ភ្នំពេញ ៖  ស្របពេលបុណ្យចូលឆ្នាំប្រពៃណីខ្មែរកាន់តែជិតចូលមកដល់ ប្រជាសហគមន៍ជាច្រើនគ្រួសារបានទទួលផលពីផ្លែឈើព្រៃ និងបានចាប់ផ្តើមប្រមូលផលហើយពេលនេះ ដោយអនុផលពីព្រៃឈើ ទាំងនោះរួមមាន ផ្លែគុយ ផ្លែសិរមាន់ ផ្លែភ្ញៀវ និងផ្លែឈើព្រៃមួយចំនួនទៀត ដែលមានផ្តល់ផលនៅក្នុងតំបន់រមណីយដ្ឋានអង្គរ  និងនៅតាមសហគមន៍ព្រៃឈើ និងទេសចរណ៍ តាមបណ្តាខេត្តមួយចំនួនផងដែរ។

អនុផលទាំងនោះសុទ្ធសឹងជា ផ្លែឈើព្រៃ ដែលបានផ្តល់ជាចំណូលបន្ថែម សម្រាប់ប្រជាពលរដ្ឋរស់នៅតាម បណ្តាខេត្តមួយចំនួន និងពលរដ្ឋនៅក្នុងតំបន់អង្គរនៃខេត្តសៀមរាប។

ជាក់ស្ដែង ប្រជាពលរដ្ឋរស់នៅក្នុងរមណីយដ្ឋានអង្គរ បានចាប់ផ្តើមប្រមូលផលផ្លែឈើព្រៃ នៅតំបន់ជុំវិញបរិវេណ អង្គរ យកទៅលក់ដូរ នៅតាមផ្លូវក្បែរប្រាសាទនៅតាមផ្លូវប្រាសាទអង្គរវត្ត និងតាមផ្លូវកូម៉ៃជាដើម ដែលអ្នកទេសចរណ៍ឃើញហើយ ក៏នឹកភ្នកថា រដូវចូលឆ្នាំកំពុងតែឈានចូលមកដល់ ជាពិសេសឆ្នាំនេះ ក៏នឹងប្រព្រឹត្តិទៅស្របជាមួយនឹងពិធីគម្រប់ខួបទី ១០ នៃអង្គរសង្ក្រាន្តផងដែរ។

អ្នកស្រី សំរិត ហេង រស់នៅ ខេត្តសៀមរាប បានប្រាប់  AMS  កាលពីថ្ងៃទី ៧ ខែមេសា ឆ្នាំ២០២៣ ថា អ្នកស្រីលក់ផ្លែឈើចម្រុះ ៥-៦ ឆ្នាំមកហើយ ហើយរដូវនេះ ផ្លែឈើដែលអ្នកស្រីមានលក់ច្រើនជាងគេ គឺផ្លែគុយ សិរមាន់ និងផ្លែភ្ញៀវជាដើម។

អ្នកស្រីបានប្រាប់ថា ៖

“ឆ្នាំនេះផ្លែឈើព្រៃ ដូចជា គុយ លក់បានតម្លៃសមរម្យ ក្នុង ១ គីឡូក្រាម លក់រាយតម្លៃ ២០,០០០ រៀល ទៅ ២៥០០០ រៀល ទិញចូលតម្លៃ ១៥០០០-១៧០០០រៀល។ ចំណែកផ្លែសិរមាន់ មិនទាន់ជាសម្បូរទេ ហើយលក់បានតម្លៃ ៧០០០ រៀល”

លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានប្រាប់ AMS ឱ្យដឹងថា ការទទួលផលពីអនុផលព្រៃឈើតំបន់រមណីយដ្ឋានអង្គរ ប្រជាពលរដ្ឋបានចាប់ផ្តើមលក់ប្រមាណជាងពីរ-បីសប្តាហ៍មកហើយ ហើយគាត់លក់ឱ្យទីផ្សារបានថ្លៃទៀតផង។ លោកបញ្ជាក់ថា អ្នកលក់អនុផលព្រៃឈើដទៃទៀត រស់ក្នុងក្រុង-ខេត្តសៀមរាប ក៏កំពុងមមាញឹកក្នុងការលក់ផ្លែឈើទាំងកញ្ច្រែង និងចងភ្ជួរជាចង្កោមៗ នៅតាមផ្លូវក្នុងតំបន់អង្គរ ដើម្បីទាក់ទាញអ្នកទិញជាភ្ញៀវទេសចរណ៍។

លោក ទា គឹមសុទ្ធ បានមានប្រសាសន៍ថា ៖

“ខ្ញុំបានទិញផ្ញើទៅមិត្តភ័ក្តិ ផ្លែគុយតម្លៃ ១ គីឡូ ២៥០០០ រៀល។ សម្រាប់ផ្លែគុយ និងផ្លែសិរមាន់ ជាផ្លែឈើព្រៃប្រចាំរដូវនេះ ហើយអតិថិជនចូលចិត្តទិញពិសាណាស់ ពិសេសអ្នកទេសចរមកពីចម្ងាយតែម្តង”

លោកប្រធានមន្ទីរកសិកម្ម បានបញ្ជាក់ថា ផ្លែគុយ ផ្លែសិរមាន់ និងអនុផលព្រៃឈើដទៃទៀត គឺជាប្រភេទ ផ្លែឈើ ព្រៃម្យ៉ាងដែលមានរសជាតិជូរលាយផ្អែម មានសម្បុរពណ៌លឿង និងអាចស្វែងរកទិញទទួលទានបាននៅតាមដង  ផ្លូវជាតិសំខាន់ៗ ជាពិសេសនៅតាមផ្លូវក្នុងរមណីយដ្ឋានអង្គរ ខេត្តសៀមរាប ដែលប្រជាជននៅក្នុងតំបន់បានបេះយកមកលក់ ហើយអនុផលព្រៃឈើនេះក៏បានជួយបង្កើនចំណូល សម្រាលដល់ជីវភាពរបស់ប្រជាពលរដ្ឋមួយផ្នែកធំ។

រុក្ខជាតិ«គុយ»ឯណោះវិញ ជាលតាជាតិមួយប្រភេទដែលដុះតោងដើមឈើធំៗ ក្នុងព្រៃក្រាស់ ដែលមានប្រវែងរហូតដល់ ៣០ ម៉ែត្រ ដោយដើមមានសណ្ឋានជាឈើធំជាងលតាជាតិដទៃទៀត ជារុក្ខជាតិស្ទើរគ្មានស្លឹក សំបក ដើម មានសភាពរលោង និងមានពណ៌ត្នោត ផ្នែកនីមួយៗនៃដើមមានជ័រពណ៌សដូចទឹកដោះគោ ច្រើនមានដុះនៅ ក្នុងព្រៃធំ ព្រៃស្រោង ព្រៃស្បាត និងព្រៃរបោះតាមចម្រាក់ភ្នំ។ ផ្កាគុយរីកនៅខែកុម្ភៈ ដល់ ខែមីនា ហើយឱ្យផលពីចុងខែមីនា រហូតដល់ខែឧសភា-មិថុនា (ខែធ្លាក់ទឹកភ្លៀង) ។ ផ្លែគុយជាផលផ្លែមានសាច់ជោ និងគ្រាប់ផ្លែមានរាងមូល ឬរាងពងក្រពើ សំបកក្រាស់មានទំហំជាមធ្យម ៥.៨ ទៅ ៧.២ ស.ម សាច់ផ្លែមានជាតិទឹកច្រើន សំបកមានជ័រស្អិត មានគ្រាប់វែង ទំហំប្រហែល ០.៨-១.២ ស.ម។

ដោយឡែកតាមរយៈក្រសួងបរិស្ថាន  លោក ឡុង  ណេត ជាអនុប្រធានសហគមន៍ភ្នំទព័ជាង ស្ថិតនៅភូមិព្រះអង្គកែវ និងភូមិបាក់អង្រុត ឃុំដងពែង ស្រុកស្រែអំបិល ខេត្តកោះកុងបានរៀបរាប់ថា សហគមន៍លោកមានសមាជិក ចំនួនប្រមាណជាង ១៧ គ្រួសារ ដែលមានមុខរបររកអនុផលព្រៃឈើ ក្នុងនោះមាន ១៣ គ្រួសារ ប្រមូលផ្លែគុយនិងក៏មានផ្លែសិរមាន់ផងដែរ។

លោក ឡុង ណេត បានមានប្រសាសន៍ថា ៖

“ការប្រមូលផលផ្លែគុយអាចទទួលបានក្នុង ១ គ្រួសារ ប្រមាណ ៧គីឡូក្នុង ១ ថ្ងៃ លក់បានប្រមាណ ១ គីឡូ ពី ១៣០០០ រៀល ទៅ ១៧០០០ រៀល សម្រាប់ការបោះដុំ”

លោក ឡុង  ណេត អនុប្រធានសហគមន៍ភ្នំទព័ជាងរូបនេះ បានបញ្ជាក់ដែរថា ក្នុងមួយរដូវសរុបទាំងអស់គ្នាមិនជាច្រើនប៉ុន្មានទេ តែក្រៅការប្រមូលអនុផលផ្លែឈើទាំងនេះហើយ ពលរដ្ឋសហគមន៍ក៏មានអនុផលផ្សិត ពីរទៅបីមុខផ្សេងទៀត ដែលអាចជួយសម្រួលដល់ជីវភាពរបស់អ្នកស្រុក ក្រៅពីរបរកសិកម្ម និងចិញ្ចឹមសត្វ៕