សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ការបង្កើតតំបន់សេដ្ឋកិច្ចពិសេស ឬសួនឧស្សាហកម្មនៅតាមបណ្ដារាជធានី-ខេត្ត បានផ្ដល់នូវអត្ថប្រយោជន៍យ៉ាងធំធេងដល់សេដ្ឋកិច្ចជាតិ និងសង្គម រាប់ចាប់តាំងពីតម្រូវការប្រើប្រាស់ដីធ្លី ការផ្ដល់ឱកាសការងារដល់ពលរដ្ឋ និងទទួលបានចំណូល ក៏ដូចជាកសាងហេដ្ឋារចនាសម្ព័ន្ធសម្រាប់បម្រើដល់ការដឹកជញ្ជូន។ ដូច្នេះហើយ រាជរដ្ឋាភិបាលបានជំរុញឱ្យមានការវិនិយោគ និងបង្កើតតំបន់សេដ្ឋកិច្ចពិសេសថ្មីៗ ជាពិសេសនៅតាមបណ្ដាខេត្តដែលមានសក្ដានុពល។
មន្ត្រីជាន់ខ្ពស់នៃរាជរដ្ឋាភិបាលកម្ពុជា ឯកឧត្តមបណ្ឌិតសភាចារ្យ ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានលើកឡើងថា ការបង្កើតតំបន់សេដ្ឋកិច្ចពិសេសនៅតាមបណ្ដាខេត្តសក្ដានុពល ក៏ដូចជារាជធានីភ្នំពេញ បានទាក់ទាញគម្រោងវិនិយោទាំងក្នុង និងក្រៅប្រទេស ជាក់ស្ដែងក្នុងឆ្នាំ២០២៥កន្លងទៅ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគប្រមាណ ៦៣០គម្រោង ដែលជាគម្រោងវិនិយោគដ៏ច្រើនមិនធ្លាប់មានសម្រាប់ប្រវត្តិសាស្ត្រកម្ពុជា ។
ដោយឡែក អ្នកជំនាញនៃវិស័យអចលនទ្រព្យជាច្រើនក៏បានមើលឃើញថា ការវិនិយោគលើតំបន់សេដ្ឋកិច្ច និងការវិនិយោគលើរោងចក្រឧស្សាហកម្មទាំងក្រៅ និងក្នុងតំបន់សេដ្ឋកិច្ច បានធ្វើឱ្យតម្រូវការដីធ្លីសម្រាប់ប្រើប្រាស់បម្រើដល់វិស័យនេះមានដំណើរការ ហើយតាមរយៈការវិនិយោគទាំងអស់នេះដែរ ក៏បានធ្វើចរន្តនៃការទិញ-លក់ដីធ្លីដែលធ្លាប់តែស្ងប់ស្ងាត់នោះ ប្រែជាមានសកម្មភាពឡើងវិញ។
បន្ថែមពីនេះ ការបង្កើតតំបន់សេដ្ឋកិច្ចពិសេសនេះដែរ ក៏បានផ្ដល់ឱកាសការងារដោយផ្ទាល់ជាច្រើនដល់ប្រជាពលរដ្ឋទាំងក្នុងតំបន់ និងតាមបណ្ដាខេត្តមួយចំនួន។ ក្រៅពីនេះ ក៏បានផ្ដល់អត្ថប្រយោជន៍ជាច្រើនទៀតដោយប្រយោលដល់ពលរដ្ឋក្នុងតំបន់ដែលពាក់ព័ន្ធ តាមរយៈការបង្កើតអាជីវកម្មលក់ដូរ ចំណីអាហារ ការសង់បន្ទប់ជួលស្នាក់នៅរបស់កម្មករ និយោជិត ដែលធ្វើការនៅក្នុងតំបន់សេដ្ឋកិច្ចពិសេសនោះជាដើម។
លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានប្រាប់បណ្ដាញព័ត៌មាន AMS ឱ្យដឹងថា ការបង្កើតតំបន់សេដ្ឋកិច្ចពិសេស និងការបង្កើតសួនឧស្សាហកម្ម ពិតជាបានផ្ដល់អត្ថប្រយោជន៍យ៉ាងច្រើន ដែលទទួលបានផលទាំងអ្នកវិនិយោគ ប្រជាពលរដ្ឋ និងចំណូលរដ្ឋ តាមរយៈការបង់ពន្ធជាដើម។
លោកបន្តថា បច្ចុប្បន្ននេះ ការវិនិយោគនៅក្នុងតំបន់សេដ្ឋកិច្ចពិសេស បានទាក់ទាញវិនិយោគិនទាំងក្នុង និងក្រៅប្រទេស ពីព្រោះការវិនិយោគក្នុងតំបន់សេដ្ឋកិច្ចពិសេស ឬសួនឧស្សាហកម្ម បានផ្ដល់ភាពងាយស្រួលដល់វិនិយោគិន ហើយការវិនិយោគក្នុងនេះ ក៏ទទួលបានការលើកទឹកចិត្តពិសេស និងសម្រួលលក្ខខណ្ឌមួយចំនួនពីរាជរដ្ឋាភិបាលផងដែរ ។
យោងតាមរបាយការណ៍របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា គិតត្រឹមឆ្នាំ២០២៥ នៅទូទាំងប្រទេសកម្ពុជា មានតំបន់សេដ្ឋកិច្ចពិសេសដែលកំពុងដំណើរការសរុប ៣៤តំបន់ ស្ថិតនៅក្នុង ១១រាជធានី-ខេត្ត ដែលមានកំណើន ៤តំបន់ ធៀបនឹងឆ្នាំ២០២៤ ។
ក្នុងចំណោមរាជធានី/ខេត្តទាំង១១ ដែលមានតំបន់សេដ្ឋកិច្ចពិសេសដំណើរការ ឃើញថា ខេត្តស្វាយរៀងមានតំបន់សេដ្ឋកិច្ចដែលមានរោងចក្រដំណើរការច្រើនជាងគេរហូតដល់១២តំបន់ បន្ទាប់មកគឺខេត្តព្រះសីហនុ មានចំនួន៦តំបន់ ខេត្តកណ្ដាល ៣តំបន់ ខេត្តកោះកុង ៣តំបន់ ខេត្តបន្ទាយ ៣តំបន់ កំពង់ស្ពឺ ២តំបន់ ។ ដោយឡែកខេត្តចំនួន៥ផ្សេងទៀត រួមមានខេត្តកំពង់ចាម កំពត ក្រចេះ ពោធិ៍សាត់ និងរាជធានីភ្នំពេញ មានតំបន់សេដ្ឋកិច្ចចំនួន១តំបន់ដូចគ្នា។
គួរបញ្ជាក់ថា រាជរដ្ឋាភិបាលកម្ពុជាបានចេញអនុក្រឹត្យស្ដីពីការបង្កើត និងគ្រប់គ្រងតំបន់សេដ្ឋកិច្ចពិសេសលើកដំបូងនៅឆ្នាំ២០០៥ ហើយការបង្កើតតំបន់សេដ្ឋកិច្ចពិសេសនេះក្នុងគោលបំណងបង្កើននូវបរិយាកាសវិនិយោគ ធ្វើឱ្យកាន់តែប្រសើរនូវផលិតភាពក្នុងការផលិតទំនិញ ភាពប្រកួតប្រជែង បង្កើនកំណើនសេដ្ឋកិច្ចជាតិ ជំរុញការនាំចេញ ជាពិសេស ដោះស្រាយការងារជូនប្រជាជនដើម្បីកាត់បន្ថយភាពក្រីក្រ៕
Account
Security
Favourite Content