ភ្នំពេញ ៖ ការសន្សំ ជាផ្នែកមួយនៃចំណេះដឹងហិរញ្ញវត្ថុ ដែលមានភាពចាំបាច់សម្រាប់ការរស់នៅប្រចាំ​ថ្ងៃ ហើយការសន្សំក៏ចាត់ទុកថាជាទម្លាប់ល្អនៃការគ្រប់គ្រង​ហិរញ្ញវត្ថុ ដែលមនុស្សគ្រប់វ័យគួរ​តែមានផងដែរ។ ជាមួយគ្នានេះ ការសន្សំអាចធ្វើឡើងក្នុងគោលដៅខុសៗគ្នា ប៉ុន្តែគោលដៅសន្សំដែលពេញនិយមជាងគេ​រួមមាន៖ ការ​សន្សំសម្រាប់ករណីអាសន្ន ការសន្សំសម្រាប់ចូលនិវត្តន៍ និងការសន្សំសម្រាប់គោលដៅអនាគត ដែលអាចមានរយៈពេលវែង ឬខ្លី។

សម្រាប់ទម្លាប់នៃការសន្សំនេះផងដែរ អ្នកជំនាញបានអះអាងថា គួរតែត្រូវបានបណ្ដុះតាំងពីវ័យកុមារមកម៉្លេះ ព្រោះនៅពេលដែលកុមារធំធាត់ឡើងជាមួយនឹង​ទម្លាប់​​សន្សំ និងគ្រប់គ្រងហិរញ្ញវត្ថុបានល្អ នោះគេនឹងក្លាយជាមនុស្សមានវិន័យ។

លោក កុក ថា អគ្គនាយកក្រុមហ៊ុនអេហ្វអេចអេហ្វ ខេបភីថល បានមានប្រសាសន៍ថា ៖ «ការសន្សំនេះ មិនចាំបាច់ទាល់តែមានចំណូលច្រើននោះទេ វាគឺជាវិន័យ​ដែល​យើងត្រូវតែដាក់កំហិតខ្លួនឯងឱ្យសន្សំតិចនៅពេលមានចំណូលតិច ហើយ​សន្សំ​កាន់តែច្រើននៅពេលមានចំណូលច្រើន»។

អ្នកជំនាញរូបនេះបន្តបានបញ្ជាក់ទៀតថា ៖

«យ៉ាងហោចណាស់ ៥% នៃចំណូល គួរតែត្រូវបានកាត់ទុកសម្រាប់សន្សំ ហើយប្រសិនបើចង់ឱ្យមានប្រសិទ្ធភាពខ្ពស់ ប្រាក់​សន្សំ​នេះគឺកុំប៉ះពាល់ឱ្យសោះ ពោលគឺចាត់ទុកថា យើងបានចាយវាយប្រាក់នោះអស់ហើយ»។

ជាទូទៅ ចំពោះការសន្សំគេអាចធ្វើឡើងក្នុងរូបភាពធំៗចំនួន២ គឺការសន្សំ​ក្រៅផ្លូវការ និងការសន្សំផ្លូវការ។ ការសន្សំក្រៅផ្លូវការរួមមាន ការរក្សាទុក​ប្រាក់​ដោយ​ខ្លួន​ឯង​ ការផ្ញើនឹងបងប្អូន ឪពុកម្ដាយ ឬសាច់ញាតិ និងការលេងតុងទីនជាដើម។ ចំណែកឯការសន្សំ បែបផ្លូវការគឺសំដៅទៅលើការសន្សំជាមួយ​គ្រឹះស្ថាន​ផ្លូវការដូចជា ធនាគារ និងក្រុមហ៊ុនធានារ៉ាប់រង។ យ៉ាងណាក៏ដោយ បើទោះបីជាការសន្សំគេអាចធ្វើបានច្រើនវិធីក្ដី ប៉ុន្តែអ្នកជំនាញនៅតែលើកទឹកចិត្តឱ្យប្រជាជនជ្រើសរើស​យក​ការ​សន្សំជាមួយគ្រឹះស្ថានផ្លូវការ។

លោក ឡាំង មុំា នាយកនៃនាយកដ្ឋានឌីជីថលរបស់ធនាគារ Maybank បានឱ្យ​ដឹងថា៖ បច្ចុប្បន្ននេះ បច្ចេកវិទ្យាហិរញ្ញវត្ថុគឺមានការរីកចម្រើនគួរឱ្យកត់សម្គាល់ បើធៀបទៅនឹងកាលពី​ប៉ុន្មាន​ឆ្នាំមុន ដូច្នេះហើយ មិនចំពោះតែការសន្សំនោះទេ ការទុកដាក់លុយកាក់ផ្សេងៗក៏អាចធ្វើបានតាមរយៈបច្ចេកវិទ្យា ឬអនឡាញ(Online) ដែលកាន់តែបង្កភាពងាយស្រួល​ខ្លាំង​មែន​ទែន។

លោកបានសង្កត់ធ្ងន់ថា៖

«បច្ចុប្បន្ន ធនាគារនៅស្រុកយើងមានច្រើនស្ថាប័នណាស់ អីចឹងហើយ​ចំពោះការ​ប្រាក់​ក៏កាន់តែប្រកួតប្រជែងដែរ…. និយាយរួមទៅដាក់​តែ​ប្រាក់ចោលក៏ទទួលបានការប្រាក់ជារៀងរាល់ឆ្នាំដែរ ហើយចំនួននៃប្រាក់សន្សំក៏កើនឡើងដូចគ្នា»។

ពាក់ព័ន្ធទៅនឹងការសន្សំប្រាក់ផ្លូវការនេះផងដែរ បច្ចុប្បន្ននេះក្រៅពីស្ថាប័នធនាគារដែលទទួលប្រាក់សន្សំ ប្រជាជនក៏មានជម្រើសផ្សេងទៀត នោះគឺការសន្សំជាមួយ​ក្រុមហ៊ុនធានារ៉ាប់រងដែលមានសុវត្ថិភាព និងទំនុកចិត្តខ្ពស់។ គួរកត់សម្គាល់ថា សេវាធានារ៉ាប់រងអាយុជីវិតបានផ្សារភ្ជាប់គ្នាយ៉ាងជិតស្និទ្ធទៅនឹង​ផែនការណ៍​ហិរញ្ញវត្ថុ។

លោក ជីម គង់ហ៊ុយ  អគ្គនាយកនៃក្រុមហ៊ុន FWD Cambodia ធ្លាប់បានលើកឡើងកាលពីពេលថ្មីៗនេះថា ការទិញផលិតផលធានារ៉ាប់រងអាយុជីវិត​មិនត្រឹមតែ​ជាមធ្យោបាយ​ក្នុង​ការធានា​ឱ្យ​បាននូវស្ថិរភាពហិរញ្ញវត្ថុនាពេល​អនាគតប៉ុណ្ណោះទេ ថែមទាំងជាមធ្យោបាយសន្សំប្រាក់ដ៏មានប្រសិទ្ធភាពខ្ពស់មួយសម្រាប់​ប្រើប្រាស់​ក្នុងគោលដៅ​សំខាន់ៗ​របស់បុគ្គល និងក្រុមគ្រួសារនីមួយៗ។

បើតាមលោកអគ្គនាយក ការសន្សំជាមួយក្រុមហ៊ុនធានារ៉ាប់រងនេះ ត្រូវបានធ្វើឡើងតាមរយៈការទិញសេវាកម្មធានារ៉ាប់រងអាយុជីវិតសម្រាប់គោលដៅ ការសិក្សា​របស់​កូនៗ គោលដៅសំខាន់ៗក្នុងជីវិត និងសម្រាប់ការចូលនិវត្តន៍ជាដើម។ មិនខុសពីការសន្សំនៅស្ថាប័នធនាគារប៉ុន្មានឡើយ អតិថិជនអាចសន្សំប្រាក់ម្តងបន្តិចៗ​ជារៀង​រាល់ខែ រាល់ឆមាស ឬរាល់ឆ្នាំ ហើយរយៈពេល ១០ ឬ ១៥ ឆ្នាំក្រោយ ពួកគាត់នឹងមានលុយស្របតាមផែនការដែលបានកំណត់សម្រាប់ប្រើប្រាស់​តាម​គោល​ដៅតែម្តង។

លោក ជីម គង់ហ៊ុយ បានមានប្រសាសន៍ទៀតថា៖

« ការធានារ៉ាប់រងអាយុជីវិត ជាការ​បង្កើតមូលដ្ឋាន​គ្រឹះសេដ្ឋកិច្ចដ៏រឹងមាំមួយសម្រាប់​ក្រុមគ្រួសារ ហើយយើងត្រូវ​ការ​ការចូលរួម​ចំណែក​យ៉ាង​សកម្ម​ពី​ប្រព័ន្ធ​ផ្សព្វផ្សាយដើម្បីពង្រឹងការទទួលបានព័ត៌មានត្រឹមត្រូវ និងគ្រប់ជ្រុងជ្រោយពីសារ​សំខាន់​នៃវិស័យនេះ​នៅក្នុងជីវភាពរស់​នៅ​ប្រចាំថ្ងៃរបស់​ប្រជាពលរដ្ឋយើង។»

ដូច្នេះ ជាការឆ្លើយតបទៅនឹងតម្រូវការរបស់ប្រជាជន ក៏ដូចជាដើម្បីជំរុញបន្ថែមនូវការសន្សំ ក្រុមហ៊ុន​ធានារ៉ាប់រងអាយុជីវិត FWD ក៏បានបន្ថែមសេវាកម្មជា​បន្ត​បន្ទាប់ ដោយក្នុងនោះក៏មានសេវាកម្មសន្សំ​រយៈពេលខ្លីផងដែរ។

និយាយជារួម ការសន្សំ គឺមានសារៈសំខាន់សម្រាប់ទាំងសេដ្ឋកិច្ចបុគ្គលផ្ទាល់ ក្រុមគ្រួសារ និងសង្គមជាតិ ដោយប្រាក់​សន្សំអាចជួយធ្វើឱ្យសេដ្ឋកិច្ចមានចរន្តល្អ។ រីឯចំណេះដឹង​ផ្នែក​ហិរញ្ញវត្ថុ ក៏កាន់តែមាន​សារៈសំខាន់​ក្នុងការជំរុញកំណើនសេដ្ឋកិច្ច និងកាត់បន្ថយភាពក្រីក្រតាមរយៈការពង្រីកលទ្ធភាពទទួលបានសេវា​ហិរញ្ញវត្ថុ​ផ្លូវការ ព្រមទាំង​ការ​លើកកម្ពស់ឥរិយាបថហិរញ្ញវត្ថុប្រកបដោយការទទួលខុសត្រូវ៕