សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងឱកាសពិធីបុណ្យចូលឆ្នាំប្រពៃណីជនជាតិចិន-វៀតណាមនេះ សម្រាប់បងប្អូនដែលមានជាប់សែស្រឡាយចិន -ចិន ក៏ដូចជាមានជំនឿ និងប្រកាន់ខ្ជាប់ទំនៀមទម្លាប់ក្នុងការសែនព្រេនដោយខានពុំបាន ដែលធ្វើឱ្យអាជីវកម្មមួយចំនួនទាក់ទងនឹងការប្រារព្ធពិធីនេះហាក់មានភាពមមាញឹក កាក់កបជាខ្លាំង។
សម្រាប់ពិធីសែនចូលឆ្នាំប្រពៃណីចិន គេតែងមានដាក់សែននូវនំចំណី ម្ហូបអាហារ ដែលគេមិនអាចខ្វះបាននោះទេនូវជ្រូកខ្វៃ និងទាខ្វៃ ដែលគេមានជំនឿថា ជ្រូកខ្វៃតំណាងឱ្យសន្តិភាព និងក្តីសុខសុភមង្គល ឯទាខ្វៃតំណាងឱ្យភាពស្មោះត្រង់ផងដែរ។ ហេតុនេះហើយទើបធ្វើឱ្យមុខរបរលក់ជ្រូកខ្វៃ ទាខ្វៃកំពុងមមាញឹកក្នុងការទទួលកម្ម៉ង់សម្រាប់ថ្ងៃសែនផ្ទាល់តែម្ដង។
ក្រៅពីជ្រូក និងទា ដូចដែលបានលើកឡើងខាងលើនេះ សាច់មាន់ ក៏មានតម្រូវការខ្ពស់ផងដែរ ដោយសារគេតែងស្ងោរមាន់ទាំងមូលសម្រាប់សែន ជាពិសេស ត្រូវរក្សាក្បាលមាន់ និងក្រញ៉ាំជើងមាន់ឱ្យបានល្អ ព្រោះមាន់ទាំងមូលត្រូវបានគេតំណាងឱ្យក្រុមគ្រួសារ ការជួបជុំគ្នា និងការផ្តល់កំណើតថ្មី ដោយជំនឿពីបុរាណគេជឿថា មាន់មួយក្បាលគឺជាអាហារដ៏ល្អសម្បូរប្រូតេអ៊ីន និងអាចចិញ្ចឹមជីវិតសមាជិកគ្រួសារទាំងមូលផងដែរ។
ពាក់ព័ន្ធម្ហូបអាហារសែននេះដែរ សម្ទុះនៃការលក់មីក៏មានការកើនឡើងខ្លាំង ពោលគឺកើនឡើងដល់ទៅពាក់កណ្ដាលនៃការលក់ធម្មតា ដោយសារតែ មីឆា ជាមុខម្ហូបដែលគេនិយមចម្អិនសម្រាប់សែន និងទទួលទាននៅក្នុងពិធីត្បិតគេមានជំនឿថា ការធ្វើបែបនេះអាចនាំមកនូវសេចក្ដីសុខចម្រើន មានអាយុវែង ជាពិសេសមានទ្រព្យដូចជាមាសជាដើមហូរចូលច្រើន ព្រោះសរសៃមីមានពណ៌ស្រដៀងគ្នាទៅនឹងមាស។ ក្រៅពីការចម្អិនមី ជាអាហារចម្បងសម្រាប់ថ្ងៃចូលឆ្នាំ តំបន់ខ្លះតែងតែចម្អិនមី ជាមួយនឹងគាវ ដោយសរសៃមីពណ៌លឿងត្រូវបានគេតំណាងជាសរសៃសូត្រមាស ហើយគាវតំណាងឱ្យគ្រឿងតុបតែង ឬដុំមាស ដែលទាំងនេះបញ្ជាក់ថាវាជាម្ហូបដែលជូនពរឱ្យនាំមកនូវលាភសំណាង និងទ្រព្យសម្បត្តិហូរចូលផងដែរ។
ដោយឡែក គ្រឿងរណ្ដាប់ក្នុងការសែនគេក៏ត្រូវការក្រដាសសែនដោយខានពុំបាន ដែលធ្វើឱ្យអាជីវករអាចលក់ក្រដាសសែនបានច្រើនក្នុងកំឡុងពេលត្រៀមសែនចូលឆ្នាំប្រពៃណីចិន-វៀតណាមនេះ។ ជាមួយគ្នានេះ សម្រាប់អាជីវកម្មលក់គ្រឿងតុបតែងផ្ទះ និងដើមផ្កាក៏មានការកើនឡើងដូចគ្នា ព្រោះគេនិយមរៀបចំតុបតែងផ្ទះ ដែលមានបិតក្រដាសជូនពរឆ្នាំថ្មី គោមក្រហម ដែលបិតតាមជញ្ជាំងតាំងលម្អក្នុងផ្ទះ ហើយប្រជាជនចិនក៏ដូចជាប្រជាជនកម្ពុជា ដែលកាត់សែស្រឡាយចិនខ្លះទៀតក៏មានលម្អផ្ទះសម្បែងរបស់ខ្លួន ដោយដើមរុក្ខជាតិ ដូចជាដើមសេដា ដើមផ្កាស្បៃរឿង ដើមក្រូចឃ្វិច ពិសេសដើមផ្កាអង្គាសីល ព្រោះថាពួកគេបាន ចាត់ទុកផ្កាប្រភេទនេះថាជាផ្កាតំណាងឱ្យរដូវផ្ការីកដ៏ស្រស់ស្អាត និងជាផ្កានាំមកនូវភាពត្រជាក់ត្រជុំ ភាពស្រស់បំព្រង ភាពរីករាយ ភាពរីកចម្រើនរុងរឿង និងតំណាងជោគជតារាសីផងដែរ៕
Account
Security
Favourite Content