ភ្នំពេញ៖ ត្រឹមរយៈពេល ១ឆ្នាំ ដើមអាណត្តិទី៧នេះ ក្រសួងរៀបចំដែនដី នគរូបនីយកម្ម និងសំណង់ បានវាស់វែងដីដែលត្រូវចុះបញ្ជីមានលក្ខណៈជាប្រព័ន្ធបានប្រមាណ ២លានក្បាលដី និងឈានទៅបញ្ចប់ការវាស់វែងក្បាលដីដែលនៅសេសសល់ត្រឹមដំណាច់ឆ្នាំ២០២៥។ នេះបើយោងតាមក្រសួងរៀបចំដែនដី នគរូបនីយកម្ម និងសំណង់។

ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់​ បានថ្លែងថា ការពន្លឿនការងារចុះបញ្ជីដីធ្លីគឺជាកិច្ចការដែលក្រសួងរួមជាមួយមន្ទីររៀបចំដែនដីខេត្ត និងរដ្ឋបាលខេត្ត ក៏ដូចជារដ្ឋបាលមូលដ្ឋាន បាន និងកំពុងឆ្លើយតប​ទៅនឹង​គោល​នយោ​បាយយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ដើម្បីធានាសុវត្ថិភាពជូនប្រជាពលរដ្ឋក្នុងការកាន់​កាប់ដីធ្លីស្របច្បាប់ បញ្ចៀសទំនាស់ដីធ្លី និងជួយលើក​ស្ទួយជីវភាព​រស់នៅរបស់ប្រជាពលរដ្ឋឱ្យកាន់តែល្អប្រសើរ។

ឯកឧត្តមរដ្ឋមន្ត្រី បានលើកឡើងថា៖ កម្ពុជាបានចុះបញ្ជីដីជាង៧លានក្បាលដី និងនៅសល់ជាង៥លានក្បាលដីទៀត ដែលនៅឆ្នាំ២០២៩ នឹងចុះបញ្ជីឱ្យចប់សព្វគ្រប់នៅទូទាំងប្រទេស។

សូមបញ្ជាក់ថា ៖ ក្រសួងរៀបចំដែនដី នគរូបនីយកម្ម និងសំណង់ បានប្រកាសដាក់ឱ្យប្រើប្រាស់ជាផ្លូវការសេវាសាធារណៈតាមប្រព័ន្ធអនឡាញដែលជាជំហានដ៏សំខាន់មួយឆ្ពោះទៅរកការធានាថា ប្រជាជនខ្មែរទាំងអស់ និងគ្រប់ស្ថាប័ននៅក្នុងប្រទេសកម្ពុជាអាចទទួលបាន និងប្រើប្រាស់សេវាសុរិយោដី និងសំណង់សំខាន់ៗបានយ៉ាងងាយស្រួល ប្រកបដោយប្រសិទ្ធភាព និងមានសុវត្ថិភាពជាងមុន។ ប្រព័ន្ធដ៏ទំនើបនេះ ក៏នឹងចូលរួមជួយលើកកម្ពស់វិស័យមីក្រូហិរញ្ញវត្ថុ និងសុខុមាលភាពហិរញ្ញវត្ថុរបស់ប្រជាជនកម្ពុជាទាំងអស់ តាមរយៈការជួយដោះស្រាយបញ្ហាប្រឈមដែលសមាជិករបស់សមាគមជួបប្រទះ ជាពិសេសក្នុងការផ្ទៀងផ្ទាត់កម្មសិទ្ធិដីធ្លី និងឯកសារគតិយុត្តផ្សេងៗ។

លើសពីនេះ ប្រព័ន្ធនេះនឹងសម្រួលដល់ការធ្វើប្រតិបត្តិការឥណទានប្រកបដោយទំនុកចិត្ត ដែលផ្តល់អត្ថប្រយោជន៍ដល់ប្រជាពល​រដ្ឋខ្មែរ និងសេដ្ឋកិច្ចកម្ពុជាទាំងមូល។ មិនតែប៉ុណ្ណោះ សមិទ្ធផលនេះជាទំនើបកម្មថ្មីមួយរបស់ក្រសួងរៀបចំដែនដី នគរូបនីយកម្ម និងសំណង់ ក្នុងដំណើរឆ្ពោះទៅកាន់បរិវត្តកម្មឌីជីថល ដែលជាចក្ខុវិស័យរបស់រាជរដ្ឋាភិបាលកម្ពុជាអណាត្តិទី៧ នៃរដ្ឋសភា៕