សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សណ្ដែកផ្កាយ ដែលគេស្គាល់ជាសកលថា Sacha inchi ជាដំណាំដែលមានប្រភពមកពីព្រៃទឹកភ្លៀង អាម៉ាហ្សូន។ ក្នុងនោះ ប្រទេសប៉េរ៉ូ និងផ្នែកពាយព្យនៃប្រទេសប្រេហ្សីល ជាតំបន់ដែលមានដាំដំណាំសណ្ដែកផ្កាយនេះច្រើនជាងគេ។
សណ្ដែកផ្កាយនេះ ជាប្រភេទដំណាំដែលដែលសម្បូរប្រូតេអ៊ីន និងដែលគេអាចកៀបគ្រាប់របស់វាយកប្រេងទៅប្រើប្រាស់ ដើម្បីជាជំនួយសុខភាពបានទៀតផង។
ដោយទាមទារលក្ខខណ្ឌអាកាសធាតុត្រជាក់ និងសើមជាប់ជានិច្ច នៅកម្ពុជាមិនសូវជាមានអ្នកដាំទូលំទូលាយនោះទេ ដោយភាគច្រើនគេឃើញមានប្រជាជននៅខេត្តមណ្ឌលគិរី រតនៈគិរី បាត់ដំបង និងពោធិ៍ សាត់ ជាអ្នកដាំ។ បើទោះជាយ៉ាងនេះក្ដី ការដាំរបស់ប្រជាពលរដ្ឋនៅខេត្តឆ្ងាយៗទាំងនោះធ្វើឡើងក្នុងទ្រង់ទ្រាយតូច ពោលគឺដាំដុះជាលក្ខណៈគ្រួសារនៅឡើយ។ ម្លោះហើយ សម្រាប់សិប្បកម្មកែច្នៃ ឬក្រុមហ៊ុនណាដែលមានបំណងចង់ទិញក្នុងទំហំធំ តែងតែជួបផលលំបាកក្នុងការស្វែងរកវត្ថុធាតុដើម។
បើតាមលោក ម៉ៅ ចាន់តារា ដែលជាម្ចាស់សិប្បកម្មកែច្នៃប្រេងសណ្ដែកផ្កាយបានឱ្យដឹងថា កន្លងមក សិប្បកម្មរបស់លោកជួបនូវការលំបាកក្នុងការស្វែងរកវត្ថុធាតុដើមយកមកផលិតជាប្រេង ដោយសារតែមិនសូវមានអ្នកដាំ។ មិនត្រឹមតែប៉ុណ្ណោះ តម្លៃរបស់សណ្ដែកផ្កាយនេះក៏ថ្លៃផងដែរ ដោយមួយគីឡូថ្លៃ ៤៥០០០រៀល ហើយដើម្បីកិនបានប្រេង១លីត្រ គឺត្រូវចំណាយគ្រាប់សណ្ដែកផ្កាយអស់៣គីឡូឯណោះ។
យោងតាមការឱ្យដឹងពីម្ចាស់សិប្បកម្មរូបនេះ លោកក៏ធ្លាប់សាកល្បងដាំដំណាំនេះដែរ ប៉ុន្តែដោយសារតែមិនមានពេលវេលាគ្រប់គ្រាន់ក្នុងការនៅមើលថែ ទើបលោកសុខចិត្តដើររកទិញពីកសិករវិញ។
តាមបទពិសោធន៍របស់លោក ដំណាំសណ្ដែកផ្កាយនេះ មិនជាពិបាកក្នុងការដាំពេកទេ។ ដោយវាជាប្រភេទដំណាំវល្លិ៍ វាត្រូវការការមើលថែបន្តិចក្នុងរយៈពេល១ ទៅ២ខែដំបូង ប៉ុន្តែបន្ទាប់ពីនោះទៅ គឺចាំតែប្រមូលផលយកតែម្ដង។
ដំណាំនេះនឹងចេញផ្កានៅអាយុ ៥ខែ ហើយចេញផ្លែនៅអាយុ៨ខែ រីឯការប្រមូលផលគឺវិលជុំខួបប្រាំង ខួបវស្សាតែម្ដង។
លោក ម៉ៅ ចាន់តារា បានបន្ថែមទៀតថា មូលហេតុដែលនាំឱ្យគ្រាប់សណ្ដែកផ្កាយនេះមានតម្លៃថ្លៃ ក៏ព្រោះថា គ្រាប់ពូជរបស់វាដែលទិញចូលមានតម្លៃថ្លៃរួចទៅហើយ ម្យ៉ាងទៀត ក៏ដោយសារអត្ថប្រយោជន៍ដ៏ច្រើនលើសលប់របស់វាជួយបំប៉នសុខភាពដល់អ្នកបរិភោគ។
លោកបានបញ្ជាក់ឱ្យដឹងថា លោកចង់ឃើញកសិករខ្មែរបន្ថែមការដាំដំណាំប្រភេទនេះឱ្យបានកាន់តែច្រើនថែមទៀត ដើម្បីងាយស្រួលដល់បណ្ដាអ្នកកែច្នៃបន្ត ហើយប្រសិនបើមានការដាំដំណាំសណ្ដែកផ្កាយនេះបានច្រើន តម្លៃវត្ថុធាតុដើមក៏អាចនឹងធ្លាក់ចុះផងដែរ ដែលវានឹងធ្វើឱ្យតម្លៃប្រេងដែលលក់ចេញក៏មិនសូវថ្លៃពេកដែរ។
គួរបញ្ជាក់ថា សណ្ដែកផ្កាយមានអត្ថប្រយោជន៍ចំពោះសុខភាពយ៉ាងប្រសើរដូចជា ធ្វើឱ្យប្រសើរឡើងនូវការរំលាយអាហារ ជួយក្នុងការសម្រកទម្ងន់ គ្រប់គ្រងជំងឺទឹកនោមផ្អែម រំញោចការយល់ដឹង និងបំបាត់ការរលាក ថែរក្សាស្បែក ជួយថែទាំសសៃសក់ បញ្ចុះសម្ពាធឈាម កាត់បន្ថយកូឡេស្តេរ៉ុលអាក្រក់ ដោះស្រាយបញ្ហាដំណេក និងជួយបង្កើនសុខភាពភ្នែកជាដើម៕
Account
Security
Favourite Content