សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ជំនួសឱ្យការប្រើប្រាស់ចំណីសុទ្ធដែលមានតម្លៃថ្លៃ និងមិនអាចឲ្យអ្នកចិញ្ចឹមសត្វសល់ប្រាក់ចំណេញបានច្រើននោះ បច្ចុប្បន្ននេះ គេអាចកែច្នៃកសិកផលក្នុងស្រុកមួយចំនួនដើម្បីជំនួស ឬកាត់បន្ថយការប្រើចំណីនាំចូលដែលមានថ្លៃដើមខ្ពស់ ដូចជាការយកមើម និងស្លឹកដំឡូងឈើមកផ្អាប់ជាមួយស្ករ សម្រាប់ធ្វើជាចំណីដ៏មានប្រូតេអ៊ីនខ្ពស់សម្រាប់ចិញ្ចឹមជ្រូក មាន់ និងទា។
ជាធម្មតានៅ ក្នុងមើមដំឡូងឈើមានផ្ទុកទៅដោយសារធាតុពុលបន្តិចបន្តួច ហើយប្រសិនបើគេមិនបន្សាបសារធាតុទាំងនោះជាមុនទេ វាអាចបណ្តាលឲ្យមានបញ្ហាដល់សុខភាពសត្វចិញ្ចឹម ។ ដូច្នេះហើយ ជាច្រើនឆ្នាំកន្លងមកនេះ គេបានសិក្សាទៅលើវិធីសាស្ត្រមួយចំនួនដែលអាចបន្សាបសារធាតុពុលចេញពីដំឡូងឈើ បង្កើនគុណភាព និងសារធាតុចិញ្ចឹមរបស់ដំឡូង ហើយអាចរក្សាទុកបានរហូតច្រើនខែ។ វិធីសាស្ត្រនេះ អាចកាត់បន្ថយការចំណាយថ្លៃដើមទៅលើចំណីសត្វ ហើយងាយរកបាននៅក្នុងតំបន់ដែលរស់នៅស្រាប់ មិនមានភាពភាពស្មុកស្មាញច្រើនចំពោះការកែច្នៃធ្វើជាចំណីសត្វ ហើយអាចជំរុញការលូតលាស់បានធំធាត់ទៀតផង។
ចំពោះការកែច្នៃដំឡូងធ្វើជាចំណីសត្វនេះដែរ (ផ្អកដំឡូង) ក្រៅពីដំឡូងឈើ គេក៏អាចយកដំឡូងជ្វាមកកែច្នៃក៏បានដូចគ្នា ដោយគេអាចប្រើប្រាស់បានទាំងមើម និងស្លឹក ប៉ុន្តែត្រូវធ្វើផ្សេងៗគ្នា ជាមួយនឹងការប្រើវត្ថុធាតុដើមមួយចំនួន រួមមាន មើមដំឡូងឈើ មើមដំឡូងជ្វា ស្ករកាកអំពៅ ឬស្កររងូ(Molasses) ពាងដី ឬធុងជ័រ សម្រាប់ផ្អាប់ ។
ចំពោះដំណើរការផលិត ដំបូងគេត្រូវយកពាងមួយស្អាត (ពាងដីដាក់ថង់ប្លាស្ទីកខាងក្នុង ឬអាចប្រើពាងធម្មតាបើគ្មានពាងដី) មកលាងឲ្យស្អាត បន្ទាប់មកបកសំបកដំឡូងឈើចេញ រួចលាងទឹកឲ្យស្អាត។ ដាក់ដំឡូងដែលបានលាងរួចហើយនោះហាលនៅលើកន្ទេលផុតពីដី ដើម្បីសម្ងួតជាតិទឹកខ្លះចេញ និងដើម្បីបន្សាបជាតិពុលនៅក្នុងនោះខ្លះ។ ប្រើប្រាស់ចានដែកមួយធំល្មមសម្រាប់ដាក់ស្ករកាកអំពៅចូល (ក្នុងបរិមាណដំឡូង១០គីឡូក្រាម ត្រូវការស្កររងូ ២គីឡូក្រាម)។ ប្រឡាក់ស្ករកាកអំពៅនេះជាមួយដំឡូងឲ្យសព្វល្អ រួចដាក់វាតម្រៀបចូលក្នុងពាង ឬថង់ប្លាស្ទីក រួចចងមាត់ និងច្របាច់ខ្យល់ចេញឱ្យអស់។
គេត្រូវរក្សាវាទុកនៅទីកន្លែងមួយដែលមិនមានពន្លឺថ្ងៃ និងមានសីតុណ្ហភាពត្រជាក់ល្មមប្រមាណ ២៥-៣០ អង្សាសេ ចំនួន ២សប្តាហ៍យ៉ាងតិចមុននឹងដាក់ឲ្យជ្រូកស៊ី។ ហើយការផ្អាប់នេះ គេទុកកាន់តែយូរកាន់តែល្អដើម្បីឲ្យវាបង្កើនប្រូតេអ៊ីនបានកាន់តែច្រើន ។
ដោយឡែក ស្លឹកដំឡូងវិញ គេអាចធ្វើតាមវិធីដូចខាងលើនេះដែរ ប៉ុន្តែស្កររងូត្រូវយកមកលាយជាមួយទឹកស្អាតក្នុងបរិមាណ ទឹក ១លីត្រ ដាក់ស្កររងូ ១គីឡូក្រាម ដោយបាញ់ស្រោចលើស្លឹកដំឡូងឲ្យសព្វល្អ។ បន្ទាប់មកច្របល់វាឲ្យសព្វទើបច្រកដាក់ក្នុងធុង ឬពាងទុកចំនួន ៤សប្តាហ៍ មុនពេលយកមកធ្វើជាចំណីឲ្យមាន់ ទា និងជ្រូកស៊ី។
គួរបញ្ជាក់ដែរថា ប្រសិទ្ធភាពរបស់ផ្អកដំឡូងនេះគឺប្រសើរច្រើនជាងវិធីដទៃទៀត ដោយសារវាងាយស្រួលរក និងមានតម្លៃថោក ហើយក្នុងករណីគេមិនអាចរកស្ករកាកអំពៅ ឬស្កររងូបានទេ គេក៏អាចប្រើទឹកត្នោតក៏បាន ប៉ុន្តែត្រូវដាំវាឲ្យពុះសិនមុនយកមកប្រើការ។ នេះបើយោងតាមការផ្សព្វផ្សាយរបស់ក្រសួងកសិកម្ម រុក្ខាប្រមាញ់ និងនេសាទ កាលពីពេលកន្លងទៅ៕
Account
Security
Favourite Content