បរទេស ៖ យោងតាមប្រភពព័ត៌មានពីរ៉យទ័រ​បានរាយការណ៍ថា ក្រុមហ៊ុន​រថយន្តកំពូល​របស់​កូរ៉េខាងត្បូង Hyundai បាន​ប្រកាស​ពី​គម្រោង​លក់​រោងចក្រ​របស់​ខ្លួន​ក្នុង​ប្រទេស​រុស្ស៊ី ខណៈ​ក្រុមហ៊ុន​ផលិត​រថយន្ត​មួយនេះបាន​បញ្ចប់ និង​ចាកចេញ​ពី​ប្រទេស​នេះ។

រោងចក្រនេះមានទីតាំងនៅជិតទីក្រុង St. Petersburg ហើយបានផ្អាកប្រតិបត្តិការក្នុងខែមីនា ឆ្នាំ២០២២ បន្ទាប់ពីក្រុមហ៊ុនផលិតបានប្រកាសពីការដកខ្លួនចេញពីប្រទេសនេះដោយចេតនា ក្រោយពីរុស្ស៊ីចាប់ផ្តើមវាយលុកទៅលើនៅអ៊ុយក្រែន។ ទន្ទឹមនឹងនេះ គ្រឿងបរិក្ខារនឹងត្រូវបានលក់ក្នុងតម្លៃពិសេសត្រឹមតែ ៧ ពាន់រូប៊ល (លុយរុស្ស៊ី) ប៉ុណ្ណោះ។

យោងតាមសេចក្តីប្រកាសព័ត៌មានរបស់ក្រុមហ៊ុន Hyundai បានឱ្យដឹងថា ក្រុមហ៊ុនកំពុងបញ្ចប់កិច្ចព្រមព្រៀងជាមួយនឹង Art-Finance របស់រុស្ស៊ី ដើម្បីលក់កម្មសិទ្ធិទាំងស្រុងរបស់ខ្លួននៅក្នុងក្រុមហ៊ុន Hyundai Motor Manufacturing Rus ។ ក្រុមហ៊ុននេះកំពុងស្វែងរកការផ្ទេរទ្រព្យសម្បត្តិនៅ St. Petersburg របស់ខ្លួនទៅ Art-Finance រួមទាំងបញ្ចូលជម្រើសទិញត្រឡប់មកវិញ។ គម្រោងនេះមានគោលបំណងដើម្បីបញ្ចប់កិច្ចព្រមព្រៀងនៅចុងខែនេះ។

យ៉ាងណាមិញ យោងតាមឯកសារបទប្បញ្ញត្តិមួយបានបង្ហាញថា ក្រុមហ៊ុន Hyundai នឹងទទួលរងការខាតបង់ចំនួន ២៨៧ ពាន់លានវ៉ុន (២២០ លានដុល្លារ) ដោយសារតែការលក់រោងចក្រនេះ។ ក្រុមហ៊ុនក៏បានសន្យាថានឹងគាំទ្រដល់ម្ចាស់ក្រុមហ៊ុនរថយន្ត Hyundai ថ្មីនៅក្នុងប្រទេសរុស្ស៊ី ហើយនឹងបន្តផ្តល់សេវាកម្មក្រោយការលក់ និងការថែទាំអតិថិជនផ្សេងទៀតផងដែរ។

លើសពីនេះផងដែរ ក្រុមហ៊ុន Hyundai និងសាខារបស់ខ្លួន Kia ដែលធ្លាប់ស្ថិតក្នុងចំណោមម៉ាករថយន្តលក់ដាច់បំផុតទាំងបីនៅក្នុងប្រទេសរុស្ស៊ី ក៏បានចូលរួមក្នុងការដកខ្លួនចេញផងដែរ ចំពេលមានសម្ពាធពីលោកខាងលិច និងការដាក់ទណ្ឌកម្មទាក់ទងនឹងអ៊ុយក្រែនលើទីក្រុងម៉ូស្គូ។

ជាការឆ្លើយតប រដ្ឋាភិបាលរុស្ស៊ីបានបង្ខំយល់ព្រមឱ្យក្រុមហ៊ុនទាំងនោះចាកចេញពីរុស្ស៊ី និងលក់ទ្រព្យសម្បត្តិរបស់ពួកគេសម្រាប់ស្រោចស្រង់ថ្លៃដើមវិញ ទោះបីជាជម្រើសនៃការទិញត្រឡប់មកវិញអាចអនុញ្ញាតឱ្យពួកគេត្រឡប់មកវិញក៏ដោយ។

កាលពីខែឧសភា ក្រុមហ៊ុនផលិតរថយន្តអាល្លឺម៉ង់ Volkswagen បានលក់ភាគហ៊ុននៅក្នុងទ្រព្យសម្បត្តិរបស់ខ្លួននៅរុស្ស៊ីទៅឱ្យ Art-Finance ដែលត្រូវបានគាំទ្រដោយក្រុមអ្នកចែកចាយរថយន្ត Avilon ។ ទោះជាយ៉ាងណាក្តី នៅពេលដែលក្រុមហ៊ុនផលិតរថយន្តធំៗទូទាំងពិភពលោកបានដកខ្លួនចេញ ម៉ាកយីហោចិនបានផ្លាស់ប្តូរចូលមករុស្ស៊ីជំនួសពួកគេ។

លោក Zhang Hanhui ឯកអគ្គរដ្ឋទូតរបស់ទីក្រុងប៉េកាំងប្រចាំនៅទីក្រុងមូស្គូ លើកឡើងថា ឥឡូវនេះ ប្រទេសរុស្ស៊ីគឺជាទីផ្សារនាំចេញរថយន្តដ៏ធំបំផុតរបស់ប្រទេសចិន៕