ផ្លែស្វាយចន្ទី ឬក្រៀមភាសានៅតំបន់ខ្លះហៅថា ក្រយ៉ូវ ដែលភាគច្រើនត្រូវបានកសិករបោះបង់ចោលរាប់សិបតោននៅក្រោមដើម ឬក្នុងចម្ការក្រោយការប្រមូលផលប្រលេះយកកគ្រាប់រួចរាល់នោះ ត្រូវបានក្រុមគ្រួសារមួយរស់នៅក្នុងភូមិបាជ័យ ឃុំសណ្ដាន់ ស្រុកសណ្ដាន់ ខេត្តកំពង់ធំ យកមកច្នៃបិត ឬចម្រាញ់ធ្វើជាស្រាតាមរូបមន្តបន្តទុកពីគ្រួសារតាំងពីជំនាន់មុន ដែលមានរសជាតិឈ្ងុយឆ្ងាញ់ប្លែកខុសពីស្រាដែលចម្រាញ់ចេញពីអង្ករ ជាមួយនឹងការទទួលបានការចាប់អារម្មណ៍គាំទ្រច្រើនគួរសមបន្ទាប់ពីមានការបង្ហោះផ្សព្វផ្សាយតាមរយៈបណ្តាញសង្គមកាលពីពេលកន្លងទៅថ្មីៗនេះ។

លោក កេត ធិបតី ជាម្ចាស់អាជីវកម្មបិតស្រាស្វាយចន្ទី ឬស្រាក្រយ៉ូវ ជាលក្ខណៈគ្រួសារ ស្ថិតនៅអាសយដ្ឋានដូចដែលបានជម្រាបជូនខាងលើនេះបានប្រាប់ AMS Economy ឱ្យដឹងថា ផលិតផលស្រាក្រយ៉ូវ ឬស្រាចម្រាញ់ចេញពីផ្លែស្វាយចន្ទីរបស់ខ្លួននេះ កាលពីដំបូងឡើយក្រុមគ្រួសាររបស់លោកផលិតក្នុងបរិមាណតិចតួចសម្រាប់តែប្រើប្រាស់ និងទទួលទាននៅក្នុងគ្រួសារ និងញាតិមិត្តស្និទ្ធស្នាលតែប៉ុណ្ណោះ ប៉ុន្តែទើបតែមួយរយៈពេលចុងក្រោយនេះ បន្ទាប់ពីរូបលោកបានថតរូប ហើយបង្ហោះផ្សព្វផ្សាយនៅលើបណ្តាញសង្គមក៏មានអ្នកចាប់អារម្មណ៍ និងបញ្ជាទិញជាបន្តបន្ទាប់។

លោកបញ្ជាក់ថា ៖

« ស្រាក្រយ៉ូវរបស់យើងទើបតែទទួលបានការចាប់អារម្មណ៍ខ្លាំងនៅក្នុងអំឡុងខែមេសា ឆ្នាំ២០២៤ នេះដោយសារតែខ្ញុំបានទៅលេងស្រុកចំពេលដែលម្ដាយខ្ញុំកំពុងបិតស្រា ហើយក៏បានថតវីដេអូពីការផលិតស្រានេះបង្ហោះនៅលើបណ្តាញសង្គម ហើយក៏មានអ្នកទស្សនាច្រើនដល់រាប់លាននាក់។ ដោយសារតែមានការគាំទ្រ និងកម្ម៉ង់ទិញច្រើន ទើបគ្រួសារខ្ញុំបានបន្តបិតលក់លើកដំបូងបានប្រមាណ ១០០លីត្រ លក់ជូនអ្នកដែលបានកម្ម៉ង់ទិញមុនគេ ដោយតម្លៃដូចគ្នាទៅនឹងការលក់នៅក្នុងស្រុកភូមិដូច្នោះដែរ»។

លោកបានបញ្ជាក់ថា ចំពោះតម្លៃលក់នៅលើទីផ្សារនាពេលបច្ចុប្បន្ននេះ គឺអាចចាប់ពី៦ម៉ឺនរៀលឡើងទៅក្នុងមួយលីត្រ អាស្រ័យតាមរដូចកាលដែលសម្បូរផ្លែស្វាយចន្ទីសាច់ ឬខ្សត់ ព្រោះជាទូទៅ ក្នុងមួយឆ្នាំ រដូវដែលសម្បូរផ្លែស្វាយចន្ទី ឬស្វាយក្រយ៉ូវនេះ មានត្រឹមតែរយៈ៣ខែប៉ុណ្ណោះ ខណៈដែលទឹកស្វាយចន្ទីចំណុះ ៣០លីត្រ អាចបិតបានជាស្រាមានគុណភាព និងរសជាតិឆ្ងាញ់ មិនប៉ះពាល់ដល់សុខភាពបានប្រមាណត្រឹមតែ ៥លីត្រប៉ុណ្ណោះ ។

នៅក្នុងឱកាសជាមួយគ្នានេះ លោកក៏ប្រាប់ពីកត្តាដែលជំរុញចិត្តឱ្យគ្រួសាររបស់លោកចង់បង្កើតអាជីវកម្មបិតស្រាក្រយ៉ូវនេះដែរថា ៖

«មែនទែនទៅ ការបិតស្រាក្រយ៉ូវនេះគឺពិបាកជាងការបិតស្រាសដែលចម្រាញ់ចេញពីអង្ករ ប៉ុន្តែមូលហេតុដែលជំរុញឱ្យខ្ញុំបង្កើតអាជីវកម្មស្រានេះ ដោយសារខ្ញុំចង់បន្តរូបមន្តដែលបន្សល់ទុកតាំងពីជំនាន់លោកតា លោកយាយរបស់ខ្ញុំមកម៉្លេះ ចង់ឱ្យផលិតផលស្រាក្រយ៉ូវដែលជាផលិតផលរបស់ខ្មែរមានភាពល្បីល្បាញទាំងក្នុង និងក្រៅស្រុក ហើយក៏ចង់ឱ្យផលិតផលស្រាក្នុងស្រុករបស់យើងក្លាយជារបស់ដែលមានតម្លៃ មានគេចង់ដឹង ចង់សាករសជាតិនៅពេលគេមកលេងប្រទេសយើងម្ដងៗ»។

ពាក់ព័ន្ធនឹងការផលិតវិញ ទម្រាំអាចទទួលបានផលិតផលជាស្រាដែលអាចទទួលទាន និងដាក់លក់បានគឺតម្រូវឆ្លងកាត់ ៥ដំណាក់កាលសំខាន់ៗ គឺ រាប់ចាប់ពីការបេះផ្លែស្វាយចន្ទីពីដើម ប្រលេះយកគ្រាប់ចេញ ច្របាច់យកទឹក រួចដឹកជញ្ជូនមកផ្ទះ បន្ទាប់មកលាយមេផ្អាប់ទុក និងបិតស្រាធ្វើជាស្រា ដោយការផលិតនេះត្រូវការរយៈពេល ១សប្ដាហ៍ទើបអាចបិតបានស្រា ១ឆ្នាំង។ ចំណែកឯរូបមន្តអ្វីដែលពិសេស គឺគ្រួសាររបស់លោកផលិតមេស្រាដោយខ្លួនឯង ដែលធ្វើឱ្យស្រាមានក្លិនក្រអូបឈ្ងុយខុសប្លែកពីស្រាដែលបិតពីអង្ករ និងមានកម្រិតអាកុលត្រឹមតែប្រមាណ ២៥-៣០អង្សាប៉ុណ្ណោះ។

យ៉ាងណាមិញ លោកបានបញ្ជាក់ដែរថា ទោះបីជាមានការគាំទ្រពីសំណាក់អតិថិជនទូទៅក៏ពិតមែន ប៉ុន្តែចំពោះការផលិតនៅមានលក្ខណៈជាគ្រួសារនៅឡើយ ដែលមិនទាន់អាចមានលទ្ធភាពគ្រប់គ្រាន់ក្នុងការផលិតផ្គត់ផ្គង់តាមតម្រូវការទីផ្សារនោះទេ ហើយក៏មិនទាន់មានឧបករណ៍ជំនួយក្នុងការផលិតកម្រិតស្តង់ដារនោះដែរ ប៉ុន្តែទោះជាយ៉ាងណា លោកក៏មានគម្រោងចង់ពង្រីកការផលិតស្រាក្រយ៉ូវឱ្យក្លាយទៅជាអាជីវកម្មធំមួយ​ ឬប្រែក្លាយជាក្រុមហ៊ុនផលិតស្រាក្នុងស្រុកដែលគេទទួលស្គាល់ មានម៉ាក់សញ្ញា និងយីហោត្រឹមត្រូវ ដែលអាចចូលរួមអភិវឌ្ឍផលិតផលក្នុងស្រុក និងអាចជួយផ្ដល់ការងារបន្ថែមឱ្យប្រជាជនក្នុងតំបន់បានមួយចំណែក កាត់បន្ថយការធ្វើចំណាកស្រុក ដែលត្រូវឃ្លាតឆ្លាយពីគ្រួសារនោះទៀតទេ៕