សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ មហាវិថីចំនួន២ នៅក្រុងភ្នំពេញ គឺមហាវិថីព្រះនរោត្តម និងមហាវិថីព្រះស៊ីសុវត្ថិ ត្រូវបានគ្រោងនឹងរៀបចំកែលម្អឱ្យប្រសើរឡើងដោយប្រើប្រាស់បច្ចេកវិទ្យាបញ្ញាសិប្បនិម្មិត ហៅកាត់ថា AI ដោយគម្រោងនេះត្រូវបានបង្ហើបឡើងដោយក្រសួងរៀបចំដែនដី នគរូបនីយកម្ម និងសំណង់ ក្រោមការរៀបចំនូវសិក្ខាសាលាផ្សព្វផ្សាយមួយកាលពីដើមសប្ដាហ៍កន្លងទៅនេះ ។
ឯកឧត្តម លាង មុនីរឹទ្ធ រដ្ឋលេខាធិការក្រសួងរៀបចំដែនដី នរូបនីយកម្ម និងសំណង់ បានមានប្រសាសន៍នៅក្នុងអង្គសិក្ខាសាលថា តំបន់មួយចំនួនដែលស្ថិតនៅតាមមហាវិថីទាំង២នេះ នឹងត្រូវធ្វើការសិក្សាសាកល្បងអភិវឌ្ឍន៍ និងកែលម្អលើកកម្ពស់សោភ័ណភាពតាមបច្ចេកវិទ្យាបញ្ញាសិប្បនិម្មិត AI ដើម្បីឱ្យ AI សាកល្បងមើលថា វានឹងត្រូវចេញរូបរាងបែបណា ។
នៅក្នុងសិក្ខាសាលាដដែលនេះ លោក Brian Wong អ្នកជំនាញស្ថាបត្យកម្មមកពីប្រទេសសិង្ហបុរី បានលើកយកពីបទពិសោធន៍នៃការរៀបចំហេដ្ឋារចនាសម្ព័ន្ធនៅក្នុងប្រទេសសិង្ហបុរី ដើម្បីចែកជូនដល់អ្នកជំនាញ និងអ្នកចូលរួមកម្ពុជារាប់រយនាក់ ។ ក្រៅពីនេះ ក៏មានការធ្វើបទបង្ហាញពីលោក ស៊ីម តារា អ្នកជំនាញបញ្ញាសិប្បនិម្មិតកម្ពុជា ដោយកត់សម្គាល់ពីសារសំខាន់នៃបច្ចេកវិទ្យាបញ្ញាសិប្បនិម្មិតដល់សិក្ខាកាមចូលរួមក្នុងពេលនោះផងដែរ ។
ឯកឧត្តម ឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក៏ធ្លាប់បានលើកពីគម្រោងអភិវឌ្ឍន៍មហាវិថីក្នុងរាជធានីភ្នំពេញ ឱ្យកាន់តែប្រសើរ ជាពិសេសឯកឧត្តម ចង់ឱ្យមានការរៀបចំមានផ្លូវដើរ ដើម្បីជំរុញឱ្យពលរដ្ឋក្នុងក្រុងភ្នំពេញដើរឱ្យបានច្រើន ដូចជា ដើរទៅធ្វើការ ដើរទៅផ្សារ ដើរទៅសាលារៀន ឬដើរហាត់ប្រាណជាដើម ។
ឯកឧត្តមបានលើកឡើងផងដែរថា ពលរដ្ឋក្នុងរាជធានីភ្នំពេញនាពេលបច្ចុប្បន្ននេះ ភាគច្រើនជិះម៉ូតូ និងរថយន្តច្រើនជាងជិះកង់ និងដើរ ដោយសារតែផ្លូវមួយចំនួនមិនទាន់មានផ្លូវសម្រាប់ថ្មើរជើង ដូច្នេះហើយទើបពលរដ្ឋនៅក្នុងរាជធានីភ្នំពេញ នៅតែបន្តប្រើយានយន្តទោះបីទៅកាន់ទីកន្លែងដែលនៅជិតៗក្ដី ជាមូលហេតុបង្ករឱ្យការកកស្ទះចរាចរណ៍ជាញឹកញាប់ ។
គួរបញ្ជាក់ថា កាលពីប៉ុន្មានខែមុននេះ ក្រសួងរៀបចំដែនដី នគរូបនីយកម្ម និងសំណង់ ក៏បានរៀបចំសិក្ខាសាលាមួយនិយាយពីការរៀបចំលំនៅឋានតាមលំនាំទីក្រុងហុងកុង ដោយបានអញ្ជើញអ្នកជំនាញពីទីក្រុងហុងកុងមកចែករំលែកបទពិសោធន៍ក្នុងការរៀបចំលំនៅឋាននៅក្រុងហុងកុង ដល់អ្នកអភិវឌ្ឍន៍លំនៅឋាន និងជំនាញស្ថាបត្យកម្មកម្ពុជាផងដែរ ។
ជាការកត់សម្គាល់ ក្នុងឆ្នាំ២០២៤នេះ ជាពិសេសនៅក្នុងអាណត្តិទី៧នេះ ក្រសួងរៀបចំដែនដី នគរូបនីយកម្ម និងសំណង់ បានដាក់ចេញនូវផែនការ និងយុទ្ធសាស្ត្រថ្មីៗជាបន្តបន្ទាប់ ដើម្បីរៀបចំក្រុងនានានៅទូទាំងប្រទេស ក្នុងគោលបំណងលើកកម្ពស់សោភ័ណភាព សុខុមាលភាពរបស់ប្រជាពលរដ្ឋ ពោលគឺការរៀបចំក្រុងឱ្យពលរដ្ឋបញ្ចេញសកម្មភាពជាងមុន ។ ក្រៅពីនេះ ក្រសួងក៏បានដោះស្រាយបញ្ហាជាច្រើនដែលនៅសេសសល់កាលពីពេលកន្លងមក ជាពិសេសជំរុញការចុះវាស់វែងដីធ្លីឱ្យបានបញ្ចប់រួចរាល់នៅមុនឆ្នាំ២០២៩ ៕
Account
Security
Favourite Content