ក្រូចពោធិ៍សាត់ ជាដំណាំក្រូចមួយប្រភេទដែលគេនិយមដាំ ជាពិសេសនៅក្នុងខេត្តបាត់ដំបង ប៉ុន្តែកសិករភាគច្រើនហាក់ធ្វើឡើងតាមទម្លាប់ ឬបែបប្រពៃណី ជាពិសេសខ្វះខាត់បច្ចេកទេសទាំងការថែទាំ និងការប្រមូលផល។ ខាងក្រោមនេះ ជាការបង្ហាញ និងផ្ទេរចំណេះដឹងផលិតកម្មដំណាំក្រូចពោធិ៍សាត់ដែលកសិករអាចឈ្វេងយល់ និងយកទៅអនុវត្តដើម្បីអាចបង្ករបង្កើនទិន្នផលបានកាន់តែច្រើន។

បើតាមឯកសារផ្សព្វផ្សាយរបស់ក្រសួងកសិកម្ម រុក្ខាប្រមាញ់ និងនេសាទ បានបង្ហាញពីចំណេះដឹង និងបច្ចេកទេសសំខាន់ៗក្នុងផលិតកម្មក្រូចពោធិ៍សាត់ ដូចជាការតាក់តែងមែក ការដាក់ជី ។ សម្រាប់ការតាក់តែងមែក គោលការណ៍ចម្បងគឺការសម្អាតដើម ឬមែកដែលចាស់ងាប់ៗ កាត់បន្ថយជម្រករបស់ពពួកជំងឺ សត្វល្អិតចង្រៃ និងកត្តាបង្កផ្សេងៗដើម្បីឱ្យដើមក្រូចស្រឡះល្អមានពន្លឺ និងខ្យល់ចេញចូលគ្រប់គ្រាន់ ថែមទាំងអាចជួយគ្រប់គ្រងកម្ពស់ដំណាំចៀសវាងការប្រើប្រាស់ជី និងថ្នាំពុលកសិកម្មច្រើន។

មួយវិញទៀត ការដាក់ជី និងការជំរុញត្រួយថ្មី ក៏ត្រូវបានអនុវត្តបន្ទាប់ពីការកាត់តែងដើមរួចរាល់ ដោយការដាក់ទឹកក៏ជាកត្តាចាំបាច់មួយដើម្បីឱ្យត្រួយថ្មីលាស់បានព្រមគ្នាល្អ ឯផ្កាក៏ចាប់ផ្ដើមលូតលាស់តាមត្រួយនីមួយៗដែរ។ ហេតុនេះការដាក់ជីសរីរាង្គ និងសារធាតុរ៉ែ ជារឿងចាំបាច់ត្រូវអនុវត្ត ដោយរួមទាំងការសម្អាតស្មៅក្រោមដើម​ ក៏ដូចជាការពារមិនឱ្យស្មៅលាស់សារជាថ្មី។

សម្រាប់ការប្រើជីគីមី អ្នកជំនាញណែនាំឱ្យកសិករលាយល្បាយជីគីមីតាមរូបមន្ត ១៣-១៣-២១ ដោយមានល្បាយ៣ប្រភេទរួមគ្នាគឺ ដេអាប៉េ(១៨-៤៦-០) ជីអ៊ុយរ៉េ(៤៦-០-០) និងជីប៉ូតាស្យូម (០-០-៦០) ដោយការប្រើប្រាស់ជីផ្សំបានត្រឹមត្រូវគឺអាចកាត់បន្ថយការចំណាយបាន ២០ភាគរយផងដែរ។

បន្ថែមពីលើនេះ ការថែរក្សា និងបំប៉នដើមកំឡុងពេលចេញផ្កា និងជំរុញការវិវត្តរបស់ផ្លែក៏ជារឿងដែលកសិករគួរយកចិត្តទុកដែរ ដោយគេអាចដាក់ជី ៤លើក និងដាក់ទឹកឱ្យបានគ្រប់គ្រាន់ ហើយរូបមន្តជី គេអាចប្រើ ១៥-១៥-១៥ ប្រមាណ ០.៣-០.៥គីឡូក្រាមក្នុងមួយដើម ជារៀងរាល់ខែចំនួន ៣លើក និងមុនពេលប្រមូលផល២ខែ ក្នុងរូបមន្ត ១៣-១៣-២១ ចំនួន ០.៥-១គីឡូក្រាមក្នុងមួយដើម។  

ទន្ទឹមគ្នានេះដែរ គេក៏ត្រូវគ្រប់គ្រងកត្តាចង្រៃដូចជាសត្វល្អិត និងជំងឺ ដែលអាចកើតមានឡើងចំពោះដំណាំក្រូចពោធិ៍សាត់ រួមមានដូចជាសត្វមមាចលម្អង ទ្រីប ចៃក្រមួនក្រហម ឬចៃម្សៅបៃតង ដង្កូវផែនទី មេអំបៅចុចបឺតផ្លែក្រូច និងជំងឺដូចជាជំងឺស្លឹកបាក់ ឬស្លឹកលឿង ជំងឺរលួយឬស/គល់ ជំងឺដំបៅ ជំងឺត្រីសតេសា និងជំងឺមេឡាណូសជាដើម។

ពាក់ព័ន្ធនឹងការស្រោចស្រព កសិករត្រូវស្រោចទឹកយ៉ាងហោច ២សប្ដាហ៍ម្ដងនៅរដូវប្រាំង ដោយប្រព័ន្ធស្រោចស្រពនេះផងដែរគេត្រូវរៀបចំឱ្យបានត្រឹមត្រូវចៀសវាងចំណាយច្រើន និងឱ្យផលមកសមប្រកប ដោយប្រព័ន្ធស្រោចស្រព មីនីស្ពីងក្លឺ( mini sprinkler) អាចជួយសន្សំសំចៃទឹក និងកម្លាំងពលកម្មបើប្រៀបធៀបនឹងការស្រោចស្រពបែបប្រពៃណី។ ចុងក្រោយគឺការប្រមូលផល ដោយជម្រើសគុណភាពដែលល្អបំផុតក្នុងការប្រមូលក្រូចពោធិ៍សាត់ គឺកម្រិតជាតិស្ករ ៩ភាគរយ (TSS 9%) តែក្នុងនោះសម្រាប់ចំការគំរូដែលបានអនុវត្តតាមបច្ចេកទេសអាចផ្ដល់នូវទិន្នផលដល់ទៅ ១១-១៣ភាគរយនៃកម្រិតជាតិស្ករ ដែលមានកម្រិតលើសចំការធម្មតាផងដែរ៕