សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ចាប់តាំងពីជម្លោះនៅអ៊ុយក្រែនកាលពីឆ្នាំ២០២២ និងដោយសារបញ្ហាវិបត្តិកូវីដផងនោះ សេដ្ឋកិច្ចអាល្លឺម៉ង់ហាក់ដូចជាមិនទាន់ងើបឡើងវិញល្អប្រសើរនៅឡើយក្នុងនាមជាមហាអំណាចសេដ្ឋកិច្ចធំជាងគេបំផុតលេខ៤របស់ពិភពលោក ដោយក្នុងឆ្នាំនេះកំណើនសេដ្ឋកិច្ចនឹងទទួលបានត្រឹមតែ ២,២ភាគរយធៀបទៅនឹងឆ្នាំចាស់ដែលទទួលបាន២,៥ភាគរយ។
បញ្ហាសេដ្ឋកិច្ច ពាណិជ្ជកម្ម បញ្ហាដាក់ទណ្ឌកម្មសេដ្ឋកិច្ចរុស្សី បញ្ហាអតិផរណា និងបញ្ហាជាច្រើនទៀត ជាពិសេសវិបត្តិថាមពលកំពុងយាយីសេដ្ឋកិច្ចអាល្លឺម៉ង់ជាបន្តបន្ទាប់ ប៉ុន្តែទោះបីជាយ៉ាងណាក្តី នៅចុងឆ្នាំនេះរដ្ឋាភិបាលទីក្រុងប៊ែរឡាំងបានប្រកាសបញ្ចេញខ្ទង់ចំណាយយោធាគួរឲ្យចាប់អារម្មណ៍ប្រមាណជា ២,៣ពាន់លានដុល្លារដើម្បីទិញអាវុធពីអាមេរិកដែលក្នុងនោះគឺសុទ្ធតែជាឧទ្ធម្ភាគចក្រប្រយុទ្ធទាំងអស់សរុបជាង៦០គ្រឿង។
សេចក្តីប្រកាសដែលធ្វើឡើងដោយក្រុមហ៊ុន Airbus Helicopters កាលពីពាក់កណ្តាលខែធ្នូនេះបានឲ្យដឹងថា កិច្ចព្រមព្រៀងថ្មីជាមួយនឹងអាល្លឺម៉ង់គឺតំរូវឲ្យក្រុមហ៊ុនផលិតឧទ្ធម្ភាគចក្រប្រភេទ H145M ប្រយុទ្ធសរុប៦២គ្រឿងដែលក្នុងនោះ៥៧គ្រឿងនឹងផ្តល់ឲ្យទៅកម្លាំងយោធាអាល្លឺម៉ង់ និង៥គ្រឿងទៀតសម្រាប់កងកម្លាំងទ័ពពិសេសអាល្លឺម៉ង់ ហើយប្រមាណជា២០គ្រឿងទៀតស្ថិតនៅក្នុងផែនការបន្ទាប់ដែលការប្រគល់ជូននឹងធ្វើឡើងចាប់ពីឆ្នាំ២០២៤ខាងមុខនេះហើយ។
ក្រុមមន្ត្រីក្រសួងការពារជាតិអាល្លឺម៉ង់ក្នុងលក្ខខណ្ឌមិនបង្ហាញអត្តសញ្ញាណបានរៀបរាប់ប្រាប់ Defense News ថា សមាជិកសភាអាល្លឺម៉ង់បានអនុម័តកញ្ចប់ថវិកាជាតិប្រមាណជា ២,១ពាន់លានអឺរ៉ូ ឬត្រូវជា ២,៣ពាន់លានដុល្លារកាលពីថ្ងៃទី១៣ ខែធ្នូ ដើម្បីទិញឧទ្ធម្ភាគចក្រដែលអាចបំពាក់មីស៊ីលប្រឆាំងរថក្រោះ Spike LR Guided anti-tank។
Spike LR missile នេះគឺជាផលិតផលដែលផលិតដោយប្រទេសអ៊ីស្រាអែល និងកំពុងប្រើប្រាស់ពេញនិយមបំផុតនៅក្នុងទ្វីបអឺរ៉ុប ពីព្រោះតែសមត្ថភាពវាយប្រហាររបស់វាអាចបាញ់ចេញចំគោលដៅក្នុងចំងាយដល់ទៅ១០គីឡូម៉ែត្រដែលវាបានបង្កលក្ខណៈងាយស្រួល និងសុវត្ថិភាពបំផុតសម្រាប់ឧទ្ធម្ភាគចក្រដែលមានបំពាក់អាវុធប្រភេទនេះ។
គួរឲ្យដឹងដែរថា H145M នឹងត្រូវដាក់ឲ្យជំនួសប្រតិបត្តិការរបស់ឧទ្ធម្ភាគចក្រប្រភេទ Tiger ដែលកំពុងប្រើប្រាស់បច្ចុប្បន្ន ហើយបើទោះបីជាអាល្លឺម៉ង់បានបញ្ជាទិញឧទ្ធម្ភាគចក្រថ្មីនេះក្នុងចំនួនច្រើនយ៉ាងណាក្តី ប៉ុន្តែផែនការនេះគឺត្រឹមជាដំណោះស្រាយបណ្តោះអាសន្នមុននឹងឈានទៅការប្រើប្រាស់ដ្រូនជំនាន់ថ្មីៗទំនើបៗផ្សេងទៀតដែលកំពុងស្ថិតនៅក្នុងដំណាក់កាលអភិវឌ្ឍនិងផលិតនៅឡើយ៕
Account
Security
Favourite Content