សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នាយកដ្ឋានកសិ-ឧស្សាហកម្មនៃក្រសួងកសិកម្ម រុក្ខាប្រមាញ់ និងនេសាទ នឹងរៀបចំកម្មវិធីប្រឡងប្រជែងកែច្នៃគ្រាប់ស្វាយចន្ទីឆ្នើម ឆ្នាំ២០២៤ ដើម្បីលើកស្ទួយដល់ការកែច្នៃផលិតផលក្នុងស្រុក ជាពិសេសការកែច្នៃផលិតផលគ្រាប់ស្វាយចន្ទី។
កម្មវិធីប្រកួតនេះនឹងត្រូវរៀបចំឡើងជាពីរជុំ។ ជុំទីមួយ ធ្វើនៅថ្ងៃទី ០៩ និងទី ១០ ខែឧសភា ឆ្នាំ ២០២៤ នៅខេត្តសៀមរាប ហើយសម្រាប់ជុំទី២ នៅថ្ងៃទី ២៤ ខែឧសភា ឆ្នាំ២០២៤ នៅរាជធានីភ្នំពេញ។ សម្រាប់ជ័យលាភី គឺផ្ដល់ជូនពីលេខ ១ ដល់លេខ ៣ និងទទួលបានពានរង្វាន់ អមដោយប្រាក់រង្វាន់លើកទឹកចិត្ត។
នាយកដ្ឋានកសិ-ឧស្សាហកម្ម បានបញ្ជាក់ថា៖ កម្មវិធីប្រឡងនេះរៀបចំឡើងដើម្បីផ្សព្វផ្សាយ និងស្វែងរកសហគ្រិនកែច្នៃផលិតផលគ្រាប់ស្វាយចន្ទីឆ្នើមបំផុត និងជំរុញ និងលើកកម្ពស់ការអភិវឌ្ឍន៍វិស័យស្វាយចន្ទីតាមរយៈការអនុវត្តន៍ផលិតកម្មកសិកម្មតាមកិច្ចសន្យា បច្ចេកទេសកែច្នៃ គ្រាប់ស្វាយចន្ទី ការប្រកួតប្រជែងទីផ្សារ និងការបន្ថែមរសជាតិ លើផលិតផល គ្រាប់ស្វាយចន្ទី។
លោក អួន ស៊ីឡុត ប្រធានសមាគមស្វាយចន្ទីកម្ពុជា បានយល់ឃើញថា៖ កម្មវិធីនេះមានសារៈសំខាន់ក្នុងការលើកទឹកចិត្តដល់សហគ្រាសកែច្នៃក្នុងស្រុក ជាការដាស់តឿនដល់វិនិយោគគិនក្នុងស្រុកដែលមិនសូវចាប់អារម្មណ៍លើការកែច្នៃចន្ទី ហើយសហគ្រាសដែលចង់ចូលរួមគួរតែត្រៀមខ្លួនជាពិសេសគឺសុត្ថិភាពចំណីអាហារនិងសិល្បៈលក់លើទីផ្សារ។
លោក អួន ស៊ីឡុត បានប្រាប់ថា ការកែច្នៃគ្រាប់ស្វាយចន្ទីក្នុងស្រុកបច្ចុប្បន្នបានត្រឹមតែ១០% ខណៈ ៩០% នៃវត្ថុធាតុដើម ត្រូវបាននាំចេញទៅក្រៅ ហើយកម្មវីធីប្រកួតនេះ ជាការលើកកម្ពស់ផ្នែកកែច្នៃ និងទាក់ទាញវិនិយោគឱ្យសម្លឹងមើលការកែច្នៃក្នុងស្រុក។ ប្រសិនបើមានការកែច្នៃក្នុងស្រុក នឹងជួយផ្ដល់តម្លៃបន្ថែមដល់កសិករ ដោយមិនមានការក្រឡុកតម្លៃពីសំណាក់ឈ្មួញដូចសព្វថ្ងៃនេះទៀតទេ។
លោកបន្ថែមថា បច្ចុប្បន្នកម្ពុជាមានសហគ្រាសកែច្នៃគ្រាប់ស្វាយចន្ទីចំនួន ៤២សហគ្រាស ក្នុងនោះធុនមធ្យមចំនួន ៦ និងក្រៅពីនោះសុទ្ធតែជាធុនតូចលក្ខណៈគ្រួសារ។ ចំណុចសំខាន់មួយទៀត លោកចង់អំពាវនាវដល់អ្នកពាក់ព័ន្ធ ជាពិសេសធនាគារ គួរជួយបន្ថយអត្រាការប្រាក់ក្នុងលក្ខខណ្ឌមួយចំនួនដល់សហគ្រាស៕
Account
Security
Favourite Content