សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ដើម្បីបំពេញតម្រូវការខ្វះខាត និងផ្គត់ផ្គង់ទឹកស្អាតដល់ប្រជាពលរដ្ឋរស់នៅក្នុងក្រុងភ្នំពេញ ជាពិសេសប្រជាពលរដ្ឋដែលរស់នៅតំបន់ជាយក្រុង រាជរដ្ឋាភិបាលបានសាងសង់រោងចក្រផលិតទឹកស្អាតធំមួយកន្លែងទៀតនៅសង្កាត់បាក់ខែង ខណ្ឌជ្រោយចង្វារ រាជធានីភ្នំពេញ ដោយរោងចក្រនេះនឹងចំណាយថវិកាសរុបប្រមាណ៦៦០លានដុល្លារអាមេរិក ដើម្បីបញ្ចប់គម្រោងទាំងស្រុង ។
យោងតាមសេចក្ដីប្រកាសព័ត៌មានរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា រោងចក្រផលិតទឹកស្អាតបាក់ខែង នឹងត្រូវសាងសង់ជា ៣ ដំណាក់កាល ឬ ៣ ជំហាន ហើយរហូតមកដល់បច្ចុប្បន្ន រោងចក្រមួយនេះសម្រេចបានការសាងសង់ ២ដំណាក់កាល និងបានដាក់ឱ្យប្រើប្រាស់ហើយផងដែរ ។ សម្រាប់រោងចក្រផលិតទឹកស្អាតដំណាក់កាលទី៣ ក៏បានប្រកាសបើកការដ្ឋានសាងសង់ជាផ្លូវការរួចរាល់ហើយដែរ ។
តាមរបាយការណ៍របស់ក្រសួងមួយនេះបានឱ្យដឹងថា គម្រោងទាំង ៣ ដំណាក់កាលនេះ នឹងត្រូវចំណាយទឹកប្រាក់អស់ប្រមាណ ៦៦០លានដុល្លារ ដែលបានមកពីឥណទានសម្បទានរបស់ទីភ្នាក់ងារបារាំងសម្រាប់ការអភិវឌ្ឍ (AFD ) មានប្រមាណ ៤១០លានដុល្លារអាមេរិក ឥណទានសម្បទានពីធនាគារវិនិយោគអឺរ៉ុប ចំនួន១០០លានដុល្លារអាមេរិក ហិរញ្ញប្បទានឥណទានពីសហគមន៍អឺរ៉ុបមានចំនួន២៦លានដុល្លារអាមេរិក និងថវិកាបដិភាគពីរដ្ឋាករទឹកស្វយ័តក្រុងភ្នំពេញចំនួន១២៤លានដុល្លារអាមេរិក ។
នៅពេលរោងចក្រផលិតទឹកស្អាតទាំង ៣ ដំណាក់កាលនេះសាងសង់រួចរាល់ វាមានសមត្ថភាពអាចផលិតទឹកបានក្នុងមួយថ្ងៃ ១លានម៉ែត្រគូប សម្រាប់បំពេញតម្រូវរបស់ពលរដ្ឋនៅក្រុងភ្នំពេញ និងក្រុងតាខ្មៅ ខេត្តកណ្ដាល ។
បើតាមក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានបញ្ជាក់ថា សម្រាប់គម្រោងក្នុងដំណាក់កាលទី១ បានចំណាយទឹកប្រាក់ប្រមាណ ២៦៤,៨លានដុល្លារអាមេរិក គម្រោងដំណាក់ទី២ បានចំណាយទឹកប្រាក់ប្រមាណ ១៤៨,២លានដុល្លារអាមេរិក និងគម្រោងរោងចក្រផលិតទឹកស្អាតបាក់ខែងដំណាក់កាលទី៣ គ្រោងនឹងចំណាយថវិកា ២៥៧លានដុល្លារអាមេរិក ។
ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា រាជរដ្ឋាភិបាលកម្ពុជាបានបន្តអនុវត្តតួនាទីជាយុទ្ធសាស្ត្រក្នុងការពង្រឹងការគ្រប់គ្រង និងអភិវឌ្ឍវិស័យទឹកស្អាត ដោយមានការចូលរួមពីប្រតិបត្តិករទឹកស្អាតឯកជន ដើម្បីបំពេញតម្រូវការប្រចាំថ្ងៃសម្រាប់គ្រួសារ និងគាំទ្រតំបន់អាទិភាព ដូចជាតំបន់រោងចក្រសហគ្រាស សួនបណ្តុំសហគ្រាសធុនតូច និង មធ្យម តំបន់សេដ្ឋកិច្ចពិសេស និងតំបន់ប៉ូលសេដ្ឋកិច្ច ដែលនឹងបង្កើតឱកាសការងារ និងជំរុញកំណើនសេដ្ឋកិច្ច ។
ការអភិវឌ្ឍវិស័យទឹកស្អាត និងអាចបំពេញតម្រូវការខ្វះខាតដល់ពលរដ្ឋនៅតំបន់ជាយក្រុង ហើយអ្នកអភិវឌ្ឍន៍លើវិស័យលំនៅឋានក៏នឹងអាចជ្រើសរើសយកតំបន់ជាយក្រុងសម្រាប់ជាទីតាំងអភិវឌ្ឍន៍គម្រោងរបស់ខ្លួនដើម្បីបំពេញទៅតាមកំណើនប្រជាពលរដ្ឋនៅក្រុងភ្នំពេញ ។ ម៉្យាងទៀត បើសិនជារាជរដ្ឋាភិបាលអភិវឌ្ឍន៍ហេដ្ឋារចនាសម្ព័ន្ធទាំងពីរ ( ផ្លូវ ទឹក ភ្លើង ) អ្នកអភិវឌ្ឍន៍នឹងចូលទៅកាន់តំបន់នោះដើម្បីអភិវឌ្ឍន៍ ដូចជា រោងចក្រ សហគ្រាស និងលំនៅឋានជាដើម ៕
Account
Security
Favourite Content