ភ្នំពេញ៖ ក្រុមហ៊ុន អេមរុរ៉ាយស៍ និងក្រុមហ៊ុន សាជីវកម្មសហគមន៍កសិកម្មកម្ពុជា (CACC) បានចុះហត្ថលេខាលើកិច្ចសន្យាផលិតកម្មកសិកម្មសរីរាង្គ ជាមួយសហគមន៍កសិកម្មចំនួន៣៧សហគមន៍ ក្នុងខេត្តព្រះវិហារ។

សហគមន៍កសិកម្មនេះមានសមាជិកជាកសិករខ្នាតតូច ប្រមាណជិត៥ពាន់គ្រួសារ ក្នុងនោះ ២៨សហគមន៍បានឯកភាពជាមួយក្រុមហ៊ុន អេមរុរ៉ាយស៍ លើការទិញលក់ស្រូវសរីរាង្គចំនួន ២៥ ០០០តោន និង ៩សហគមន៍ជាមួយ CACC លើការទិញលក់ដំឡូងមីសរីរាង្គចំនួន ២៥ ០០០តោន ដែលផលិតកម្មកសិកម្មទាំងនេះមិនត្រឹមតែផ្តោតលើស្តង់ដារសរីរាង្គប៉ុណ្ណោះទេ ថែមទាំងជាផលិតផលដែលអនុលោមតាមស្តង់ដារកសិកម្មកកើតឡើងវិញ ដើម្បីឆ្ពោះទៅកាន់គោលដៅផលិតកម្មកសិកម្មដែលមានកាបូនទាប (Low carbon foot print)។

គោលបំណងសំខាន់នៃពិធីចុះហត្ថលេខានេះ គឺត្រូវបានរៀបចំឡើងដើម្បីជំរុញការភ្ជាប់ដៃគូរអាជីវកម្មតាមរយៈកិច្ចសន្យាទិញលក់ស្រូវសរីរាង្គរបស់សហគមន៍កសិកម្ម ក្រុមផលិត និងរោងម៉ាស៊ីនកិនស្រូវ និងក្រុមហ៊ុនដែលមានសក្តានុពលនៅលើទីផ្សារក្នុងស្រុក និងក្រៅប្រទេស ពង្រឹងទំនាក់ទំនងអាជីវកម្មរវាងតួអង្គខ្សែច្រវាក់តម្លៃ (រួមមានអ្នកផលិត អ្នកទិញកែច្នៃនាំចេញ និងអ្នកផ្តល់ធាតុចូល និងសេវាកម្ម) និងពង្រឹងភាពជាដៃគូរវាងវិស័យសាធារណៈ វិស័យឯកជន និងក្រុមផលិត ជាពិសេសគឺបង្កើនការយល់ដឹងពីស្ថានភាពផលិតកម្ម ទីផ្សារកសិផលសរីរាង្គ និងស្តង់ដារសរីរាង្គថ្មីរបស់សហភាពអឺរ៉ុប ជាពិសេសគឺដើម្បីផ្សព្វផ្សាយអំពីការផ្លាស់ប្តូរស្តង់ដារសរីរាង្គរបស់សហភាពអឺរ៉ុប (EU Reg 2018/848) ដល់សហគមន៍កសិកម្ម និងភាគីពាក់ព័ន្ធទាំងអស់ឱ្យបានយល់ដឹង និងអនុវត្ត។

ឯកឧត្តម សុខ សាន្តតារ៉ា អភិបាលរងខេត្តព្រះវិហារ មានប្រសាសន៍ថា ៖ ខេត្តព្រះវិហារ បានចាប់ផ្កើមរៀបចំកិច្ចសន្យាផលិតកម្មកសិកម្មតាំងពីឆ្នាំ២០១៤មកម្លេះ រវាងសហគមន៍កសិកម្ម ជាមួយក្រុមហ៊ុន អេមរុរ៉ាយស៍ ក្រោមការសម្របសម្រួលរបស់មន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ សហការជាមួយគម្រោងគាំទ្រពាណិជ្ជូបនីយកម្មស្រូវអង្ករកម្ពុជា។

ឯកឧត្តមបានបញ្ជាក់ថា ៖

«ព្រឹត្តិការណ៍នាថ្ងៃនេះ នឹងក្លាយជាវេទិកាសម្រាប់ការចែករំលែកបទពិសោធន៍ កត្តាប្រឈម និងឱកាសស្តីពីការអនុវត្តផលិតកម្មស្រូវ និងដំឡូងមីសរីរាង្គតាមកិច្ចសន្យា ហើយជាការផ្តល់ឱកាសដល់អ្នកចូលរួមទាំងអស់បានជួបមុខគ្នាក្នុងការបង្កើតទំនាក់ទំនង និងការចងបណ្តាញរវាងអ្នកផលិតផ្គត់ផ្គង់ និងអ្នកទិញ(នាំចេញ) អ្នកផ្គត់ផ្គង់ធាតុចូលកសិកម្ម និងសេវាកម្មកសិកម្ម ព្រមទាំងដៃគូអភិវឌ្ឍន៍នានាលើវិស័យកសិកម្ម»។

លោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តព្រះវិហារ មានប្រសាសន៍ថា ៖ សម្រាប់ផែនការក្នុងឆ្នាំ២០២៤ នេះ កិច្ចសន្យាផលិតកម្មកសិកម្មលើកសិផលសរីរាង្គសរុបសម្រាប់ខេត្តព្រះវិហារ គឺគ្រោងក្នុងបរិមាណសរុប ៤៣ ៨០០តោន ដោយក្នុងនោះមានស្រូវសរីរាង្គ ១៨ ៧៦០តោន ដំឡូងមីសរីរាង្គ ២៥ ០០០តោន ស្វាយចន្ទីសរីរាង្គ ២០០តោន សណ្តែកដីសរីរាង្គ១០ តោន និងល្ងសរីរាង្គចំនួន ១ តោន នឹងគ្រោងធ្វើឡើងរវាងសហគមន៍កសិកម្មចំនួន ៣២ក្នុងខេត្តព្រះវិហារ និងក្រុមហ៊ុនដៃគូសហការទាំងអស់។

លោកបានឱ្យដឹងថា៖

កិច្ចព្រមព្រៀងនេះ មិនត្រឹមតែស្តែងពីការបន្តឈរលើស្មារតីធានានូវស្ថិរភាពទីផ្សារសម្រាប់កសិករដាំដុះប៉ុណ្ណោះទេ តែថែមទាំងជាឱកាសក្នុងការបញ្រ្ជាបនូវស្តង់ដារសរីរាង្គថ្មីលើដំណាំស្រូវ និងដំឡូងមីសរីរាង្គ ដែលចាំបាច់ត្រូវការការប្តេជ្ញាចិត្តខ្ពស់ពីកសិករដើម្បីទទួលបានវិញ្ញាបនបត្រសរីរាង្គស្របតាមស្តង់ដារអឺរ៉ុប និងសហរដ្ឋអាមេរិក ពីស្ថាប័នវាយតំលៃស្តង់ដារសរីរាង្គអន្តរជាតិអេកូសឺត(ECOCERT) ដែលនៅក្នុងឆ្នាំ២០២៥ ខាងមុខនឹងមានការកែប្រែបទដ្ឋានស្តង់ដារមួយចំនួនពីសហភាពអឺរ៉ុប ជាពិសេសសម្រាប់ក្រុមផលិត។

លោក សុង សារ៉ន អគ្គនាយក ក្រុមហ៊ុន អេមរុរ៉ាយស៍ និងជាប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជា (CRF) និង CACC បានថ្លែងថា ៖

«យើងជឿជាក់ថា មធ្យោបាយតែមួយគត់ដើម្បីរក្សាសុខភាពដីក្នុងរយៈពេលយូរអង្វែង និងជីជាតិដែលនាំឱ្យដំណាំមាននិរន្តរភាព និងគុណភាពខ្ពស់ គឺតាមរយៈវិធីសាស្រ្តកសិកម្មសរីរាង្គ និងកកើតឡើងវិញ។ ការអនុវត្តទាំងនេះធានាថា កសិករអាចរំពឹងថាទទួលបាននូវទិន្នផលខ្ពស់នៅក្នុងរដូវកាលច្រូតកាត់។ Amru និង CACC នឹងនៅបន្តជាស្ថាប័នឈរលើស្មារតីលើកកម្ពស់ស្តង់ដារទាំងនេះ សម្រាប់សុខុមាលភាពរបស់ប្រជាជន និង ផែនដីតាមរយៈការដាំដុះស្រូវដែលមានកាបូនទាប»។

លោក នួន ដេ ប្រធានក្រុមប្រឹក្សាភិបាលសហភាពសហគមន៍កសិកម្មព្រះវិហារមានជ័យ មានប្រសាសន៍ឱ្យដឹងដែរថា៖ ពិធីចុះហត្ថលេខាថ្ងៃនេះ គឺជាពេលវេលាដ៏សំខាន់មួយសម្រាប់សហគមន៍កសិកម្មក្នុងខេត្តព្រះវិហាររបស់យើង។ សហភាពប្តេជ្ញាចិត្តក្នុងការបន្តកិច្ចសហការយ៉ាងស្និទ្ធិជាមួយក្រុមហ៊ុន និងអ្នកពាក់ព័ន្ធទាំងអស់ ដើម្បីអនុវត្តការអនុវត្តកសិកម្មសរីរាង្គ កសិកម្មកកើតឡើងវិញ និងកសិកម្មនិរន្តរភាព។ ភាពជាដៃគូនេះមិនត្រឹមតែធានានូវប្រាក់ចំណូលសម្រាប់ជីវភាពរស់នៅរបស់កសិករ ឱ្យកាន់តែប្រសើរឡើងប៉ុណ្ណោះទេ ប៉ុន្តែក៏ជាបង្កើននូវកិច្ចខិតខំប្រឹងប្រែងរួមគ្នារបស់យើងឆ្ពោះទៅរកការធ្វើកសិកម្មប្រកបដោយនិរន្តរភាព ដែលមិនប៉ះពាល់ដល់បរិស្ថាន ក្នុងខេត្តព្រះវិហារ ដែលជាខេត្តឈានមុខគេលើការធ្វើកសិកម្មប្រកបដោយស្តង់ដារខាងលើនេះ”។

ទន្ទឹមនឹងការឈានដល់ការចុះកិច្ចសន្យានេះ ខ្សែច្រវ៉ាក់ផលិតផលសរីរាង្គក៏បាននិងកំពុងជួបប្រទះឧបសគ្គមួយចំនួនដូចជាបញ្ហាបម្រែបម្រួលអាកាសធាតុ បញ្ហាទីផ្សារ និងជាពិសេសការផ្លាស់ប្តូរស្តង់ដារសរីរាង្គរបស់សហភាពអឺរ៉ុប (EU Reg 2018/848) ដែលធ្វើអោយប្រតិបត្តិករក្នុងខ្សែច្រវ៉ាក់សរីរាង្គមានភាពស្មុគស្មាញជាងមុន។  ដើម្បីសម្រេចបាននូវផែនការនៃកិច្ចសន្យាផលិតកម្មកសិកម្មដែលបានគ្រោងទុក ជាមួយនឹងឧបសគ្គដែលកំពុងជួបប្រទះ គឺចាំបាច់ត្រូវការមានការជួយជ្រោមជ្រែង និងសម្របសម្រួលពីមន្ទីរកសិកម្ម រុក្ខាប្រមាញ់ និងនេសាទ មន្ទីរពាណិជ្ជកម្មខេត្តព្រះវិហារ សហភាពសហគមន៍កសិកម្មព្រះវិហារមានជ័យ និងការសហការអនុវត្តពីដៃគូដទៃទៀតដូចជា សហព័ន្ធស្រូវអង្ករកម្ពុជា អង្គការAVSF DPA HEKSគម្រោងASSET គម្រោង WAT4​CAM គម្រោងកម្ពុជាហាវេស៣ គម្រោងគុជ (PEARL) គ្រឹះស្ថានមីក្រូហិរញ្ញវត្ថុ រោងម៉ាស៊ីនកិនស្រូវ និងនាំចេញ អង្គភាពផ្តល់វិញ្ញាបនបត្រ(CB) ព្រមទាំងក្រុមហ៊ុនផ្គត់ផ្គង់ធាតុចូលកសិកម្មផងដែរ។

ឆ្លើយតបនឹងការផ្លាស់ប្តូរស្តង់ដារសរីរាង្គថ្មីរបស់សហភាពអឺរ៉ុបនេះផងដែរ តំណាងក្រុមហ៊ុន អេកូសឺត (ECOCERT) ក៏បានធ្វើបទបង្ហាញជូនដល់អង្គពិធី ជាពិសេសទៅដល់សហគមន៍កសិកម្មអំពីស្តង់ដារថ្មីនេះ ដែលរួមមានលក្ខខណ្ឌសម្រាប់ក្រុមផលិត ការជះឥទ្ធិពលដល់ក្រុមកសិករខ្នាតតូច ការបែងចែកវិញ្ញាបនបត្រជាដើម ដែលការចែករំលែកទាំងនេះ ពិតជាមានសារៈសំខាន់ដល់ក្រុមផលិតឱ្យបានជ្រាប និងយកទៅអនុវត្ត ក្រោមការជ្រោមជ្រែងផ្នែកបច្ចេកទេសពីភាគីពាក់ព័ន្ធទាំងអស់ សំដៅសម្រេចបាននូវគោលដៅរួម គឺការអនុវត្តកសិកម្មដែលមានកាបូនទាប សម្រាប់ផលប្រយោជន៍រយៈពេលយូរអង្វែងដល់សហគមន៍ និងវិស័យកសិកម្មរបស់កម្ពុជាប្រកបដោយនិរន្តរភាព។

ទិសដៅរបស់អេមរុរ៉ាយស៍ មិនត្រឹមតែផ្តោតលើកសិកម្មសរីរាង្គប៉ុណ្ណោះទេ ប៉ុន្តែក៏បាននិងកំពុងដាក់ទិសដៅ និងផែនការ ផ្តោតលើការកសាងមូលដ្ឋានគ្រឹះសម្រាប់អនាគតប្រកបដោយនិរន្តរភាព តាមរយៈការបញ្រ្ជាបនិងការអនុវត្តកសិកម្មកកើតឡើងវិញ (Regenerative Agriculture) ដែលជាការចូលរួមជាមួយនឹងការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការកាត់បន្ថយការបញ្ចេញឧស្ម័នផ្ទះកញ្ចក់ឱ្យបាន៤០% នៅឆ្នាំ២០៣០ និងរួមចំណែកដល់ការថែរក្សានូវនិរន្តរភាពនៃភពផែនដី លើកកម្ពស់ជីវភាពកសិករ និងត្រួសត្រាយផ្លូវសម្រាប់អនាគតប្រកបដោយនិរន្តរភាព និងធន់៕