ភ្នំពេញ ៖ អ្នកដឹកនាំជាន់ខ្ពស់របស់រោងចក្រពាណិជ្ជកម្មនៃក្រុមហ៊ុន BOSCH ដែលជាក្រុមហ៊ុនផ្គត់ផ្គង់បច្ចេកវិទ្យា និងសេវាកម្មឈានមុខគេមួយនៅលើពិភពលោក បានសន្យាថានឹងចាត់តំណាងក្រុមហ៊ុន BOSCH ដែលមានមូលដ្ឋាននៅប្រទេសសិង្ហបុរី និងវៀតណាម មកប្រទេសកម្ពុជាដើម្បីសិក្សាឱ្យបានលម្អិតស៊ីជម្រៅបន្ថែមទៀតលើការរៀបចំបើករោងចក្ររបស់ខ្លួននៅកម្ពុជា។ នេះបើតាមប្រភពពីក្រុមប្រឹក្សាអភិវឌ្ឍន៍កម្ពុជា។

BOSCH Group គឺជាក្រុមហ៊ុនផ្គត់ផ្គង់បច្ចេកវិទ្យា និងសេវាកម្មឈានមុខគេមួយនៅលើពិភពលោកជាមួយបុគ្គលិកសរុបប្រមា​ណ ៤២៩ ០០០នាក់នៅទូទាំងពិភពលោក។ ក្រុមហ៊ុននេះមានប្រតិបត្តិការរបស់ខ្លួនលើវិស័យបច្ចេកវិទ្យា ឧស្សាហកម្ម ទំនិញប្រើប្រាស់ និងថាមពលជាដើម។

ការសន្យាមកសិក្សាលទ្ធភាពបើករោងចក្ររបស់លោក Alexander Weichsel ដែលជាអ្នកគ្រប់គ្រងរោងចក្រពាណិជ្ជកម្មនៃក្រុមហ៊ុន BOSCH នៅកម្ពុជានេះ  បានធ្វើឡើងនៅក្នុងជំនួបជាមួយឯកឧត្តម ស៊ុន ចាន់ថុល ឧបនាយករដ្ឋមន្ត្រីអនុប្រធានទី១ក្រុមប្រឹក្សាអភិវឌ្ឍន៍កម្ពុជានាពេលថ្មីៗនេះនៅសហព័ន្ធអាល្លឺម៉ង់។

នៅក្នុងជំនួបនោះ ឯកឧត្តមឧបនាយករដ្ឋមន្ត្រី បានជម្រាបក្រុមហ៊ុន BOSCH Group អំពីសក្ដានុពលវិនិយោគរបស់កម្ពុជា ជាពិសេសវិស័យអាទិភាពដែលរាជរដ្ឋាភិបាលកម្ពុជាបានអនុញ្ញាតឱ្យវិស័យឯកជនអាចពិនិត្យលទ្ធភាពក្នុងការវិនិយោគ។ ជាក់ស្ដែងក្នុងអំឡុងដំណើរបេសកកម្មគោះទ្វារវិនិយោគក្នុងសហភាពអឺរ៉ុបនាឱកាសនេះ កម្ពុជាបានពាំនាំយកនូវសក្តានុពល និងកាលានុវត្តភាពវិនិយោគលើវិស័យគន្លឹះរួមមានវិស័យកសិកម្ម និងកសិ-ឧស្សាហកម្ម, យានយន្តនិងអេឡិចត្រូនិក, សុខាភិបាល និងឱសថ, ថាមពលកកើតឡើងវិញ, ព្រមទាំងទេសចរណ៍ និងបដិសណ្ឋារកិច្ចជាដើម។

ចំពោះទស្សនកិច្ចក្រុមហ៊ុននាឱកាសនេះ ឯកឧត្តមឧបនាយករដ្ឋមន្ត្រី បានបង្ហាញការចាប់អារម្មណ៍ខ្ពស់ចំពោះប្រតិបត្តិការរបស់ក្រុមហ៊ុន និងស្នើដល់ក្រុមហ៊ុនអាចពិនិត្យពិចារណាជ្រើសរើសយកកម្ពុជាទីតាំងដើម្បីពង្រីកការវិនិយោគរបស់ខ្លួននៅក្នុងតំបន់អាស៊ីអាគ្នេយ៍ផងដែរ។

ក្នុងដំណើរបេសកកម្មគោះទ្វារវិនិយោគក្នុងសហភាពអឺរ៉ុបនេះដែរ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា អមដំណើរដោយគណៈប្រតិភូកម្ពុជា រួមមានពីក្រសួង-ស្ថាប័នពាក់ព័ន្ធ សមាគមឧកញ៉ាកម្ពុជា និងសភាពាណិជ្ជកម្មកម្ពុជា ក៏បានជួបពិភាក្សាការងារជាមួយលោកស្រី Christiane Riefler Karpa នាយកគ្រប់គ្រងនៃក្រុមហ៊ុន Memmert។ ក្នុងជំនួបនោះក្រុមហ៊ុនបានធ្វើបទបង្ហាញអំពីសកម្មភាពវិនិយោគរបស់ខ្លួននៅក្នុងតំបន់អាស៊ីអាគ្នេយ៍ជូនដល់គណៈប្រតិភូកម្ពុជាផងដែរ។ ក្រោយជំនួបពិភាក្សាការងារ គណៈប្រតិភូកម្ពុជាបានអញ្ជើញចុះពិនិត្យរោងចក្រ និងទស្សនាសាលផលិតកម្មរបស់ក្រុមហ៊ុន ដោយនៅក្នុងនោះឯកឧត្តមឧបនាយករដ្ឋមន្ត្រី បានបង្ហាញចំណាប់អារម្មណ៍ខ្ពស់ចំពោះបច្ចេកវិទ្យាដែលក្រុមហ៊ុនប្រើប្រាស់ក្នុងប្រតិបត្តិការរបស់ខ្លួនដែលពុំបង្កផលប៉ះពាល់ដល់បរិស្ថាន។

គួរបញ្ជាក់ថា ក្រុមហ៊ុន Memmert ជាក្រុមហ៊ុនឈានមុខមួយក្នុងការអភិវឌ្ឍន៍ និងផលិតឧបករណ៍មន្ទីរពិសោធន៍ដែលមានគុណភាពខ្ពស់ជាមួយបទពិសោធន៍ជាង៩០ឆ្នាំ ជាមួយផលិតផលជាច្រើនត្រូវបាននាំចេញទៅកាន់ទីផ្សារដោយជោគជ័យនៅជាង ១៦០ប្រទេសជុំវិញពិភពលោក៕