សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ដូចគេនិយាយមិនខុសមែន វិបត្តិ គឺជាឱកាស ខណៈមនុស្សជាច្រើនកំពុងជួបវិបត្តិ និងបានប្រកាសលក់អចលនទ្រព្យជាបន្តបន្ទាប់នោះ អ្នកមានលុយបានសម្ងំប្រមូលទិញអចលនទ្រព្យដែលមានទីតាំងល្អៗ និងតម្លៃក្រោមទីផ្សារយ៉ាងស្ងាត់ស្ងៀម ។
លោក គាម សៀកឡុង អគ្គនាយកក្រុមហ៊ុន Century 21 Dream Property បានលើកឡើងថា អ្នកអត់ទិញ ស្រែកឡូឡាថា កុំទិញអចលនទ្រព្យដែលកំពុងជាប់គាំង ចំណែកអ្នកទិញពិតប្រាកដ កំពុងប្រមូលទិញអចលនទ្រព្យបានទីតាំងល្អៗ និងតម្លៃក្រោមទីផ្សារយ៉ាងស្ងៀមស្ងាត់។
លោក លោក គាម សៀកឡុង បានថ្លែងប្រាប់ AMS តាមទូរសព្ទឱ្យដឹងថា ថ្វីត្បិតតែការប្រមូលទិញអចលនទ្រព្យនៅទីតាំងល្អៗ និងមានតម្លៃក្រោមទីផ្សារមានមិនច្រើនក្ដី ប៉ុន្តែសកម្មភាពនេះបានជួយឱ្យការទិញលក់អចលនទ្រព្យនៅកម្ពុជានៅតែមាន ហើយអ្នកដែលទិញអចលនទ្រព្យនាពេលនេះ គឺជាអ្នកដែលមានលុយស្រាប់ ដោយមិនមែនយកលុយពីប្រភពណាផ្សេងមកទិញឡើយ ។ មានន័យថាអ្នកទិញអចលនទ្រព្យគឺជាអ្នកដែលមានលុយសល់ ហើយក្នុងអំឡុងមានអ្នកដាក់អចលនទ្រព្យក្រោមទីផ្សារ ពួកគេក៏អាចមានឱកាសក្នុងការទិញបាននៅទីតាំងល្អៗដែរ ។
លោកបន្តថា អ្នកទិញអចលនទ្រព្យនាពេលនេះ ដូចជាការទិញដីធ្លី និងផ្ទះជាដើម មិនសំដៅលើការវិនិយោគក្នុងរយៈពេលខ្លីទេ ។ សម្រាប់ដីធ្លីអ្នកលុយគេអាចទិញទុកយកចំណេញនៅពេលអនាគត ហើយការទិញដីធ្លីសម្រាប់វិនិយោគ ធនាគារក៏មិនងាយនឹងផ្ដល់ទុនជូនដែរ តែសម្រាប់អ្នកដែលទិញដី ហើយអភិវឌ្ឍន៍ខ្លួនឯង អាចទទួលបានការគាំទ្រពីធនាគារ ។ សម្រាប់ការទិញផ្ទះនាអំឡុងពេលនេះវិញ គឺ ភាគច្រើនទិញសម្រាប់ស្នាក់នៅតែម្ដង ។ ការទិញផ្ទះសម្រាប់ស្នាក់នៅ ក៏អាចទទួលបានការគាំទ្រពីធនាគារដែរ តែសម្រាប់ការទិញដើម្បីវិនិយោគ ដើម្បីទុកចំនេញគឺមិនសូវជាមានទេ ហើយធនាគារក៏មិនគាំទ្រហិរញ្ញវត្ថុដល់ការវិនិយោគប្រភេទនេះដែរ ។
លោក គាម សៀកឡុង បានលើកឡើងថា ការទិញអចលនទ្រព្យនាអំឡុងពេលនេះ អ្នកមានលុយអាចទិញបានក្រោមទីផ្សាររហូតដល់៣០ភាគរយ ហើយគាត់អាចទុកតែរយៈពេលប៉ុន្មានឆ្នាំវានឹងហក់ឡើងវិញ ដូច្នេះគេអាចរកប្រាក់ចំណេញបានវិញនៅពេលអនាគត។
ស្រដៀងគ្នានេះ ក៏មានអ្នកជំនាញវិស័យអចលនទ្រព្យជាច្រើនទៀតក៏បានផ្ដល់ជាទស្សនថា ការទិញដីធ្លីនាពេលនេះគឺអាចរកប្រាក់ចំនេញបានខ្ពស់នាពេលខាងមុខ តែសុំតែកុំយកពីប្រភពណាដែលបង្កើតអត្រាការប្រាក់មកទិញទើបមិនបង្កជាហានិភ័យ ។ ការទិញដីដើម្បីចំណេញ គេមិនអាចកំណត់ពេលវេលាជាក់លាក់ក្នុងការលក់ចេញវិញបានទេ ពេលខ្លះអាចលឿន តែពេលខ្លះអាយឺត ដូច្នេះបើយកលុយពីធនាគារឬប្រភពដែលបង្កើតអត្រាការប្រាក់ វានឹងអាចធ្វើឱ្យពិបាករកលុយបង់ការប្រាក់ ៕
Account
Security
Favourite Content