ភ្នំពេញ ៖  អភិបាលខេត្ត​ជាប់​ឆ្នេរ​សមុទ្រកម្ពុជាទាំង​៤​​ រួមមាន​ខេត្ត​កោះកុង ខេត្តព្រះសីហនុ ខេត្តកំពត និងខេត្តកែប បានចូលរួ​មទស្សនកិច្ច​រួមគ្នា​មួយ​នៅ​ទីក្រុង​ស៊ិនជិន ប្រទេស​ចិន កាលពី​សប្ដាហ៍មុន​​ ដើម្បីផ្ស​ព្វផ្សាយ​ពីសក្ដានុពល​ និង​ស្វែងរកឱកាសវិនិយោគ​ប្រកបដោយភាពច្នៃប្រឌិត​របស់វិនិយោគិនក្រុង​ស៊ិនជិនមកកាន់ប្រទេសកម្ពុជា ។​

គណៈប្រតិភូ​​កម្ពុជា​ បានទៅទស្សនាស្ថាប័នឈានមុខរបស់ប្រទេសចិន និងតំបន់សេដ្ឋកិច្ចសំខាន់ៗនៅសិនជិន ដើម្បីទទួលបានការយល់ដឹងអំពីការអនុវត្តផ្ទាល់ដែលអាចផ្តល់អត្ថ​ប្រ​យោជ​ន៍​ដល់ការអភិវឌ្ឍសេដ្ឋកិច្ចនៃខេត្តជាប់ឆ្នេរសមុទ្រកម្ពុជា ។ ក្រុមការងារផែនការមេក៏បានរៀបចំកម្មវិធីផ្សាភ្ជាប់ទំនាក់ទំនងរវាងគណៈប្រតិភូកម្ពុជា និងវិនិយោគិន ដែលចូលរួមដោយ​នា​យក​ប្រតិបត្តិ និងប្រ​ធានក្រុមហ៊ុន ឈានមុខរបស់ប្រទេសចិន​ចំនួន ៤៥នាក់ ដែលកំពុងស្វែងរកឱកាសពង្រីកការវិនិយោគមកកម្ពុជា ។

យោងតាម​សេចក្ដី​ប្រកាសព័ត៌​មាន​ក្រោយដំណើរទស្សនកិច្ច​របស់អភិបាលខេត្តទាំង​៤ នៅក្រុង​ស៊ិនជិន ប្រទេស​ចិន​បានឱ្យដឹងថា​ ក្នុងដំណើរទស្សនកិច្ចនេះ គណៈប្រតិភូកម្ពុជា បានពិភាក្សាជា​មួយរដ្ឋបាល​តំប​ន់​ពាណិជ្ជកម្មសេរី Qianhai ដោយផ្តោតលើការរៀបចំគោលនយោបាយជំរុញពាណិជ្ជកម្ម និងទាក់ទាញការវិនិយោគពីបរទេស ។ នៅក្នុងដំណើរទស្សនកិច្ច​នោះដែរ ក៏មានជួបជាមួយក្រុមហ៊ុន Qianhai Investment Holding និងបានផ្តល់ព័ត៌មានដ៏មានតម្លៃក្នុងគំរូវិនិយោគ និងហិរញ្ញប្បទាន ខណៈពេលដែលកិច្ចពិភាក្សា ជាមួយគណៈកម្មការត្រួតពិនិត្យ និង​គ្រប់គ្រងទ្រព្យសម្បត្តិរដ្ឋ នៃរដ្ឋបាលប្រជាជនសិនជិន បានផ្តល់ព័ត៌មានដ៏មានតម្លៃមួយទៀតចំពោះមុខងារគ្រប់គ្រង និងត្រួតពិនិត្យរបស់ពួកគេ។ លើសពីនេះ វិទ្យាស្ថាននគរូបនីយកម្ម និងឌីសាញ សិនជិនបានចែករំលែកជំនាញរៀបចំទីក្រុង និងការអភិវឌ្ឍហេដ្ឋារចនាសម្ព័ន្ធប្រកបដោយនិរន្តរភាព។

ឯកឧត្តម ជា កុកហុង ប្រធានលេខាធិការដ្ឋានផែនការមេខេត្តជាប់ឆ្នេរ​ បានមានប្រសាសន៍ថា ដំណើរទស្សនកិច្ច សិក្សានេះទទួលបានភាពជោគជ័យល្អប្រសើរ ដោយគណៈប្រតិភូកម្ពុជាទទួលបានការយល់ដឹងបន្ថែមជាច្រើនអំពីបទពិសោធន៍ជាក់ស្តែងរបស់ទីក្រុងសិនជិនផ្នែករដ្ឋបាល និងសេដ្ឋកិច្ច និងរបៀបដែលទីក្រុងសិនជិនបង្កើត និងពង្រឹងវេទិកា ក៏ដូចជាស្ថាប័នដើម្បីទាក់ទាញ និងសម្រួលដល់ការវិនិយោគនៅក្នុងទីក្រុងរបស់ខ្លួន ។

គួរ​បញ្ជាក់ថា​ រាជរដ្ឋាភិបាលកម្ពុជា​បានកំណត់យកតំបន់ឆ្នេរ​ជា​គោលដៅនៃការអភិវឌ្ឍ​ ដោយរដ្ឋាភិបាល​បានចំណាយទុនជាច្រើនលានដុល្លារមក​ហើយ​ ដើម្បីសាងសង់ហេដ្ឋារចនាសម្ព័ន្ធតភ្ជាប់ទៅកាន់​តំបន់​ឆ្នេរ និង​ហេដ្ឋារចនាសម្ព័ន្ធក្នុងតំបន់​ឆ្នេរ​ផ្ទាល់តែម្ដង ។ បច្ចុប្បន្ននេះ ខេត្ត​ជាប់សមុទ្រ​​កម្ពុជា ត្រូវ​បានរាជរដ្ឋាភិបាល​​សាងសង់​ផ្លូវ​តភ្ជាប់រួចរាល់ពីភ្នំពេញ និងពីបណ្ដាខេត្ត​នានា ក្នុង​នោះខេត្ត​ព្រះសីហនុ មានផ្លូវជាតិលេខ​៤ និងផ្លុវ​ល្បឿនលឿនភ្នំពេញ ក្រុងព្រះសីហនុ ខេត្តកំពត​និងកែប មាន​ផ្លូវជាតិលេខ​៣ ផ្លូវជាតិលេខ​៣៣ និងផ្លូវជាតិលេខ​៣១ ដោយឡែកខេត្តកោះកុង ក៏បាន​និងកំពុង​​សាងសង់​ផ្លូវ​ដែល​នឹង​បញ្ចប់​ឆាប់ៗនេះ ដូចជា​ផ្លូវជាតិ​លេខ​៤៨ ផ្លូវជាតិលេខ​១០ ៕