សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បន្ទាប់ពីបង្កើតរាជរដ្ឋាភិបាលថ្មីក្នុងអាណត្តិទី៧ វិនិយោគិនទាំងក្នុង និងក្រៅប្រទេសបានចាប់ផ្ដើមគម្រោងវិនិយោគថ្មីៗ នៅក្នុងប្រទេសកម្ពុជា និងបង្កើតឱកាសការងារជាច្រើនដល់ប្រជាពលរដ្ឋផងដែរ ជាក់ស្ដែងក្រុមហ៊ុនមួយរបស់ចិនមួយបានពង្រីកគម្រោងវិនិយោគរបស់ខ្លួននៅខេត្តកំពង់ស្ពឺ និងត្រូវការកម្លាំងពលកម្មរហូតដល់ជាង ៦០០០នាក់បន្ថែមទៀត ។
ក្រសួងការងារ និងបណ្តុះបណ្តាលវិជ្ជាជីវៈ បានប្រកាសផ្តល់ការគាំទ្រយ៉ាងពេញទំហឹងក្នុងការផ្តល់ជំនួយស្វែងរកកម្លាំងពលកម្មចំនួនជាង៦ពាន់នាក់ ដើម្បីបំពេញកង្វះខាតក្នុងខ្សែចង្វាក់ផលិតកម្មនៃការពង្រីកការវិនិយោគរោងចក្រកាត់ដេរទី២ របស់ក្រុមហ៊ុនចិនធំមួយ នៅក្នុងខេត្តកំពង់ស្ពឺ ដែលគ្រោងនឹងដាក់ឱ្យដំណើរការចង្វាក់ផលិតកម្មនៅពេលខាងមុខនេះ។
នៅក្នុងជំនួបជាមួយនាយកប្រតិបត្តិក្រុមហ៊ុនវិនិយោគលើវិស័យកាត់ដេរមួយកាលពីពេលថ្មីៗនេះ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានសម្តែងអំណរសាទរចំពោះការសម្រេចចិត្តដ៏ត្រឹមត្រូវរបស់ក្រុមហ៊ុនកាត់ដេរ ជេនេរ៉ល អេនធើប្រាយ ហ្កាមិន ក្នុងការពង្រីកការវិនិយោគរោងចក្រកាត់ដេរគម្រោងទី២របស់ខ្លួន នៅក្នុងខេត្តកំពង់ស្ពឺ ដោយបាននាំយកបច្ចេកវិទ្យាចុងក្រោយ ដើម្បីជួយជំរុញខ្សែចង្វាក់ផលិតកម្ម ។
ឯកឧត្តម ហេង សួរ បានមានប្រសាសន៍ថា តាមរយៈបទពិសោធន៍ច្រើនឆ្នាំនៃការដំណើរការរបស់ក្រុមហ៊ុន និងការប្រើប្រាស់នូវបច្ចេកវិទ្យាទំនើប ឯកឧត្តមជឿជាក់ថា ការវិនិយោគនេះនឹងឆ្លើយតបទាំងផ្នែកការងារ បរិស្ថាន និងស្តង់ដារអន្តរជាតិ ព្រមទាំងនឹងទទួលបានការគាំទ្រពីសំណាក់ភាគីពាក់ព័ន្ធ។
ឯកឧត្តមរដ្ឋមន្ត្រីបានជំរុញឱ្យក្រុមហ៊ុនសហការជាមួយទីភ្នាក់ងារជាតិមុខរបរ និងការងារនៃក្រសួងការងារ និងបណ្តុះបណ្តាលវិជ្ជាជីវៈ បន្ថែមលើមធ្យោបាយរបស់ខ្លួន ដើម្បីពិនិត្យមើលលើការស្វែងរកបុគ្គលិកប្រមាណជាង ៦ពាន់នាក់ ដើម្បីចូលបំពេញការងារនៅក្នុងរោងចក្រ ហើយក្រសួងក៏រីករាយក្នុងការជួយជ្រោមជ្រែង ក្នុងការស្វែងរកកម្មករនិយោជិត នៅតាមបណ្តាខេត្តនានានៃប្រទេសកម្ពុជាផងដែរ។
ជាការឆ្លើយតប លោកអគ្គនាយកក្រុមហ៊ុនបានថ្លែងអំណរគុណ ចំពោះឯកឧត្តមរដ្ឋមន្ត្រី ហេង សួរ ដែលបានគាំទ្រនិងផ្តល់ជំនួយ ក្នុងការស្វែងរកកម្លាំងពលកម្ម ដើម្បីជំរុញផលិតកម្មនៃការវិនិយោគថ្មីរបស់ក្រុមហ៊ុន ។ ជាមួយគ្នានេះ ក្រុមហ៊ុននឹងបន្តធ្វើការយ៉ាងជិតស្និតជាមួយនឹងទីភ្នាក់ងារជាតិមុខរបរ និងការងារ ដើម្បីស្វែងរកបុគ្គលិកមកបំពេញការងារឱ្យបានឆាប់រហ័សសម្រាប់ដំណើរការនៃរោងចក្រថ្មី ដែលទើបសាងសង់រួច ។
បើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា បានបង្ហាញពីគម្រោងវិនិយោគជាច្រើនទៅកាន់ខេត្តកំពង់ស្ពឺ និងបានធ្វើឱ្យតម្រូវការដីធ្លីនៅក្នុងខេត្តនេះសម្រាប់សង់រោងចក្រ និងឃ្លាំងមានការកើនឡើងខ្ពស់ ជាពិសេសបានផ្ដល់ឱកាសការងារច្រើនដល់ពលរដ្ឋកម្ពុជាទាំងក្នុងខេត្តកំពង់ស្ពឺផ្ទាល់ និងពីបណ្ដាខេត្តនានាក្នុងប្រទេស ។
រាជរដ្ឋាភិបាលក៏បានយកចិត្តទុកដាក់ជាមួយនឹងកម្មករនិយោជិតក្នុងវិស័យនេះផងដែរ ដោយនាយករដ្ឋមន្ត្រីទាំងនាយករដ្ឋមន្ត្រីចាស់សម្ដេចតេជោ និងនាយករដ្ឋមន្ត្រីថ្មីសម្ដេចធិបតី បានបន្តជួបសំណេះសំណាលជាមួយកម្មករជាបន្តបន្ទាប់នៅតាមបណ្ដារោងចក្រនៅភ្នំពេញ និងបណ្ដាខេត្តនានា ៕
Account
Security
Favourite Content