ភ្នំពេញ ៖ អាចនិយាយបានថា ជាការច្នៃប្រឌិតនៅក្នុងការធ្វើអាជីវកម្មបែបសហគ្រាសខ្នាតតូចក្នុងស្រុកដោយការបង្កើតជាមុខម្ហូបចម្អិនរួចរាល់ស្រាប់រក្សាទុកនៅក្នុងកែវបិទជិតដាក់លក់នៅលើទីផ្សារ ជាពិសេស ដើម្បីតម្រូវតាមការចង់បានរបស់អ្នកដែលមិនសូវមានពេលគ្រប់គ្រាន់ក្នុងការចម្អិនម្ហូបអាហារដោយខ្លួនឯង។ ក្នុងចំណោមមុខម្ហូបចម្អិនស្រាប់ទាំងនោះ ប្រហុកខ្ទិះអនាម័យ ជ្រកក្រោមយីហោ «ម្លិះ វិសាល» កំពុងបង្ហាញខ្លួននៅលើទីផ្សារ និងទទួលបានការគាំទ្រគួរឱ្យកត់សម្គាល់។

លោក ឡាយ សុវិសារ ជាស្ថាបនិករបស់អាជីវកម្មប្រហុកខ្ទិះអនាម័យ យីហោ «ម្លិះ វិសាល» ដែលមានទីតាំងស្ថិតនៅភូមិសាលាបាឡាត់ សង្កាត់អូម៉ាល ក្រុងបាត់ដំបង ខេត្តបាត់ដំបង បានប្រាប់ AMS Economy ឱ្យដឹងថា ៖ អាជីវកម្មកែច្នៃ និងបង្កើតជាមុខម្ហូបចម្អិនស្រាប់ដែលអាចទទួលទានបានភ្លាមៗនេះ ប្រហុកខ្ទិះអនាម័យ «ម្លិះ វិសាល» ត្រូវបានបង្កើតឡើងតាំងពីមុនពេលរីករាលដាលនៃជំងឺកូវីដ-១៩មកម្ល៉េះ ប៉ុន្តែគ្រានោះហាក់មិនសូវទទួលបានការគាំទ្រច្រើននោះទេ។ ប៉ុន្តែ រហូតមកដល់បច្ចុប្បន្ន ការលក់មានការកើនឡើង ទាំងការបញ្ជាទិញតាមអនឡាញ ទាំងការដាក់លក់នៅតាមបណ្តាទីផ្សារនានា ខណៈដែលអតិថិជនមួយចំនួនបានស្គាល់រួចទៅហើយ។

លោកបន្តថា ដោយឡែក សម្រាប់ក្នុងឱកាសនៃពិធីបុណ្យភ្ជុំបិណ្ឌនេះ ប្រហុកខ្ទិះអនាម័យ «ម្លិះ វិសាល» អាចជាមុខម្ហូបដែលផ្តល់ភាពងាយស្រួលសម្រាប់អ្នកដែលចង់ធ្វើចង្ហាន់យកទៅប្រគេនព្រះសង្ឃ ប៉ុន្តែគ្មានពេលវេលាគ្រប់គ្រាន់ក្នុងការចម្អិន។ ពោល គឺគ្រាន់តែទិញ និងរៀបចំប្រភេទបន្លែជាគ្រឿងផ្ទាប់ដាក់អមជាមួយប្រហុកខ្ទិះអនាម័យ ម្លិះ វិសាល ជាការស្រេច ត្បិតប្រហុកអនាម័យនេះត្រូវបានចម្អិន និងរក្សាទុកនៅក្នុងកែវបិទជិតយ៉ាងស្រស់ស្អាតរួចជាស្រេច។

លោក ឡាយ សុវិសារ បញ្ជាក់ថា ៖

«ប្រហុកខ្ទិះនេះ គឺបងប្អូនអាចញ៉ាំជាមួយនំប៉័ងក៏បាន ដោយសារផលិតផលប្រហុកខ្ទិះនេះមិនសូវធុំក្លិនប្រហុកខ្លាំងនោះទេ ពោលគឺអ្នកទទួលទានអាចទទួលទានបានពេញមាត់ ហើយថែមទាំងមានក្លិនឈ្ងុយ។ ម៉្យាងទៀត បើទទួលទានជាមួយនឹងបន្លែស្រស់ៗ ស្រួយៗ គឺកាន់តែឆ្ងាញ់ ខណៈដែលប្រហុកខ្ទិះអនាម័យនេះអាចរក្សាទុកបានយូររហូតដល់៣សប្ដាហ៍ ប៉ុន្តែបើរក្សាទុកក្នុងទូរទឹកកកវិញ អាចបានដល់ទៅរាប់ខែ»។

ពាក់ព័ន្ធទៅនឹងតម្លៃដែលកំពុងដាក់លក់នៅលើទីផ្សារ ប្រហុកខ្ទិះនេះមួយកែវមានតម្លៃ ១៧០០០រៀល (ចំណុះ ២៥០ក្រាម) ខណៈដែលអតិថិជនគាំទ្រភាគច្រើនជាអ្នករស់នៅក្នុងខេត្តបាត់ដំបង និងក្នុងរាជធានីភ្នំពេញ។

យ៉ាងណាក៏ដោយ ចំពោះបច្ចេកទេស និងវិធីផលិតវិញត្រូវបានលោក ឡាយ សុវិសារ បង្ហើបឱ្យដឹងថា ការផលិតគឺមានដំណាក់កាលខុសគ្នា ដូចជាការជ្រើសរើស និងរៀបចំវត្ថុធាតុដើមរួមមានដូចជា ប្រហុកសាច់ សាច់ជ្រូក៣ជាន់ ម្ទេសក្រៀម ស្លឹកក្រូចសើច ខ្ទិះដូង គល់ស្លឹកគ្រៃ ល្មៀត រំដេង ខ្ទឹមស ស្ករ ប្រេងឆា ជាដើម។ បន្ទាប់ពីជ្រើសរើសយកវុត្ថុធាតុដើមដែលមានគុណភាពល្អរួចហើយ ត្រូវយកសាច់ជ្រូក៣ជាន់, ប្រហុកសាច់ និងគ្រឿងផ្សំផ្សេងទៀតចិញ្ច្រាំចូលគ្នា, ពូតខ្ទិះដូង ដាក់ប្របល់ឱ្យសព្វ ទើបចាប់ផ្ដើមចម្អិនដោយឆាគ្រឿងទាំងអស់ចូលគ្នារហូតដល់ស្ងួតទឹក និងឆ្អិនល្អ ហើយទុកឱ្យត្រជាក់ ទើបអាចធ្វើការវេចខ្ចប់ដាក់ចូលក្នុងកែវឱ្យបានត្រឹមត្រូវ។

ជាមួយនឹងការរៀបរាប់ខាងលើនេះ លោក ឡាយ វិសាល ក៏សូមថ្លែងអំណរគុណដល់អតិថិជនទាំងអស់ដែលគាំទ្រប្រហុកខ្ទិះអនាម័យ «ម្លិះ វិសាល» ហើយរូបលោកផ្ទាល់នឹងព្យាយាមស្វែងរកមុខម្ហូបថ្មីៗដែលអាចរៀបចំចម្អិនរួចរាល់ និងរក្សាទុកបានយូរសម្រាប់បំពេញតម្រូវការអ្នកដែលចង់ទទួលទានម្ហូបអាហារដែលមានរសជាតិឆ្ងាញ់ និងមិនចំណាយពេលក្នុងការចម្អិនដោយខ្លួនឯង៕