ភ្នំពេញ៖ លោក Masato Kanda ដែលទើបតែប្រកាសចូលកាន់តួនាទីជាប្រធានធនាគារអភិវឌ្ឍន៍អាស៊ី ADB ទី១១ កាលពីថ្ងៃទី២៥ ខែកុម្ភៈ ឆ្នាំ២០២៥ ត្រូវបានគេស្គាល់យ៉ាងច្បាស់ថាជាអ្នកដែលមានជំនាញ និងបទពិសោធន៍ នៅក្នុងការងារហិរញ្ញវត្ថុអន្តរជាតិជិត៤សទវត្សរ៍។ លោក Kanda ក៏ត្រូវបានអន្តរជាតិទទួលស្គាល់យ៉ាងទូលំទូលាយសម្រាប់ភាពជាអ្នកដឹកនាំប្រកបដោយការគិតគូរឆ្ពោះទៅមុខ និងអន្តរាគមន៍ដ៏មុតស្រួចនៅក្នុងស្ថានភាពទីផ្សារគ្រប់កាលៈទេសៈដែលមានការប្រែប្រួលខ្លាំង។ ក្នុងរយៈពេលដែលលោកកាន់តំណែងជាអនុរដ្ឋមន្ត្រីក្រសួងហិរញ្ញវត្ថុសម្រាប់កិច្ចការអន្តរជាតិរបស់ប្រទេសជប៉ុន លោកបានដើរតួយ៉ាងសំខាន់ក្នុងការត្រួសត្រាយ និងរកដំណោះស្រាយផ្នែកហិរញ្ញវត្ថុប្រកបដោយភាពច្នៃប្រឌិត និងរៀបចំសកម្មភាពគោលនយោបាយដែលជួយធ្វើឱ្យទីផ្សារមានស្ថិរភាព។

លោក Kanda បានមានប្រសាសន៍ថា ៖

«ខ្ញុំពិតជាមានកិត្តិយសណាស់ដែលបានចូលកាន់តួនាទីជាប្រធាន ADB ក្នុងកាលៈទេសៈដ៏សំខាន់នេះសម្រាប់តំបន់របស់យើង។ ដោយមានការជឿទុកចិត្តពីសមាជិកទាំង៦៩ របស់ ADB និងការគាំទ្រយ៉ាងមុតមាំពីបុគ្គលិកដ៏សកម្មរបស់យើង ខ្ញុំប្តេជ្ញាជំរុញបេសកកម្មរបស់ ADB ក្នុងការលើកកម្ពស់កំណើនប្រកបដោយចីរភាព បរិយាបន្ន និងភាព​ធ​ន់​។ ដោ​យ​ធ្វើការរួមគ្នា យើងនឹងឆ្លើយតបទៅនឹងបញ្ហាប្រឈមចម្បងៗនៃការអភិវឌ្ឍដោយធានាថា ADB នៅតែជាដៃគូចាំ​បា​ច់​​​សម្រា​ប់តំបន់»។

លោក Kanda បានបន្ថែមថា ៖

«ខ្ញុំបានត្រៀមខ្លួនរួចជាស្រេចក្នុងការទាញយកប្រយោជន៍នៃជំនាញរួមនៅក្នុងស្ថាប័នរបស់យើង និងសហការជិតស្និទ្ធជាមួយដៃគូ ដើម្បីជំរុញការផ្លាស់ប្តូរប្រកបដោយ ប្រសិទ្ធភាព ជាពិសេសសម្រាប់អ្នកដែលត្រូវការជំនួយបំផុត។ ការយកចិត្តទុកដាក់របស់យើងនឹងផ្តោតលើសកម្មភាពជាក់ស្តែងដែលផ្តល់នូវលទ្ធផលជាក់លាក់ ដែលធានាថាការគាំទ្ររបស់យើងនឹងនាំមកនូវ ភាពរីកចម្រើនយូរអង្វែងសម្រាប់ជីវិតរស់នៅរបស់ប្រជាពលរដ្ឋនៅទូទាំងអាស៊ី និងប៉ាស៊ីហ្វិក»។

ប្រធានក្រុមប្រឹក្សាភិបាល ADB លោក Fabio Panetta បានមានប្រសាសន៍ថា ៖ លោក  Masato Kanda នាំមកនូវបទពិសោធន៍សម្បូរបែប និងទស្សនៈវិស័យទូលំទូលាយសម្រាប់ ADB ។

លោកបញ្ជាក់ថា ៖

«បទពិសោធន៍របស់គាត់ក្នុងការដោះស្រាយបញ្ហាប្រឈមផ្នែកហិរញ្ញវត្ថុដ៏ស្មុគស្មាញ និងការជំរុញកិច្ចសហប្រតិបត្តិការអន្តរជាតិ ធ្វើឱ្យគាត់ស័ក្ដិសមជាអ្នកដឹកនាំដ៏ល្អរបស់យើង ខណៈដែលយើងបន្តបង្កើនចំណុចខ្លាំងរបស់យើង និងចាប់យកឱកាសថ្មីៗ។ ខ្ញុំមានទំនុកចិត្តថា ក្រោមការដឹកនាំរបស់លោក  Masato Kanda ធនាគារ ADB នឹងផ្ដល់ដំណោះស្រាយដែលមានគោលដៅ និងផលជះជាក់លាក់សម្រាប់ប្រទេសសមាជិកកំពុងអភិវឌ្ឍរបស់យើង»។

សូមជម្រាបថា ការតែងតាំងរបស់លោក Kanda បានគូសបញ្ជាក់ពីការវិវត្តដែលកំពុងបន្ត និងការប្តេជ្ញាចិត្តរបស់ ADB ដើម្បីឆ្លើយតបនឹងតម្រូវការជាគន្លឹះរបស់ប្រទេសសមាជិកកំពុងអភិវឌ្ឍន៍របស់ ADB។ នៅពេលដែល ADB ចាប់ផ្តើមដំណាក់កាលថ្មីក្រោមការដឹកនាំរបស់លោក Kanda នឹងបន្តកេរដំណែលដ៏រឹងមាំរបស់ ADB ព្រមទាំងដឹកនាំស្ថាប័ននេះដើម្បីដោះស្រាយបញ្ហាប្រឈម និងឱកាសនាពេល អនាគតផងដែរ។

ការសម្រេចចិត្តជាឯកច្ឆ័ន្ទរបស់ក្រុមប្រឹក្សាភិបាល ADB ក្នុងការជ្រើសរើសលោក Kanda ឆ្លុះបញ្ចាំងពីទំនុកចិត្តយ៉ាងខ្លាំងលើសមត្ថភាពរបស់គាត់ក្នុងការដឹកនាំ ADB ក្នុងអំឡុងពេលដែលមានការផ្លាស់ប្តូរសំខាន់ៗ។ បទពិសោធន៍ដ៏ទូលំទូលាយរបស់គាត់ក្នុងការគ្រប់គ្រងគោលនយោបាយសេដ្ឋកិច្ចដ៏ស្មុគស្មាញ និងក្នុងបរិបទកិច្ចសហការជាពហុភាគីនឹងមានតម្លៃមិនអាចកាត់ថ្លៃបានខណៈដែល ADB បន្ត សម្របខ្លួនទៅនឹងស្ថានការណ៍ពិភពលោកដែលមានការផ្លាស់ប្តូរយ៉ាងឆាប់រហ័ស។

ADB គឺជាធនាគារអភិវឌ្ឍន៍ពហុភាគីឈានមុខគេមួយដែលគាំទ្រកំណើនប្រកបដោយនិរន្តរភាព បរិយាបន្ន និងភាពធន់ នៅទូទាំងអាស៊ី និងប៉ាស៊ីហ្វិក។ ក្នុងកិច្ចសហការជាមួយសមាជិក និងដៃគូរបស់ខ្លួនដើម្បីដោះស្រាយបញ្ហាប្រឈមដ៏ស្មុគស្មាញរួមគ្នា ADB ប្រើប្រាស់មធ្យោបាយហិរញ្ញវត្ថុប្រកបដោយនវានុវត្តន៍ និងភាពជាដៃគូយុទ្ធសាស្ត្រ ដើម្បីលើកកម្ពស់ជីវិតរស់នៅ កសាងហេដ្ឋារចនាសម្ព័ន្ធប្រកបដោយគុណភាព និងការពារភពផែនដីរបស់យើង។ បង្កើតឡើងក្នុងឆ្នាំ ១៩៦៦ ADB គ្រប់គ្រងដោយសមាជិកចំនួន ៦៩ ដែលក្នុងនោះមាន ៤៩ ស្ថិតក្នុងតំបន់ អាស៊ី និងប៉ាស៊ីហ្វិក៕