សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្នុងមួយទសវត្សរ៍កន្លងមកនេះ និយ័តករមូលបត្រកម្ពុជា ដែលជាអាជ្ញាធរគ្រប់គ្រង ត្រួតពិនិត្យ និងអភិវឌ្ឍទីផ្សារមូលបត្រនោះ បានយកចិត្តទុកដាក់ក្នុងការចាប់ផ្តើមពីចំណុចសូន្យ ហើយសព្វថ្ងៃនេះមានក្រុមហ៊ុនចំនួន២៣បានបោះផ្សាយលក់មូលបត្រ និងចុះបញ្ជីទីផ្សារ។ ក្រុមហ៊ុនចំនួន២៣នេះ ប្រមូលបានសាច់ប្រាក់សរុប ៣៨៩លានដុល្លារ។ នេះបើតាមការឱ្យដឹងពីឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា។
ក្នុងពិធីចុះហត្ថលេខាជាមួយសាកលវិទ្យាល័យពាណិជ្ជសាស្ត្រ អេស៊ីលីដា លើអនុស្សរណៈនៃការយោគយល់គ្នាស្តីពី“កិច្ចសហប្រតិបត្តិការលើកកម្ពស់ការយល់ដឹង និងការអភិវឌ្ឍធនធានមនុស្សនៅក្នុងវិស័យមូលបត្រនៅព្រះរាជាណាចក្រកម្ពុជា” នាពេលថ្មីៗនេះ ឯកឧត្តម ស៊ូ សុជាតិ បានមានប្រសាសន៍ឱ្យដឹងថា៖ ក្នុងចំណោមក្រុមហ៊ុនទាំង២៣នេះ មានក្រុមហ៊ុនចំនួន១១បានបោះផ្សាយលក់មូលបត្រកម្មសិទ្ធិ និងចំនួន១២ បានបោះផ្សាយលក់សញ្ញាប័ណ្ណដែលជាមូលបត្របំណុលដោយក្នុងនោះរួមមានទាំងសញ្ញាណប័ណ្ណបៃតង និងសញ្ញាបណ្ណចីរភាព។
ឯកឧត្តមអគ្គនាយកនិយ័តករមូលបត្រកម្ពុជាបានលើកឡើងថា៖ នេះជាមោទនភាពមួយសម្រាប់ប្រទេសកម្ពុជា ថ្វីដ្បិតតែចាប់ផ្តើមទីផ្សារក្រោយគេ ជាទីផ្សារមួយតូច ក្មេងខ្ចី ប៉ុន្តែដំណើរការនៃការអភិវឌ្ឍវិស័យនេះគឺដើរទន្ទឹមនឹងនិន្នាការថ្នាក់តំបន់ និងនិន្នាការសាកលលោក ដែលគិតមកដល់ថ្ងៃនេះ និយ័តករកម្ពុជាបានផ្តល់អាជ្ញាប័ណ្ណនៃការអនុញ្ញាតការទទួលស្គាល់ដល់ក្រុមហ៊ុនធ្វើអាជីវកម្ម និងសេវាក្នុងវិស័យមូលបត្រសរុប១៣០ក្រុមហ៊ុន ។ គិតត្រឹមត្រីមាសទី ២ ឆ្នាំ២០២៤ ទំហំមូលធននីយកម្មទីផ្សារសរុបមានតម្លៃប្រហែល ១១,២២ប៊ីលានរៀល ឬប្រមាណ ២.៧៣ ពាន់លានដុល្លារ ស្មើនឹង៨.៧៥ភាគរយធៀបនឹងផលិតផលក្នុងស្រុកសរុប(GDP)។ ទំហំជួញដូរសរុបមានរហូតដល់ជាង១០លានភាគហ៊ុន និងតម្លៃនៃការជួញដូរមូលបត្រ សរុបមាន ១២.៩០ លានដុល្លារ ។ ទំហំជួញដូរប្រចាំថ្ងៃជាមធ្យមមានចំនួន ១៧៩ពាន់ភាគហ៊ុនក្នុង១ថ្ងៃ តម្លៃជួញដូរហ៊ុនប្រចាំថ្ងៃជាមធ្យមមានប្រហែលជាង ២១ម៉ឺនដុល្លារ ប៉ុន្តែកន្លងមកមានថ្ងៃខ្លះហក់ឡើងដល់ជាងកន្លះលានដុល្លារផងដែរ។
ឯកឧត្តម ស៊ូ សុជាតិ បានបញ្ជាក់ថា៖ ភាពរីកចម្រើននៃវិស័យមូលបត្រនេះ មិនមែនកើតចេញតែពីនិយ័តករមូលបត្រតែឯងនោះទេ ពោលគឺមានការចូលរួមពីគ្រប់តួអង្គពាក់ព័ន្ធទាំងអស់ ទាំងទីផ្សារ ប្រតិបត្តិករផ្ទាល់ អ្នកចូលរួមក្នុងទីផ្សារ ក្រុមហ៊ុន អ្នកទាក់ទងដោយផ្ទាល់ និងអ្នកធ្វើការផ្ទាល់ជាមួយអតិថិជន ដែលពួកគេជាអ្នកជំរុញធ្វើយ៉ាងណាឱ្យមានភាពសកម្មនៅលើទីផ្សារ៕
Account
Security
Favourite Content