សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ កំណើនសេដ្ឋកិច្ចរបស់ប្រទេសចិន នៅក្នុងត្រីមាសទី៣កន្លងទៅនេះ បានធ្លាក់ចុះគួរឱ្យកត់សម្គាល់ ចំពេលដែលភាពតានតឹងនៃសង្គ្រាមពាណិជ្ជកម្មជាមួយសហរដ្ឋអាម៉េរិកកំពុងកើនឡើងកំដៅមិនទាន់រកច្រកចេញបាននៅឡើយ។ នេះបើយោងតាមការចេញផ្សាយរបស់ប្រភពព័ត៌មាន BBC ។
នៅថ្ងៃចន្ទ សប្ដាហ៍នេះ តួលេខផ្លូវការរបស់ប្រទេសចិនបានបង្ហាញថា សេដ្ឋកិច្ចរបស់ខ្លួនកើនឡើងក្នុងល្បឿនយឺតបំផុត ៤,៨% នៅត្រីមាសទី ៣ ដែលធ្លាក់ចុះពី ៥,២% ក្នុងត្រីមាសទី ២។ ទិន្នន័យនេះត្រូវបានបង្ហាញឡើងបន្ទាប់ពីចិនរឹតបន្តឹងការត្រួតពិនិត្យលើការនាំចេញរ៉ែកម្ររបស់ខ្លួន ដែលជាសារធាតុរ៉ែសំខាន់សម្រាប់ការផលិតគ្រឿងអេឡិចត្រូនិកជាសកល។ វិធានការនេះបង្កភាពផុយស្រួយដល់កិច្ចព្រមព្រៀងផ្អាកភាពតានតឹងពាណិជ្ជកម្មរយៈពេលខ្លីជាមួយសហរដ្ឋអាម៉េរិក។
ជាការឆ្លើយតប ប្រធានាធិបតីអាម៉េរិក លោក Donald Trump បានគំរាមដំឡើងពន្ធបន្ថែម ១០០% ពីលើពន្ធដែលមានស្រាប់សម្រាប់ការនាំចូលទំនិញពីចិន។ ក្រោយមក រដ្ឋមន្ត្រីក្រសួងរតនាគារអាម៉េរិកលោក Scott Bessent បានបង្ហាញពីក្ដីរំពឹងថានឹងអាចជួបជាមួយមន្ត្រីចិននៅប្រទេសម៉ាឡេស៊ីក្នុងសប្តាហ៍នេះ ក្នុងគោលបំណងបន្ធូរបន្ថយភាពតានតឹង និងរៀបចំជំនួបរវាងប្រធានាធិបតី Trump និងប្រធានាធិបតីចិនលោក Xi Jinping។
យ៉ាងណាមិញ ការិយាល័យស្ថិតិជាតិរបស់ចិនបានលើកឡើងថា សេដ្ឋកិច្ចរបស់ខ្លួនបានបង្ហាញពីភាពធន់ខ្លាំងប្រឆាំងនឹងសម្ពាធ និងបានអះអាងពីសន្ទុះនៅក្នុងវិស័យបច្ចេកវិទ្យា ក៏ដូចជាសេវាកម្មអាជីវកម្មរបស់ខ្លួនដែលជាកត្តាជំរុញកំណើនសេដ្ឋកិច្ចដ៏សំខាន់។ ទន្ទឹមនឹងនេះ ទីក្រុងប៉េកាំង ក៏បានកំណត់គោលដៅកំណើនសេដ្ឋកិច្ចប្រហែល ៥% សម្រាប់ឆ្នាំ២០២៦ ជាមួយនឹងការដាក់ចេញវិធានការផ្សេងៗជាច្រើនដើម្បីគាំទ្ររដ្ឋាភិបាល និងអាចចៀសផុតពីការធ្លាក់ចុះកំណើនសេដ្ឋកិច្ច។
គួរកត់សម្គាល់ដែរថា មុនពេលមានភាពតានតឹងដែលផ្ទុះឡើងនៅក្នុងខែតុលានេះ អាជីវកម្មចិនបានទាញយកផលប្រយោជន៍ពីកិច្ចព្រមព្រៀងផ្អាកភាពតានតឹងពាណិជ្ជកម្មរយៈពេលខ្លី ដើម្បីដឹកជញ្ជូនទំនិញទៅកាន់សហរដ្ឋអាម៉េរិក បណ្តាលឱ្យការនាំចេញរបស់ចិនកើនឡើង ៨,៤% នៅក្នុងខែកញ្ញា ខណៈដែលតម្លៃសរុបនៃការនាំចូលពីអាម៉េរិកក៏កើនឡើងផងដែរ។ លើសពីនេះ ទិន្នផលឧស្សាហកម្មរបស់ចិនបានកើនឡើង ៦,៥% កាលពីខែកញ្ញា បើធៀបនឹងឆ្នាំមុន៕
Account
Security
Favourite Content