អ្នកពាក់ព័ន្ធជាង ២៥០នាក់​ បាន​ចូលរួម​សិក្ខា​សាលានៅរាជធានីភ្នំពេញ ដើម្បីកំណត់អនាគតវិស័យកសិកម្មដែលដឹកនាំដោយសហគមន៍កសិកម្ម សម្រាប់កសិករខ្នាតតូច។

ភ្នំពេញ ៖ សិក្ខាសាលាសហគមន៍កសិកម្មប្រចាំឆ្នាំលើកទី ៦ ដែលរៀបចំដោយអង្គការហេហ្វឺកម្ពុជាបានប្រព្រឹត្តទៅដោយមានអ្នកចូលរួមជាង ២៥០នាក់ រួមមានថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ ថ្នាក់ដឹកនាំសហគមន៍កសិកម្ម អ្នកតំណាងវិស័យឯកជន និងដៃគូអភិវឌ្ឍន៍នានា ដើម្បីពិនិត្យមើល​បច្ចុប្បន្នភាព និង​ពិភាក្សាយោបល់សម្រាប់​កំណត់ផ្លូវឆ្ពោះទៅរកការអភិវឌ្ឍ និងលើក​កម្ពស់​សហគមន៍កសិកម្មនៅកម្ពុជា។

សិក្ខាសាលានេះផ្តោតលើប្រធានបទ «ពង្រឹងសមត្ថភាពគ្រប់គ្រង និងការភ្ជាប់អាជីវកម្មទៅអាជីវកម្ម (B2B) សម្រាប់សហគមន៍កសិកម្ម និង​សហគ្រិន​សុខភាពសត្វសហគមន៍»។ សិក្ខាសាលាសហគមន៍កសិកម្ម​នេះគឺជាវេទិកាសន្ទនា និង​ជា​ឱកាសក្នុងការកែលម្អអភិបាលកិច្ចការ និង​​ពង្រីក​កិច្ចសហការរបស់សហគមន៍​ជា​មួយ​ភាគី​ពាក់ព័ន្ធ ការជំរុញទំនាក់ទំនងអាជីវកម្ម (B2B) និងការពង្រឹងប្រព័ន្ធចំណីអាហារ Food Sy​stem។

ឯកឧត្តមបណ្ឌិត  មាស ពិសិដ្ឋ  រដ្ឋលេខាធិការនៃក្រសួងកសិកម្ម រុក្ខាប្រមាញ់ និងនេសាទ បានលើកឡោះងថា ក្រសួងកសិកម្ម រុក្ខាប្រមាញ់ និងនេសាទ នៅតែប្តេជ្ញា​ចិត្តបន្តការគាំទ្រសហគមន៍កសិកម្ម ពង្រឹងការអភិវឌ្ឍអាជីវកម្ម និងជំរុញបរិវត្តកម្មឌីជីថល ។ នៅពេលដែលយុវជនបែរចេញពីវិស័យកសិកម្ម ការធ្វើទំនើបកម្មមានសារៈសំខាន់ណាស់ដើម្បីបន្ថយតម្រូវការពលកម្ម និងបង្កើនប្រសិទ្ធភាព។ ក្រសួងគាំទ្រយុទ្ធសាស្ត្ររបស់អង្គការហេហ្វឺកម្ពុជាយ៉ាងពេញលេញ និងរង់ចាំការសហការបន្តដើម្បីគាំទ្រកសិករ ជាពិសេសក្នុងការដោះស្រាយបញ្ហាទីផ្សារ។

ដោយបាន​ចំណាយរយៈ​ពេល ១ថ្ងៃពេញ អង្គពិធីដែល​មានសហគមន៍ចំនួន៨៤ ដែលតំណាងឱ្យសហគមន៍​កសិកម្ម​ចំនួន ៧៣ និងសហគមន៍​នេសាទចំនួន ១១ រួមជាមួយនឹងសហគ្រិនសុខភាពសត្វសហគមន៍ (CAVE) បាន​ចូលរួម​យ៉ាង​សកម្ម​នៅ​ក្នុង​ការ​​ចែក​រំលែកទៅ​លើ​​ប្រធាន​បទ​សំខាន់ៗដូចជា ការផលិត​ប្រកប​ដោយ​និរន្តរភាព សុខភាពតែមួយ (One Health) និង​ការប្រើប្រាស់បច្ចេកទេសឆ្លាតវៃសម្រាប់សម្រប​ខ្លួនទៅនឹង​បម្រែ​បម្រួល​អាកាសធាតុ​ដែល​ទាក់​ទិន​នឹង​ការចិញ្ចឹមសត្វ ការដាំបន្លែ ការចិញ្ចឹមត្រី ព្រមទាំងគំរូសម្រាប់​ពង្រឹង​ភាពជាដៃគូធុរកិច្ច កសិកម្មប្រកបដោយបរិយាប័ន្ន ។

នៅក្នុង​កិច្ចពិភាក្សានេះ អង្គពិធី​បានស្វែងយល់អំពីដំណើរផ្លាស់ប្តូររបស់សហគមន៍កសិកម្ម ដោយផ្តោត​លើ​ការពង្រីកផលិតកម្ម ការបង្កើនសមត្ថភាពក្នុងការគ្រប់គ្រង និងលទ្ធភាពពង្រីកទីផ្សារ​កសិផល​។ អ្នកចូលរួមបានសង្កត់ធ្ងន់អំពីតម្រូវការបន្ទាន់ក្នុងការធ្វើឱ្យប្រព័ន្ធកសិកម្មមានភាពទំនើប ការពង្រឹងកិច្ចសហការរវាងភាគីពាក់ព័ន្ធ​ទាំងអស់​ និងធានាថា កសិករត្រូវបានដាក់នៅចំចំណុចស្នូល​នៃការអភិវឌ្ឍវិស័យកសិកម្ម​នៅ​កម្ពុជា។

ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានថ្លែងបិទសិក្ខាសាលា ដោយ​បាន​លើកឡើងអំពីតួនាទីដ៏សំខាន់របស់សហគមន៍កសិកម្មទំនើប និងការប្តេជ្ញាចិត្តរបស់រាជរដ្ឋាភិបាលក្នុងការអភិវឌ្ឍវិស័យកសិកម្ម។

ឯកឧត្តមមានប្រសាសន៍ថា៖

«ក្រសួងកសិកម្ម រុក្ខាប្រមាញ់  និងនេសាទ លើកទឹកចិត្តដល់កសិករឱ្យបង្កើតសហគមន៍កសិកម្មបែបទំនើប។ យើងនឹងគាំទ្រកសិករ និងសហគមន៍កសិកម្ម តាមរយៈការផ្តល់ទុនវិនិយោគ បច្ចេកទេស និងទីផ្សារ។ សហគមន៍កសិកម្មគឺជាអនាគតនៃវិស័យកសិកម្មនៅកម្ពុជា ហើយកិច្ចខិតខំប្រឹងប្រែងរបស់ក្រសួង និងអង្គការហេហ្វឺកម្ពុជា ជាជំហានដ៏រឹងមាំឆ្ពោះទៅកាន់អនាគតនេះ»។

លោកបណ្ឌិត ញ៉ែម សារ៉េត នាយកប្រចាំប្រទេសអង្គការហេហ្វឺកម្ពុជា បានលើកឡើងអំពីការប្តេជ្ញាចិត្តក្នុងការគាំទ្រថ្នាក់ដឹកនាំសហគមន៍ និងសហភាពសហគមន៍កសិកម្មសហគ្រិនអភិវឌ្ឍន៍សង្គម (SEUAC)។

លោកបណ្ឌិតបញ្ជាក់ថា៖

«អង្គការគាំទ្រយ៉ាងពេញលេញទស្សនៈវិស័យរបស់រាជរដ្ឋាភិបាលក្នុងជំរុញសហគមន៍កសិកម្ម អោយក្លាយជាសហគមន៍កសិកម្មទំនើបដែលផ្តោតលើទីផ្សារ។ យើងប្តេជ្ញាចិត្ត​ចូលរួម​ពង្រឹងសមត្ថភាពសហគមន៍កសិកម្ម និងសហភាពផ្នែកដឹកនាំ  កសាងសមត្ថភាពអាជីវកម្មកសិកម្ម និងជំរុញការអនុវត្តវិធីសាស្ត្រឆ្លើយតបទៅនឹង​បម្រែ​បម្រួល​អាកាសធាតុ ដោយធ្វើការយ៉ាងជិតស្និទ្ធ​ជាមួយក្រសួងកសិកម្ម រុក្ខាប្រមាញ់ និងនេសាទ ដៃគូអភិវឌ្ឍន៍ និង​វិស័យ​ឯកជននានា ដើម្បីពង្រឹងសហគមន៍កសិកម្មប្រកប​ដោយ​បរិយាបន្ន ភាពធន់ទ្រាំ និងចីរភាព»។

លោកបណ្ឌិត ញ៉ែម សារ៉េត បាន​បន្ថែម​ថា បច្ចុប្បន្ននេះ ក្រុមការងារអង្គការកំពុងធ្វើការជាមួយកសិករដើម្បីពង្រឹងសមត្ថភាពក្នុងការចិញ្ចឹមសត្វ លក់ និងរកចំណូលកាន់តែច្រើន លើខ្សែច្រវាក់តម្លៃផលិតកម្មសត្វ បន្លែ ផ្លែឈើ និងត្រី។ ភ្ជាប់កសិករជាមួយក្រុមជួយខ្លួនឯងដែលដឹកនាំដោយស្ត្រី សហគមន៍កសិកម្ម និងសហភាពសហគមន៍កសិកម្មសហគ្រិនអភិវឌ្ឍសង្គម (SEUAC) ដើម្បីរួមកម្លាំងគ្នាក្នុងការលើកស្ទួយផលិតកម្មកសិកម្ម ទីផ្សារ និងធ្វើអោយតម្លៃផលិតផលកសិកម្មមានស្ថេរភាព។

លោកបញ្ជាក់ថា ៖

«កម្មវិធីរបស់យើងបានពង្រឹងប្រព័ន្ធចំណីអាហារ កសាងជំនាញកសិកម្ម និងការវិនិយោគ និងបញ្ចូលអាជីវកម្មខ្នាតតូច និងមធ្យម (MSMEs) ទៅក្នុងប្រព័ន្ធទីផ្សារកសិកម្មដែលមានការចូលរួម និងខ្សែច្រវាក់តម្លៃ ខណៈពេលដែល យើងក៏កំពុង​ពង្រឹងបណ្តាញអភិវឌ្ឍន៍សហគមន៍ប្រកបដោយចីរភាព។ កម្មវិធីគម្រោង​ស្នូល (Signature Program) បានបង្កើតខ្សែច្រវាក់តម្លៃជុំវិញការការចិញ្ចឹមសត្វ បន្លែ ផ្លែឈើ និង វារីវប្បកម្មនៅកម្ពុជា ពង្រីកផលិតកម្ម និងការភ្ជាប់ទីផ្សារ។ កម្មវិធីស្បៀងអាហារ​អនាគត (Future Foods) បានចូលរួម និងជំរុញការផ្លាស់ប្តូរប្រព័ន្ធលើក​កម្ពស់​ជីវភាព​​អ្នកក្រីក្រ (Pro-Poor Wealth Generation)  និងចំណូលប្រកបដោយចីរភាពសម្រាប់កសិករនៅកម្ពុជា»។

លោកបណ្ឌិត ឌីលីព បានដារី (Dr. Dilip Bhandari) ដែល​ជាប្រធានកម្មវិធីជាន់ខ្ពស់របស់អង្គការហេហ្វឺអន្តរជាតិ បានបង្ហាញពីការងាររបស់អង្គការក្នុងការលើកកម្ពស់សហគមន៍កសិកម្ម ការអនុវត្តវិធីសាស្ត្រចិញ្ចឹមសត្វប្រកបដោយចីរភាព និងវិធីសាស្ត្រសុខភាពតែមួយ (One Health) ដើម្បីធានាថាកសិករមានជីវភាពរីកចម្រើន។ លោកមានប្រសាសន៍ថា៖ «អង្គការហេហ្វឺអន្តរជាតិ យើងជឿជាក់ថា ការកសាងប្រព័ន្ធចំណីអាហារដែលមានភាពធន់ទ្រាំ បានចាប់ផ្តើមពីការគាំទ្រដល់កសិករខ្នាតតូច ជាពិសេសស្ត្រី ដែលមានតួនាទីយ៉ាងសំខាន់ក្នុងប្រព័ន្ធអេកូឡូជីកសិកម្ម និងការពង្រឹងសហគមន៍ដែលគាំទ្រកសិករ ។ នៅកម្ពុជា និងប្រទេសដទៃទៀត យើងមានមោទនភាពក្នុងការចូលរួមជាដៃគូជាមួយរដ្ឋាភិបាល ដៃគូអភិវឌ្ឍន៍ និងវិស័យឯកជន ដើម្បីរួមបង្កើតខ្សែច្រវាក់តម្លៃកសិកម្ម និងការចិញ្ចឹមសត្វ ដែលអាចពង្រីកដោយបញ្ចូលវិធីសាស្ត្រ «សុខភាពតែមួយ» វាផ្តល់ផលប្រកបដោយចីរភាពសម្រាប់សហគមន៍កសិកម្ម ៕