សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពព័ត៌មានពីបរទេសបានរាយការណ៍ថា BYD បានប្រកាសប្រមូលរថយន្តជិត ១០ ម៉ឺនគ្រឿងត្រឡប់មកវិញ ដោយសារតែមានកំហុស និងបញ្ហាបច្ចេកទេសក្នុងអំឡុងពេលផលិតកាលពីពេលកន្លងទៅ។
យោងតាមរដ្ឋបាលគ្រប់គ្រង និងត្រួតពិនិត្យទីផ្សាររបស់ចិន (SAMR) បានឲ្យដឹងថា BYD បានដាក់ផែនការប្រមូលរថយន្តរបស់ខ្លួនមកវិញដោយមជ្ឈមណ្ឌលប្រមូលផលិតផលដែលមានបញ្ហារបស់ SAMR។ ក្រុមហ៊ុនផលិតរថយន្តអគ្គិសនីចិន BYD នឹងប្រមូលរថយន្តប្រភេទ Dolphin និង Yuan Plus ចំនួន ៩៦ ៧១៤ គ្រឿងដែលផលិតក្នុងប្រទេសចិនត្រឡប់មកវិញ គិតចាប់ពីថ្ងៃទី ៣០ ខែកញ្ញា ឆ្នាំ ២០២៤ នេះតទៅ ដោយសារមានបញ្ហាអាចបង្កហានិភ័យអគ្គីភ័យ។
BYD Dolphin និង BYD Yuan Plus ដែលត្រូវបានគេស្គាល់ថាជា BYD Atto 3 ដាក់លក់នៅលើទីផ្សារក្រៅប្រទេស ហើយជាយានជំនិះដ៏ពេញនិយមមួយរបស់ BYD ។ ទន្ទឹមនឹងនេះ BYD Auto Industry Co., Ltd. ក៏បានប្រកាសប្រមូលរថយន្តអគ្គិសនី Dolphin និង Yuan Plus ដែលផលិតក្នុងស្រុកចំនួន ៨៧ ៧៦២ គ្រឿង (ផលិតនៅចន្លោះថ្ងៃទី ៤ ខែកុម្ភៈ ឆ្នាំ ២០២៣ និងថ្ងៃទី ២៦ ខែធ្នូ ឆ្នាំ ២០២៣)។ បន្ថែមពីនេះ BYD Auto Co., Ltd. បានប្រកាសប្រមូលរថយន្តអគ្គិសនី Yuan Plus ដែលផលិតក្នុងស្រុកចំនួន ៨ ៩៥២ គ្រឿង (ផលិតនៅចន្លោះថ្ងៃទី ២ ខែវិច្ឆិកា ឆ្នាំ ២០២២ និងថ្ងៃទី ១៩ ខែមិថុនា ឆ្នាំ ២០២៣)។ មូលហេតុនៃការប្រមូលមកវិញនេះ គឺដោយសាររថយន្តមួយចំនួនមានបញ្ហាក្នុងអំឡុងពេលដំណើរការផលិតឧបករណ៍បញ្ជាដៃចង្កូតអគ្គិសនី (CEPS)។ នៅពេលដែលគម្របឧបករណ៍ត្រូវបានបិទ វាអាចរំខានដល់ capacitors ដែលអាចបណ្តាលឱ្យមានស្នាមប្រេះតូចៗ។ ស្នាមប្រេះទាំងនេះអាចរីកធំឡើងកំឡុងពេលប្រើប្រាស់យានជំនិះ ដែលនាំឱ្យសៀគ្វីរួមខ្លី និងឡើងកំដៅ ដែលអាចបង្កជាអគ្គីភ័យ និងហានិភ័យសុវត្ថិភាព។
យ៉ាងណាមិញ អ្នកចែកចាយ BYD ទទួលបានការដំឡើងបន្ទះអ៊ីសូឡង់នៅលើឧបករណ៍បញ្ជាដោយមិនគិតថ្លៃ ដើម្បីចៀសវាងគ្រោះថ្នាក់ទាំងនេះ។ ម្ចាស់យានយន្តដែលរងផលប៉ះពាល់នឹងត្រូវបានជូនដំណឹងតាមរយៈ WeChat និងការហៅទូរស័ព្ទ។ លើសពីនេះ BYD បានរៀបចំបណ្តាញទូរស័ព្ទបន្ទាន់សម្រាប់សេវាអតិថិជន ដើម្បីទាក់ទងអ្នកប្រើប្រាស់ជាប្រញាប់។ ផ្ទុយពីក្រុមហ៊ុន Tesla ដែលប្រកាសពីការប្រមូលរថយន្តត្រឡប់មកវិញញឹកញាប់ BYD កម្រមានករណីប្រមូលរថយន្តត្រឡប់មកវិញណាស់ ប៉ុន្តែការប្រមូលមកវិញលើកនេះគឺករណីធំជាងគេក្នុងប្រវត្តិសាស្ត្ររបស់ក្រុមហ៊ុនរថយន្តអគ្គិសនីចិនមួយនេះ។ ការប្រមូលរថយន្តត្រឡប់មកវិញចុងក្រោយរបស់ BYD គឺនៅថ្ងៃទី ៣០ ខែមេសា ឆ្នាំនេះ ទៅលើប្រភេទថយន្ត Seagull EVs ចំនួន ១៦ ៦៦៦ គ្រឿងនៅក្នុងប្រទេសចិន ដោយសារមានបញ្ហាសូហ្វែរប៉ះពាល់ដល់កាមេរ៉ា៕
Account
Security
Favourite Content