជា៥លានផោនក្នុងមួយគ្រឿងនិងអាចផ្ទុកអ្នកបើកបរបាន៤នាក់អាចធ្វើដំណើរបានទៅដល់៣៤២ម៉ាលជាមួយនឹងល្បឿន៤៥ម៉ាលក្នុងមួយម៉ោង ឬប្រមាណជា៦៨គីឡូម៉ែត្រក្នុងមួយម៉ោង។

អ្នកវិភាគជាច្រើនមើលឃើញថា Leopard ងាយស្រួលប្រតិបត្តិការជាងរថក្រោះជួរមុខរបស់អាមេរិក M1 Abram ដោយសារតែវាប្រើប្រាស់ថាមពលប្រេងម៉ាស៊ូតមិនដូចជារថក្រោះអាមេរិកប្រើប្រាស់សាំងនោះទេ។

M1 Abram រថក្រោះផលិតនៅអាមេរិកមានតម្លៃប្រមាណជា៥លានផោនដូចគ្នាទៅនឹង Leopard ដែរ។ក្រៅតែពីអាចបាញ់កាំភ្លើងធំរបស់ខ្លួនបានចំងាយ៤គីឡូម៉ែត្រហើយនោះរថក្រោះប្រវែង២៦ហ្វីតនេះក៏មានបំពាក់មកជាមួយនឹងកាំភ្លើងយន្តចំនួន២ប្រភេទដែលក្នុងមានប្រភេទ7.62 machine guns ចំនួន២ដើម និងកាំភ្លើងយន្តប្រភេទ 12.7mm ចំនួន១ដើមផ្សេងទៀតផង។

រថក្រោះអាមេរិកនេះមានទំងន់ដល់ទៅ៧១តោនហើយផលិតឡើងដំបូងតាំងតែពីឆ្នាំ១៩៩០អាចធ្វើដំណើរបានចំងាយបានទៅដល់២៦៥ម៉ាលជាមួយនឹងល្បឿនធ្វើដំណើរទៅដល់៤២ម៉ាយក្នុងមួយម៉ោង។

Challenger 2 ជាផលិតរបស់ប្រទេសអង់គ្លេសដែលរដ្ឋាភិបាលក្រុងឡុងបានសន្យាផ្តល់ឲ្យអ៊ុយក្រែនចំនួន១៤គ្រឿងគឺជារថក្រោះដែលមានតម្លៃ៥លានផោនដូចគ្នាដែរហើយវាគឺជារថក្រោះដែលធ្លាប់មានប្រវត្តិបាញ់សត្រូវក្នុងចំងាយឆ្ងាយបំផុតកាលពីពេលដែលវាត្រូវបានប្រើប្រាស់ក្នុងប្រតិបត្តិការសង្គ្រាម Gull war ដោយគ្រានោះស្ថិតនៅក្នុងចំងាយប្រមាណជា៣ម៉ាយ ឬត្រូវជា៤,៨គីឡូម៉ែត្រ។

រថក្រោះទំងន់៧៥តោននេះអាចធ្វើដំណើរបានល្បឿនប្រមាណជា៣៧ម៉ាលក្នុងមួយម៉ោងឬត្រូវជា៥៩គីឡូម៉ែត្រក្នុងមួយម៉ោងអាចផ្ទុកអ្នកបើកបរចំនួន៤នាក់និងធ្វើដំណើរបានទៅដល់ចំងាយ៣៤០ម៉ាលផ្លូវរាបស្មើនិង១៦០ម៉ាលក្នុងស្ថានភាពផ្លូវមិនល្អ។

ក្រៅពីនោះគេក៏នឹងអាចឃើញមានវត្តមានរបស់រថក្រោះដែលផលិតក្នុងប្រទេសបារាំង Leclerc ដែលមានតម្លៃ១៤លានផោនក្នុងមួយគ្រឿងផង និងរថក្រោះទំនើបរបស់រុស្ស៊ី T-90 ព្រមជាមួយនឹងរថក្រោះសលពីសម័យសហភាពសូវៀត T-72 ផងដែរ៕