សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រោងចក្រផលិតសំបកកង់រថយន្តតម្លៃ២៤២លានដុល្លារអាមេរិកដែលមានទីតាំងនៅក្នុងតំបន់សេដ្ឋកិច្ចពិសេស អាយ អេស អាយ ខេត្តព្រះសីហនុ ត្រូវបានក្រុមប្រឹក្សាអភិវឌ្ឍន៍កម្ពុជាអនុម័តជាផ្លូវការចុះបញ្ជីវិនិយោគ ដែលរោងចក្រនេះអាចនឹងបង្កើតឱកាសការងារជូនប្រជាពលរដ្ឋប្រមាណជាង២៤០០កន្លែង ។ នេះបើតាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជានៅថ្ងៃទី០៦ ឧសភា ២០២៥ ។
ទន្ទឹមនឹងគម្រោងវិនិយោគបង្កើតរោងចក្រផលិតសំបកកង់រថយន្តនៅក្នុងខេត្តព្រះសីហនុនេះដែរ ក្រុមប្រឹក្សាអភិវឌ្ឍន៍កម្ពុជាក៏បានអនុម័តគម្រោងពង្រីកផលិតកម្មសំបកកង់រថយន្តនៅក្នុងតំបន់សេដ្ឋកិច្ចពិសេស ឈី លូ ជាន ពុ ចាយ ខេត្តស្វាយរៀង ដែលមានទុនបន្ថែមចំនួន ៩៣លានដុល្លារអាមេរិក ។
តាមរយៈការអនុម័តគម្រោងវិនិយោគសំបកកង់រថយន្តនៅក្នុងខេត្តព្រះសីហនុនេះដែរ ធ្វើឱ្យចំនួនរោងចក្រផលិតសំបកកង់រថយន្តនៅក្នុងប្រទេសកម្ពុជាកាន់តែច្រើន និងធ្វើឱ្យតម្រូវការនៃការប្រើប្រាស់ជ័រកៅស៊ូរបស់កម្ពុជាកាន់តែមានចំនួនច្រើន ហើយអាចរក្សាតម្លៃកៅស៊ូឱ្យមានល្អប្រសើរ ។
ការបង្កើតរោងចក្រផលិតសំបកកង់ឡានក៏ដូចជារោងចក្រឧស្សាហកម្មនិងគម្រោងវិនិយោគផ្សេងទៀតនៅក្នុងខេត្តព្រះសីហនុ គឺស្របពេលដែលរាជរដ្ឋាភិបាលទើបតែចេញសេចក្ដីប្រកាសពីការលើកទឹកចិត្តផ្នែកពន្ធលើអចលនទ្រព្យដល់ឆ្នាំ ២០២៨ និងបន្តផ្ដល់សុពលភាពកម្មវិធីពិសេសជំរុញការវិនិយោគខេត្តព្រះសីហនុ រហូតដល់ដាច់ឆ្នាំ ២០២៥ ។
លោក វណ្ណ ធី អ្នកគ្រប់គ្រងទូទៅនៃក្រុមហ៊ុនអចលនទ្រព្យមួយប្រចាំខេត្តព្រះសីហនុ បានមានប្រសាសន៍ថា ក្នុងខេត្តព្រះសីហនុនាពេលបច្ចុប្បន្ននេះ ការវិនិយោគលើអគារធំៗភាគច្រើនជាគម្រោងវិនិយោគបន្ត ឬដំណើរការឡើងវិញនូវអគារជាប់គាំងនាពេលកន្លង ប៉ុន្តែសម្រាប់រោងចក្រឧស្សាហកម្ម ឃើញថាភាគច្រើនអ្នកវិនិយោគសំដៅទៅកាន់តំបន់ជាយៗក្រុង ដូចជាក្នុងស្រុកស្ទឹងហាវ ស្រុកព្រៃនប់ និងកំពង់សិលាជាដើម ពីព្រោះតំបន់ទាំងនោះតម្លៃដីធ្លីនៅទាប ដែលអាចឱ្យអ្នកវិនិយោគស្វែងរកដីសម្រាប់សាងសង់រោងចក្របាន ។
លោកបន្តថា យ៉ាងមិញក្នុងរយៈពេលចុងក្រោយនេះ ក៏ឃើញថាមានអ្នកវិនិយោគបរទេសមួយចំនួនចាប់អារម្មណ៍ស្វែងរកការវិនិយោគបង្កើតតំបន់សេដ្ឋកិច្ចពិសេសនៅក្នុងខេត្តព្រះសីហនុ ហើយវិនិយោគិនក៏ស្វែងរកទីតាំងណាដែលមានតម្លៃដីធ្លីទាប ក្នុងនោះដែរតំបន់ក្រៅពីក្រុងព្រះសីហនុគឺជាសក្ដានុពលនៃការវិនិយោគលើតំបន់សេដ្ឋកិច្ចពិសេស ។
លោករំពឹងថា តាមរយៈការលើកទឹកចិត្តដល់អ្នកវិនិយោគនៅក្នុងខេត្តព្រះសីហនុ របស់រាជរដ្ឋាភិបាល រំពឹងថាខេត្តព្រះសីហនុនឹងទាក់ទាញបានការវិនិយោគបន្ថែមទៀត ជាពិសេសនឹងអាចជំរុញសកម្មភាពនៃការវិនិយោគលើអគារជាប់គាំងឡើងវិញ ។
នៅក្នុងដំណើរទស្សនកិច្ចរបស់ឯកឧត្តម ស៊ី ជីនពីង នៅប្រទេសកម្ពុជា កាលពីថ្ងៃទី១៧ និង១៨ ខែមេសា ឆ្នាំ ២០២៥ កន្លងទៅ ឯកឧត្តមបានសន្យាថា នឹងជួយជំរុញវិនិយោគិនចិនមកបណ្ដាក់ទុនវិនិយោគនៅកម្ពុជា ជាពិសេសនៅក្នុងតំបន់សេដ្ឋកិច្ចពិសេសក្រុងព្រះសីហនុ ដែលនឹងធ្វើឱ្យការវិនិយោគនៅក្នុងខេត្តព្រះសីហនុរំពឹងកើនឡើងបន្ថែមទៀតនាពេលឆាប់ៗនេះ ៕
Account
Security
Favourite Content