សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្រុមហ៊ុន S.S.R Co., Ltd. មានគម្រោងវិនិយោគទឹកប្រាក់ជាង២០លានដុល្លារអាម៉េរិក ដើម្បីបង្កើតផែស្ងួតមួយកន្លែង ស្ថិតនៅក្នុងឃុំក្របៅ ស្រុកកំចាយមារ ខេត្តព្រៃវែងលើទំហំដីប្រមាណ ១០ហិកតា។
ទាក់ទងនឹងគម្រោងវិនិយោគនេះ ឯកឧត្តម ជា វុទ្ធី អគ្គលេខាធិការគណៈកម្មការវិនិយោគកម្ពុជាកាលពីថ្ងៃទី២០ ខែវិច្ឆិកា ឆ្នាំ២០២៥ បានដឹកនាំគណៈកម្មការអន្តរក្រសួង និងស្ថាប័នពាក់ព័ន្ធចុះពិនិត្យទីតាំងស្នើសុំវិនិយោគបង្កើតផែស្ងួតរបស់ក្រុមហ៊ុន S.S.R Co., Ltd. នេះ។ ក្នុងដំណើរបេសកកម្មការងារនេះ មានវត្តមានចូលរួមពីតំណាងក្រសួងសាធារណការនិងដឹកជញ្ជូន, ក្រសួងបរិស្ថាន, ក្រសួងផែនការ, ក្រសួងរៀបចំដែនដី នគរូបនីយកម្ម និងសំណង់, អគ្គនាយកដ្ឋានគយ និងរដ្ឋាករកម្ពុជា និងតំណាងរដ្ឋបាលខេត្តព្រៃវែងផងដែរ។
ឯកឧត្តម ជា វុទ្ធី បានលើកឡើងថា៖
«គម្រោងវិនិយោគផែស្ងួតនេះនឹងចូលរួមចំណែកយ៉ាងសំខាន់គំាទ្រដល់សកម្មភាពដឹកជញ្ជូនទំនិញឆ្លងកាត់ព្រំដែននាពេលខាងមុខនៅច្រកទ្វារព្រំដែនអន្តរជាតិម៉ឺនជ័យ កម្ពុជា-វៀតណាម ព្រមទាំងបង្កើតការងារជាច្រើនកន្លែងសម្រាប់ប្រជាពលរដ្ឋនៅតំបន់នោះផងដែរ»។
ឯកឧត្តមអគ្គលេខាធិការគណៈកម្មការវិនិយោគកម្ពុជា បានបន្ថែមថា៖ គម្រោងផែស្ងួតនឹងមានការសាងសង់នូវហេដ្ឋារចនាសម្ព័ន្ធចាំបាច់ និងគំាទ្រនានា ដែលរួមមាន អគារការិយាល័យ អគារពាណិជ្ជកម្ម កន្លែងផ្លាស់ប្តូរទំនិញ ទីតាំងតម្កល់កុងតឺន័រ និងឃ្លាំងស្តុកទំនិញជាដើម។
ក្រៅពីការចុះពិនិត្យទីតាំងគម្រោងវិនិយោគ ឯកឧត្តមអគ្គលេខាធិការ ក៏បានចុះពិនិត្យមើលច្រកទ្វារព្រំដែនអន្តរជាតិ ម៉ឺនជ័យ កម្ពុជា-វៀតណាម ដើម្បីស្វែងយល់ពីទិដ្ឋភាពរួមនៃការវិវត្តរីកចម្រើននៅតំបន់នោះ និងបានជម្រាបជូនពីការត្រៀមលក្ខណៈរបស់គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជាក្នុងការចូលរួមធ្វើការជាមួយគ្រប់ភាគីពាក់ព័ន្ធ ពិសេសរដ្ឋបាលខេត្តព្រៃវែងក្នុងការផ្សព្វផ្សាយសក្តានុពលវិនិយោគរបស់តំបន់នេះជូនដល់វិនិយោគិនជាតិ និងអន្តរជាតិ។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានប្រាប់ AMS Economy នាព្រឹកថ្ងៃទី២១ ខែវិច្ឆិកា ឆ្នាំ២០២៥នេះថា ៖ សភាពាណិជ្ជកម្មកម្ពុជា តែងតែអំពាវនាវឱ្យមានការវិនិយោគលើកំពង់ផែ ព្រលានយន្តហោះ ផ្លូវគោក ផ្លូវទឹក និងផ្លូវដែក។ ដូច្នេះគម្រោងវិនិយោគផែស្ងួតនេះជារឿងមួយល្អប្រសើរណាស់ ព្រោះសម្រាប់ការដឹកជញ្ជូនទំនិញទៅកាន់ទីផ្សារអន្តរជាតិ និងក្នុងស្រុក ក៏ដូចជាតភ្ជាប់តាមច្រកផ្លូវសមុទ្រទៅប្រទេសវៀតណាម និងតភ្ជាប់ព្រែកជីកហ្វូណនតេជោ ។ ជាងនេះទៅទៀត មានសារៈសំខាន់សម្រាប់ការដឹកជញ្ជូនផលិតផលកសិកម្មកម្ពុជា ដែលកើនឡើងជារៀងរាល់ឆ្នាំ ដូចជា សណ្តែក ស្វាយចន្ទី ជាដើម។
ឧកញ៉ាបណ្ឌិត ស៊ិន ចន្ទី អគ្គនាយកក្រុមហ៊ុន ឡាញហល អេចប្រេស ខេមបូឌា និងជាសមាជិកទីប្រឹក្សានៃសភាពាណិជ្ជកម្មកម្ពុជា បានឱ្យ AMS Economy ដឹងថា៖ បច្ចុប្បន្ន មានផែស្ងួតជាង២០ហើយដែលកំពុងប្រតិបត្តិការនៅកម្ពុជា។ ផែស្ងួត ជាកន្លែងចាំបាច់ណាស់សម្រាប់រៀបចំទំនិញក្រៅពីកំពង់ផែទឹកធំចំនួន២របស់កម្ពុជា គឺកំពង់ផែស្វយ័តក្រុងព្រះសីហនុនិងកំពង់ផែស្វយ័តភ្នំពេញ ដែលគ្របដណ្តប់ការដឹកទំនិញជិត៨០ភាគរយ។
ឧកញ៉ាបណ្ឌិត ស៊ិន ចន្ទី បានបញ្ជាក់ថា៖
«ផែស្ងួតមានតួនាទីសំខាន់សម្រាប់រៀបចំទំនិញ ដូចជា ផ្ទេរ ខ្ចប់ទំនិញ និងការរៀបចំបែបបទផ្សេងៗ។ អ៊ីចឹងហើយ ការបង្កើតផែស្ងួតរបស់ក្រុមហ៊ុន S.S.R ជាការល្អ និងសំខាន់សម្រាប់ផ្ទុកទំនិញនិង ការដឹកទំនិញឆ្លងកាត់ព្រំដែននិងបន្តទៅផែទឹក។យើងមិនអាចផ្ទុកទំនិញនៅផែទឹកបានច្រើនពេកនោះទេ ដូច្នេះផែស្ងួតនឹងជួយសម្រួលការងារនេះ»។
ឧកញ៉ាអគ្គនាយកក្រុមហ៊ុន ឡាញហល បានលើកឡើងថា៖ ក្រោយការសាងសង់ផែស្ងួតនេះរួចរាល់ សង្ឃឹមថា នឹងមានសកម្មភាពមមាញឹក និងជួយរំលែកការកកស្ទះទំនិញផ្សេងៗ ទៅជាការរៀបចំទំនិញវិញ៕
Account
Security
Favourite Content