ទីក្រុងតូក្យូ ៖ សហគមន៍ធុរកិច្ចកម្ពុជា និងសហគមន៍ធុរកិច្ចជប៉ុន បានឯកភាពគ្នាសហការដើម្បីបង្កើន និងជំរុញការវិនិយោគទុន បន្តបណ្តាក់ទុនវិស័យពាណិជ្ជកម្មឱ្យកាន់តែខ្លាំង។

ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជា អមដោយ ឯកឧត្តម ទុយ រី ឯកអគ្គរាជទូតកម្ពុជាប្រចាំប្រទេសជប៉ុន នាសៀលថ្ងៃពុធ ទី៨ ខែឧសភា ឆ្នាំ២០២៤ បានដឹកនាំគណៈប្រតិភូកម្ពុជា ចូលរួមជំនួបផ្គូផ្គងធុរកិច្ចនៅទីស្នាក់កណ្តាលនៃអង្គការពាណិជ្ជកម្មក្រៅប្រទេសរបស់ជប៉ុន (JETRO) ក្នុងគោលបំណងផ្សាភ្ជាប់ទំនាក់ទំនងសហគមន៍ធុរកិច្ចទាំងពីរឱ្យកាន់តែស្អិតល្មួតបន្ថែមមួយកម្រិតទៀត។នេះជាវេទិកាមួយដើម្បីទាក់ទាញអ្នកវិនិយោគជប៉ុនឱ្យមកស្វែងរកឱកាសវិនិយោគនៅកម្ពុជា។

ក្នុងជំនួបនោះ ឯកឧត្តមឧបនាយករដ្ឋមន្ត្រី បានថ្លែងអំណរគុណជូនចំពោះភាគីមិត្តដែលបានរៀបចំកម្មវិធីផ្គូរផ្គងដ៏មានតម្លៃនាឱកាសបេសកកម្មគោះទ្វារវិនិយោគរបស់ ក្រុមប្រឹក្សាអភិវឌ្ឍន៍កម្ពុជា នាពេលនេះ។

ឯកឧត្តមឧបនាយករដ្ឋមន្ត្រី ក៏បានគូសបញ្ជាក់ផងដែរថា ៖ សហគ្រាសដែលបានចូលរួមក្នុងជំនួបផ្គូរផ្គងសុទ្ធសឹងតែជាសហគ្រាសដែលបានចូលរួមក្នុងសិក្ខាសាលាវិនិយោគកម្ពុជាឆ្នាំ២០២៣ ដែលបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី១៩ ខែធ្នូ ឆ្នាំ២០២៣ នៅទីក្រុងតូក្យូ។

ក្នុងស្មារតីនេះ ឯកឧត្តមឧបនាយករដ្ឋមន្ត្រី បានបង្ហាញក្តីសង្ឃឹមយ៉ាងមុតមាំថាវិស័យឯកជនដែលបានចូលរួមនឹងខិតខំក្តាប់ជាប់នូវឱកាសមាសពេជ្រនេះ សំដៅទាក់ទាញសហគ្រាសដែលមានវត្តមានឱ្យទៅបណ្តាក់ទុនវិនិយោគនៅលើទឹកដីកម្ពុជា។

គួរជម្រាបជូនផងដែរថា៖ក្រុមហ៊ុនដែលបានអញ្ជើញចូលរួមក្នុងជំនួបផ្គូផ្គងខាងលើគឺជាក្រុមហ៊ុនដែលបាននិងកំពុងបណ្តាក់ទុនវិនិយោគលើវិស័យភស្តុភារកម្ម កម្មន្តសាលអាលុយមីញ៉ូមកសិកម្មនិងកសិ-ឧស្សាហកម្ម ឱសថនិងព័ត៌មានវិទ្យានិងសារគមនាគមន៍។

​ដោយឡែក កាលពីព្រឹកថ្ងៃដដែលក្នុងទីក្រុងតូក្យូ ដោយមានកិច្ចសហការជាមួយមជ្ឈមណ្ឌលអាស៊ាន-ជប៉ុន (AJC) និងអង្គការពាណិជ្ជកម្មក្រៅប្រទេសរបស់ជប៉ុន(JETRO) ក្រុមប្រឹក្សាអភិវឌ្ឍន៍កម្ពុជាក៏បានរៀបចំសិក្ខាសាលាស្តីពីការវិនិយោគនៅកម្ពុជា នៅសាលមហោស្រពនៃសកលវិទ្យាល័យអង្គការសហប្រជាជាតិ ក្រោមអធិបតីភាព ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ក្នុងគោលបំណងផ្សព្វផ្សាយអំពីសក្តានុពល និងកាលានុវត្តភាពវិនិយោគនៅកម្ពុជាទៅកាន់សហគ្រាសរបស់ជប៉ុន។ វេទិកានេះមានការអញ្ជើញចូលរួមពីសំណាក់តំណាងស្ថានតំណាងបរទេសប្រចាំប្រទេសជប៉ុន ក្រសួងសេដ្ឋកិច្ច ពាណិជ្ជកម្ម និងឧស្សាហកម្មនៃប្រទេសជប៉ុន សម្ព័ន្ធសភាមិត្តភាពកម្ពុជា-ជប៉ុន សមាគមជប៉ុន-កម្ពុជា និងវិស័យឯកជនសរុបប្រមាណ ១៥០រូប។

ក្នុងវេទិកានេះឯកឧត្តម ​ស៊ុន​ ​ចាន់​ថុល​ ​ក៏បាន​រំលេច​អំពី​សក្តានុពល​វិជ្ជមាន​របស់​កម្ពុជា​មាន​ជាអាទិ៍៖​ ​ស្ថិរភាព​នយោបាយ​ ស្ថានភាព​ម៉ា​ក្រូ​សេដ្ឋកិច្ច​ដែល​មាន​លំនឹង​វិជ្ជ​មាន កម្លាំង​ពលកម្ម​វ័យក្មេង​ប្រកបដោយ​ថាម វន្ត​រាជរដ្ឋាភិបាល​ដែល​មាន​ទំនោរ​គាំទ្រ​ដល់​ការ​រីក​លូតលាស់​នៃ​ធុរកិច្ច​របប​វិនិយោគ​ដែល​មាន​ភាព​ទាក់ទាញ​និង​អនុគ្រោះ​ ​និង​ហេ​ដ្ឋា​រចនា​ស​ម្ព័ន្ធ​អន្តរ​មធ្យោបាយ​ដែល​បាន​ ​និង​កំពុង​អភិវឌ្ឍ​ឱ្យ​កាន់តែ​មាន​ភាព​តភ្ជាប់​ ​និង​ប្រទាក់​ក្រឡា​។​

ឯកឧត្តម​បាន​បង្ហាញ​សុទិដ្ឋិនិយម​ថា​វិនិ​យោគិន​ ​និង​ធុ​រ​ជន​ដែល​បាន​អញ្ជើញ​ចូលរួម​នា​ពេលនេះ​នឹង​អញ្ជើញ​មក​សិក្សា​ស្វែងយល់​ដោយ​ផ្ទាល់​នៅ​កម្ពុជា​ ​ក៏ដូចជា​ពាំ​នាំ​នូវ​បច្ចុប្បន្នភាព​នៃ​បរិយាកាស​វិនិយោគ​នៅ​កម្ពុជា​ទៅកាន់​សហគមន៍​ធុរកិច្ច​ជប៉ុន​ឱ្យ​កាន់តែ​ទូលំទូលាយ​បន្ថែម​មួយ​ក​ម្រិ​ត​ទៀត​។​

ក្នុង​វេទិកា​នេះ​ វិ​ស័យ​ឯកជន​ក៏បាន​ចូលរួម​វេទិកា​ពិភាក្សា​ ​ស្តីពី​សក្តានុពល​វិនិយោគ​លើ​វិ​ស័​យ​ថ្មីៗ​នៅ​កម្ពុជា​ដោយ​បាន​គូស​បញ្ជាក់​អំពី​ភាព​ងាយស្រួល​ក្នុង​ការ​ប្រកប​អាជីវកម្ម​នៅ​កម្ពុជា​ ​ពិពិធ​ភាព​នៃ​សកម្មភាព​វិនិយោគ​ដែល​ពោរពេញ​ដោយ​ឱកាស​ ​និង​ការ​គាំទ្រ​ផ្នែក​គោល​នយោបាយ​ប្រកបដោយ​បុ​រេ​សកម្ម​ពីសំណាក់​រាជរដ្ឋាភិបាល​លើ​អនុ​វិ​ស័យ​ថាមពល​ក​កើតឡើងវិញ​ ​ខ្សែ​ច្រវាក់​ផលិតកម្ម​បៃតង​ ​និង​សេដ្ឋកិច្ច​ឌី​ជី​ថល​ដែល​កំពុងតែ​ដើរ​ស្រប​នឹង​និន្នាការ​តំបន់​ ​និង​សកល​។

​ឯកឧត្តមឧបនាយករដ្ឋមន្ត្រី ក៏បានផ្តល់កិត្តិយសអញ្ជើញបើកកម្មវិធីផ្គូផ្គងធុរកិច្ចរវាងសមាគមឧកញ៉ាកម្ពុជា សភាពាណិជ្ជកម្មកម្ពុជា និងសមាគមកម្ពុជា-ជប៉ុន ៕