សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងវិនិយោគចំនួន១២ ស្ថិតក្នុងខេត្តចំនួន ៧ នៃប្រទេសកម្ពុជា ត្រូវបានក្រុមប្រឹក្សាអភិវឌ្ឍន៍កម្ពុជាលើកយកមកពិនិត្យ ពិភាក្សា ដើម្បីអនុម័តចុះបញ្ជី ។ នេះ បើតាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជាកាលពីថ្ងៃទី១២ ខែមិថុនា ឆ្នាំ២០២៥ ។
បើតាមក្រុមប្រឹក្សាអភិវឌ្ឍន៍កម្ពុជាបានឱ្យដឹងថា គម្រោងវិនិយោគទាំង១២នេះ មានទុនវិនិយោគសរុបប្រមាណ ១២៨លានដុល្លារអាម៉េរិក អាចបង្កើតការងារបានប្រមាណ ៤,៦ពាន់កន្លែង និងមានមុខសញ្ញាវិនិយោគក្នុងវិស័យឧស្សាហកម្មចំនួន ១១គម្រោង ក្នុងនោះផលិតគ្រឿងសង្ហារិម និងសម្ភារៈបរិក្ខារប្រើប្រាស់ក្នុងផ្ទះគ្រប់ប្រភេទ, ផលិតសម្ភារៈប្រើប្រាស់ ដូចជាកំប៉ុងទឹក ប្រអប់ ចាន ស្លាបព្រា សម ចង្កឹះ ទុយោបឺត ជើងទ្រកំប៉ុង ក្រដាសជូតមាត់, ផលិតអំពូលភ្លើង សម្ភារៈលម្អក្នុងផ្ទះ និងគ្រឿងបន្ទាប់បន្សំអគ្គិសនីគ្រប់ប្រភេទ, ខារអំបោះ និងជ្រលក់ពណ៌, ផលិតផលិតផលធ្វើអំពីការកាវ, ផលិតបំពង់ទីបដែក, ផលិតបរិក្ខារអគ្គិសនីបំភ្លឺ និងគ្រឿងអគ្គិសនីសម្រាប់ប្រើប្រាស់ក្នុងផ្ទះ, ផលិតនុយសិប្បនិម្មិត និងសម្ភារៈស្ទូចត្រីគ្រប់ប្រភេទ, បង្កើតកសិដ្ឋានចិញ្ចឹម និងភ្ញាស់កូនមាន់ ទា, ផលិតខ្សែភ្លើង អំពូលភ្លើងលម្អ និងសម្ភារៈអគ្គិសនី, និងផលិតសម្ភារៈក្មេងលេង និងសត្វចិញ្ចឹម និងវិស័យទេសចរណ៍ចំនួន១គម្រោង គឺគម្រោងសាងសង់ និងធ្វើអាជីវកម្មសណ្ឋាគារផ្កាយ៥ ចំនួន២៨០បន្ទប់ ។
នៅក្នុងសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជាបានបញ្ជាក់ផងដែរថា គម្រោងវិនិយោគទាំង១២ បានបោះទីតាំងនៅខេត្តកណ្តាល តាកែវ កំពង់ស្ពឺ ស្វាយរៀង កំពត កំពង់ឆ្នាំង និងកំពង់ធំ ។
គួររម្លឹកថា បើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានឱ្យដឹងថា ក្នុងរយៈពេល៥ខែដើមឆ្នាំ២០២៥នេះ កម្ពុជាបានអនុម័តគម្រោងវិនិយោគចំនួន២៩០គម្រោង ដែលមានទឹកប្រាក់ចុះបញ្ជីចំនួន៤,២ពាន់លានដុល្លារអាម៉េរិក ។
ក្នុងចំណោមគម្រោងវិនិយោគទាំងនោះ ឃើញថាវិស័យឧស្សាហកម្មទទួលបានការចុះបញ្ជីវិនិយោគច្រើនជាងគេដែលមានទឹកប្រាក់រហូតដល់ ៣,៦ពាន់លានដុល្លារអាម៉េរិក ក្រៅពីនោះមានគម្រោងហេដ្ឋារចនាសម្ព័ន្ធ មានទឹកប្រាក់ចុះបញ្ជីវិនិយោគចំនួន៥៥៨លានដុល្លារអាម៉េរិក ។ ដោយឡែកខេត្តកំពង់ស្ពឺ ជាខេត្តដែលទទួលបានការចាប់អារម្មណ៍បណ្ដាក់ទុនវិនិយោគច្រើនជាងគេដោយក្នុងរយៈពេល៥ខែ មានគម្រោងចុះបញ្ជីវិនិយោគរហូតដល់៧២គម្រោង បន្ទាប់មកខេត្តស្វាយរៀង មាន៦៨គម្រោង ៕
Account
Security
Favourite Content