អង្គការមូលនិធិអាស៊ី (The Asia Foundation) ជាអង្គការអន្តរជាតិមិនរកប្រាក់កម្រៃ ក្នុងគោលបំណងផ្សព្វផ្សាយ និងជំរុញឱ្យមានការអភិវឌ្ឍ មានសន្តិភាព ប្រកបដោយចិរភាពក្នុងតំបន់អាស៊ីប៉ាស៊ីហ្វិក និងបានបំពេញបេសកកម្មនៅប្រទេសកម្ពុជាជាង ៤០ឆ្នាំមកហើយ ដោយបានរួមចំណែកជាច្រើនសម្រាប់ការអភិវឌ្ឍសេដ្ឋកិច្ចរបស់កម្ពុជា។

អង្គការមូលនិធិអាស៊ីបានបង្កើតឡើងតាំងពីឆ្នាំ១៩៥៤ ហើយបានបន្តអនុវត្តនូវកិច្ចការទាំងឡាយដើម្បីធ្វើឲ្យរីកចម្រើននូវអត្ថប្រយោជន៍ទៅវិញទៅមករវាងរដ្ឋាភិបាលអាមេរិក និងនៅតំបន់អាស៊ីប៉ាស៊ីហ្វិក ដែលមានទីស្នាក់ការកណ្តាលនៅរដ្ឋសាន់ហ្វ្រាន់ស៊ីស្កូ និងមានសាខានៅ១៧ប្រទេស ក្នុងអនុតំបន់អាស៊ីប៉ាស៊ីហ្វិក។

នៅក្នុងបទអត្ថាអធិប្បាយមួយនៃក្រុមអ្នកតំណាងតាមប្រទេសដែលកំពុងបន្តតាមដានស្ថានភាពសេដ្ឋកិច្ចនយោបាយក្នុងប្រទេសនានាក្នុងតំបន់សម្រាប់ឆ្នាំ២០២៤នេះ ដោយក្នុងនោះក៏មានកម្ពុជាផងដែរ ហើយត្រូវបានចេញផ្សាយកាលពីពេលកន្លងទៅថ្មីៗនេះប៉ុណ្ណោះ។

នៅក្នុងអត្ថន័យដែលមានខ្លឹមសារទាំងស្រុងធ្វើឡើងដោយលោកស្រី Meloney Lindberg តំណាងអង្គការមូលនិធិអាស៉ីប្រចាំកម្ពុជា បានកោតសរសើរ និងបង្ហាញនូវភាពវិជ្ជមានជាពិសេសថ្នាក់ដឹកនាំវ័យក្មេងនៅក្រោយការបោះឆ្នោតថ្នាក់ជាតិអស់រយៈពេលជាង១០០ថ្ងៃកន្លងមកនេះ។

លោកស្រីបានសរសេរបែបនេះថា ៖

«ចាប់តាំងតែពីខែកក្កដាកន្លងមក ពលរដ្ឋកម្ពុជាបានបោះឆ្នោតទទួលយកមេដឹកនាំវ័យក្មេងរបស់ពួកគេដែលធ្លាប់បានសន្យា និងប្តេជ្ញាចិត្តក្នុងការសម្រេចឲ្យបាននូវគោលបំណង និងឆន្ទៈរបស់ពលរដ្ឋ។ រយៈពេលជាង១០០ថ្ងៃកន្លងមកនេះ ឆ្លើយតបទៅនឹងការសន្យានេះ រាជរដ្ឋាភិបាលថ្មីបានខិតខំដូចដែលបានឃើញគ្រប់គ្នាថា ពួកគេពិតជាមានភាពមមាញឹក និងសកម្មបំផុត ជាពិសេសទៅលើកិច្ចការងារពិភាក្សា និងពិគ្រោះយោបល់ជាមួយនឹងដៃគូអភិវឌ្ឍ ដៃគូសង្គមស៊ីវិល ព្រមទាំងវិស័យឯកជននានាផងដែរ»។

យ៉ាងណាក៏ដោយ លោកស្រីបានបញ្ជាក់ថា ថ្វីត្បិតតែសេដ្ឋកិច្ចកម្ពុជាអាចទទួលផលប៉ះពាល់ដោយសារកត្តាវិបត្តិសកល ដូចជា បញ្ហាវិបត្តិសេដ្ឋកិច្ចសកល និងការបន្តនៃជម្លោះរវាងអ៊ុយក្រែន​- រុស្សីផង, ជម្លោះនៅមជ្ឈឹមបូពា៍ផងក្តី ប៉ុន្តែរដ្ឋាភិបាលថ្មីបានដាក់កិច្ចការងារអាទិភាពរួចទៅហើយដើម្បីធ្វើយ៉ាងណាអាចធ្វើឲ្យប្រសើរឡើងនូវជីវភាពរស់នៅប្រចាំថ្ងៃ, ការផ្តល់សេវាសាធារណៈ និងវិធានការការពារសង្គម។

ក្នុងពេលជាមួយគ្នានេះដែរ ធនាគារពិភពលោកក៏បានធ្វើការព្យាករណ៍ផងដែរថា សេដ្ឋកិច្ចកម្ពុជានឹងបន្តទទួលបានកំណើនគួរឲ្យកត់សំគាល់ប្រមាណជា ៥,៨ភាគរយក្នុងឆ្នាំនេះទោះបីជាមានភាពយឺតយ៉ាវជាងអ្វីដែលធ្លាប់ទទួលបានកាលពីសម័យមុនកូវីដដែលមានប្រមាណជា៧ភាគរយក្តី។

លោកស្រី Meloney បានលើកឡើងទៀតថា រាជរដ្ឋាភិបាលថ្មីៗនៃក្រុមគណៈរដ្ឋមន្ត្រីក្មេងៗក៏បានផ្តោតយកចិត្តទុកដាក់សំខាន់ទៅលើវិស័យបច្ចេកវិទ្យា និងបានចាត់ទុកវាជាសសរស្តម្ភនៃក្របខ័ណ្ឌអភិវឌ្ឍន៍ជាតិស្របទៅតាមយុទ្ធសាស្ត្របញ្ចកោណរបស់រដ្ឋាភិបាលអាណត្តិថ្មីនេះផងដែរ ហើយសង្ឃឹមយ៉ាងងមុតម៉ាំថា នឹងអាចនាំឲ្យប្រទេសកម្ពុជាក្លាយជាប្រទេសមានពលរដ្ឋទទួលបានចំណូលមធ្យមកម្រិតខ្ពស់នៅត្រឹមឆ្នាំ២០៣០ខាងមុខនេះ។

ក្នុងដំណើរឆ្ពោះទៅរកភាពជោគជ័យនៃផែនការឆ្នាំ២០៣០នោះ កម្ពុជាក៏នឹងត្រូវមើលឃើញសកម្មភាពសម្រេចមួយចំនួនដូចជាការឈានទៅឲ្យបាននូវការផ្គត់ផ្គង់ថាមពលជាតិឲ្យបាន៧០ភាគរយ ជាថាមពលកកើតឡើងវិញ ព្រមទាំងការបង្កើតឳកាសការងារជូនពលរដ្ឋដែលមានវ័យក្មេងតាមរយៈការអប់រំ និងបណ្តុះបណ្តាលក្នុងប្រព័ន្ធយ៉ាងច្រើនចាប់តាំងពីពេលនេះតទៅ។

ជាចុងក្រោយ លោកស្រីបានសរសេរពីការរំពឹងទុកបែបវិជ្ជមានថា ៖ ក្នុងពេលដែលគ្រប់គ្នាកំពុងមានភាពសុទិដ្ឋិនិយមនេះ ក្រសែភ្នែកទាំងអស់គ្នា រួមទាំងពលរដ្ឋ, វិស័យឯកជននិងអន្តរជាតិ កំពុងនាំគ្នាតាមសម្លឹងមើលនោះក្រុមថ្នាក់ដឹកនាំថ្មី នឹងចាំបាច់បន្តស្វែងរកការកសាងភាពជឿជាក់ និងផ្តល់ការសន្យារបស់ពួកគេជូនចំពោះយុវជនកម្ពុជាជំនាន់ក្រោយដែលមានចំណេះដឹងផ្នែកបច្ចេកវិទ្យា និងដែលកំពុងទន្ទឹងរង់ចាំជាមួយនឹងក្តីសង្ឃឹមយ៉ាងអស្ចារ្យរួមគ្នា៕