បរទេស៖ យោងតាមប្រភពព័ត៌មានពី The Guardian បានរាយការណ៍ថា រុស្ស៊ីកំពុងផ្សព្វផ្សាយរឿងមិនពិតអំពីភាពរឹងមាំនៃសេដ្ឋកិច្ចរបស់ខ្លួន និងមិនមានគ្រោះថ្នាក់ដោយសារទណ្ឌកម្មរបស់លោកខាងលិចទេ ប៉ុន្តែការពិតនោះទំនងជាកាន់តែយ៉ាប់យ៉ឺនដោយសារតែការដាក់ទណ្ឌកម្ម។

រដ្ឋមន្ត្រីហិរញ្ញវត្ថុសហភាពអឺរ៉ុប ៨ រូប លើកឡើងថា រុស្ស៊ីនិយាយកុហកអំពីកម្លាំងសេដ្ឋកិច្ចរបស់ខ្លួន ដោយសារមាន​សញ្ញា​ជា​ច្រើន​ដែល​បង្ហាញ​ថា​សេដ្ឋកិច្ច​រុស្ស៊ី​កំពុង​ធ្លាក់​ចុះ ហើយគួរតែមានទណ្ឌកម្ម ​និង​វិធានការ​ផ្សេង​បន្ថែមទៀត​ដើម្បី​ធ្វើ​ឲ្យការចុះខ្សោយនៃ​សេដ្ឋកិច្ច​រុស្ស៊ី​​កាន់តែមានប្រសិទ្ធភាព។

ក្នុងអំឡុងពេលកិច្ចប្រជុំកំពូលរបស់ណាតូនៅទីក្រុងវ៉ាស៊ីនតោន មេដឹកនាំលោកខាងលិចបានបញ្ជាក់ឡើងវិញនូវការប្តេជ្ញាចិត្តរបស់ពួកគេចំពោះកិច្ចការពាររបស់អ៊ុយក្រែន។ ​រុស្ស៊ី​មិនត្រឹមតែធ្វើសង្គ្រាមប្រឆាំង​នឹង​អ៊ុយក្រែន​​ប៉ុណ្ណោះ​ទេ ប៉ុន្តែបានផ្តល់ព័ត៌មានមិនពិតផងដែរ ដោយប្រធានាធិបតីរុស្ស៊ីចង់ឱ្យគេជឿថា រុស្ស៊ីមិនមានការរំជើបរំជួលចំពោះការដាក់ទណ្ឌកម្ម និងការខិតខំប្រឹងប្រែងផ្សេងទៀតរបស់លោកខាងលិចដែលបានធ្វើឡើងដើម្បីគាំទ្រអ៊ុយក្រែននោះទេ។ ដូច្នេះហើយ អ្នកនយោបាយ ប្រព័ន្ធផ្សព្វផ្សាយ និងស្ថាប័នសេដ្ឋកិច្ចនៅភាគខាងលិចមិនយកព័ត៌មានចេញពីវិមានក្រឹមឡាំងឡើយ ហើយពួកគេបានពិនិត្យមើលឃើញថា កម្លាំងសេដ្ឋកិច្ចរុស្ស៊ីមិនល្អដូចអ្វីដែលទីក្រុងម៉ូស្គូលើកឡើងនោះទេ។

ទោះបីជាផលិតផលក្នុងស្រុកសរុបរបស់រុស្ស៊ីអាចនឹងកើនឡើង ប៉ុន្តែសេដ្ឋកិច្ចកំពុងឆ្ពោះទៅរកសង្រ្គាមកាន់តែខ្លាំងឡើង ដែលគាំទ្រដោយការជំរុញសារពើពន្ធដ៏ធំ។ នេះ​មិន​មែន​ជា​ប្រភព​នៃ​ការ​រីក​ចម្រើន​​នៃ​ស្ថិរភាព​សេដ្ឋកិច្ចនោះ​ទេ។ ការធ្វើសង្រ្គាមរបស់វិមានក្រឹមឡាំងគឺលើសពីសមត្ថភាពរួចទៅហើយ ខណៈដែលភាពអត់ការងារធ្វើបានធ្លាក់ចុះរហូតដល់មានរបាយការណ៍ថា លោក Vladimir Putin បានយល់ព្រមលើការប្រើប្រាស់ការងារកម្លាំងពលកម្មជំនួសការជាប់ពន្ធនាគារ។ មិនត្រឹមតែប៉ុណ្ណោះ ទីផ្សារការងារដ៏តឹងតែងធ្វើឱ្យមានសម្ពាធលើប្រាក់ឈ្នួលកើនឡើង ខណៈពេលដែលប្រាក់រូប៊លរុស្ស៊ីចុះខ្សោយបង្កើនតម្លៃនាំចូល និងកំពុងរួមចំណែកដល់អតិផរណាកើនឡើងខ្ពស់ ទោះបីជាធនាគារកណ្តាលរុស្ស៊ីបង្កើនកិច្ចខិតខំប្រឹងប្រែប្រឆាំងនឹងនឹងអត្រាការប្រាក់ខ្ពស់ក៏ដោយ។

យោងតាម Bloomberg បានឲ្យដឹងថា​ រដ្ឋាភិបាលរុស្ស៊ីបានទាញយកមូលនិធិទ្រព្យសកម្មរាវរបស់ជាតិដើម្បីផ្តល់ហិរញ្ញប្បទានដល់សង្រ្គាម ហើយទំហំត្រូវបានកាត់បន្ថយស្ទើរតែពាក់កណ្តាលចាប់តាំងពីមានសង្គ្រាមជាមួយនឹងអ៊ុយក្រែន។ មិនត្រឹមតែប៉ុណ្ណោះ ទីក្រុងមូស្គូក៏បានប្រើអន្តរាគមន៍ខ្លាំងខ្លាមួយចំនួនដើម្បីគ្រប់គ្រងសេដ្ឋកិច្ចរុស្ស៊ីផងដែរ ដោយបានហាមឃាត់ការនាំចេញប្រេងសាំង និងស្ករ ក្រោមការលើកឡើងថាធានាការផ្គត់ផ្គង់ក្នុងស្រុក។ បន្ថែមពីនេះ រុស្ស៊ី​បានគ្រប់គ្រងដើមទុនយ៉ាងតឹងរឹង ដើម្បីការពារការហូរនៃមូលនិធិឯកជនចេញពីប្រទេស និងការពារប្រាក់រូប៊លពីការធ្លាក់ចុះ ប៉ុន្តែមាន​របាយការណ៍​ពី​ការដក​ប្រាក់​រាប់​ពាន់​លាន​ដុល្លារ​ចេញពី​ប្រទេសនេះ។

សម្រាប់ប្រជាជនរុស្ស៊ីជាច្រើន គោលនយោបាយសេដ្ឋកិច្ចរបស់វិមានក្រឹមឡាំងក្នុងពេលសង្គ្រាមមិនថ្មីសម្រាប់ពួកគេនោះទេដូចជា ការគ្រប់គ្រងដើមទុន ការហាមប្រាឃាត់មការនាំចេញ និងការវិនិយោគដ៏ច្រើននៅក្នុងសង្រ្គាម។ ប្រវត្តិសាស្ត្របង្ហាញយ៉ាងច្បាស់ថា នេះមិនមែនជាយុទ្ធសាស្ត្ររយៈពេលវែងដ៏ជោគជ័យនោះទេ ដោយសារការរឹតបន្តឹងទីផ្សារខ្លាំងក្លា ការចំណាយសាធារណៈដ៏ច្រើនដែលផ្តល់ហិរញ្ញប្បទានដោយការដកហូតទ្រព្យសម្បត្តិឯកជន និងការតំរង់ទិសនៃសេដ្ឋកិច្ចឆ្ពោះទៅរកសង្រ្គាម ដោយមានការមិនយកចិត្តទុកដាក់ទាំងស្រុងចំពោះសុខុមាលភាពសង្គម និងសេដ្ឋកិច្ចរបស់ប្រជាជន។ ការធ្លាក់ចុះសេដ្ឋកិច្ចធ្ងន់ធ្ងររយៈពេលខ្លីត្រូវបានជំរុញដោយការវិនិយោគដ៏ច្រើនក្នុងឧស្សាហកម្ម និងការចូលប្រើប្រាស់បច្ចេកវិទ្យាមានកម្រិតខ្លាំង ហើយវាអាចនឹងរារាំងដល់ការបង្កើនផលិតភាព បង្កឱ្យមានការជាប់គាំងនៃវិស័យឯកជន ការកើនឡើងនៃអតិផរណា និងសម្ពាធកាន់តែខ្លាំងឡើងលើពលរដ្ឋររុស្ស៊ី។

ជាលទ្ធផល ប្រធានាធិបតីរុស្ស៊ី Vladimir Putin នឹងត្រូវប្រើប្រាស់ហិរញ្ញប្បទានរូបិយវត្ថុ ដោយបន្ថែមសម្ពាធបន្ថែមទៀតដល់អតិផរណា និងកាត់បន្ថយទុនបម្រុងសាច់ប្រាក់របស់រុស្ស៊ីថែមទៀត។ ប្រសិនបើមេដឹកនាំរុស្ស៊ីបន្តដើរលើផ្លូវនេះ ការខូចខាតរយៈពេលវែងដល់សេដ្ឋកិច្ចរុស្ស៊ីនឹងកាន់តែធ្ងន់ធ្ងរ ហើយទំនងជានឹងបំផ្លាញទំនុកចិត្តបន្ថែមទៀត។ ទោះជាយ៉ាងណាក្តី នេះក៏ទាមទារការអត់ធ្មត់ និងការដោះស្រាយពីលោកខាងលិចផងដែរ ខណៈដែលបន្តការគាំទ្រចំពោះអ៊ុយក្រែន។ សហភាពអឺរ៉ុបលើកឡើងថា ទណ្ឌកម្មចំពោះ​រុស្ស៊ី​គឺ​មាន​ប្រសិទ្ធភាព ដោយវាបានកែប្រែភូមិសាស្ត្រនៃពាណិជ្ជកម្មបរទេសរបស់រុស្ស៊ី។ នៅចន្លោះឆ្នាំ ២០២២​ និង ២០២៣ ប្រាក់ចំណូលនាំចេញរបស់រុស្ស៊ីបានធ្លាក់ចុះប្រហែលមួយភាគបី។ទន្ទឹមនឹងនេះ ពួកគេចាំបាច់ត្រូវដាក់វិធានការ​បន្ថែម​ទៀត​ ដោយសហភាពអឺរ៉ុបបានអនុម័តទណ្ឌកម្មជុំទី ១៤ រួមមាន វិធានការកំណត់គោលដៅឧស្ម័នធម្មជាតិរាវ និងកងនាវាស្រមោលរបស់រុស្ស៊ីដែលកំពុងដឹកជញ្ជូនប្រេងរុស្ស៊ីដែលជាប់ទណ្ឌកម្មជុំវិញពិភពលោក។ នៅក្នុងកិច្ចប្រជុំកំពូល G7 មេដឹកនាំបានចាត់វិធានការបន្ថែមទៀតដើម្បីរារាំងប្រទេសចិនពីការផ្តល់ជំនួយក្នុងការជួយរុស្ស៊ីជៀសពីទណ្ឌកម្ម និងបានយល់ព្រមផ្តល់ប្រាក់កម្ចីចំនួន ២០ ពាន់លានដុល្លារដល់អ៊ុយក្រែន ដែលបានមកពីប្រាក់ចំណូលតាមរយៈបង្កកទ្រព្យសម្បត្តិរុស្ស៊ី។

ស្របពេលនេះដែរ លោកខាងលិចគួរតែធានានូវប្រតិបត្តិការដ៏ឆាប់រហ័ស និងប្រកបដោយប្រសិទ្ធភាពនៃកិច្ចព្រមព្រៀង G7 ស្តីពីការផ្តល់ប្រាក់កម្ចីសម្រាប់អ៊ុយក្រែន និងស្វែងរកដំណោះស្រាយស្របតាមច្បាប់អន្តរជាតិ និងសហភាពអឺរ៉ុប។ បន្ថែមពីនេះ ទ្រព្យសកម្មរុស្ស៊ីគួរតែនៅជាប់គាំង ហើយទណ្ឌកម្មនឹងត្រូវបានពង្រឹងជាពិសេសនៅក្នុងវិស័យសំខាន់ៗដូចជាថាមពល ហិរញ្ញវត្ថុ និងបច្ចេកវិទ្យា។ ស្របពេលដែលការអនុវត្តទណ្ឌកម្មដែលមានស្រាប់ ទាំងប្រទេសតាមព្រំដែន និងប្រភពនានាគួរតែបន្តធ្វើការបិទចន្លោះប្រហោងដែលអនុញ្ញាតឱ្យដឹកជញ្ជូនទំនិញទាំងអស់ទៅកាន់រុស្ស៊ីដោយផ្ទាល់ ឬដោយប្រយោល។ វាក៏ចាំបាច់ផងដែរក្នុងការដាក់សម្ពាធបន្ថែមទៀតលើអ្នកផ្តល់លទ្ធភាពសំខាន់ៗផ្សេងទៀតជួយរុស្ស៊ីគេចវេសពីទណ្ឌកម្មរួមមាន អាស៊ីខាងកើត និងមជ្ឈិមបូព៌ា៕