សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងពាណិជ្ជកម្មបានកំណត់អត្តសញ្ញាណផលិតផលសម្គាល់ភូមិសាស្ត្រ (GI) ចំនួន៣ សម្រាប់ការនាំចេញទៅកាន់ទីផ្សារប្រទេសចិន ដោយស្វែងរកការគាំទ្រសម្រាប់ការផ្សព្វផ្សាយផលិតផលទាំង៣ នៅក្នុងប្រទេសចិន និងជាឱកាសដែលវិនិយោគក្នុងស្រុកអាចបង្ហាញពីផលិតរបស់កម្ពុជាទៅកាន់ទីផ្សារចិន និងទីផ្សារអន្តរជាតិ ដើម្បីទទួលបានដៃគូថ្មីៗ ។
កាលពីពេលកន្លងទៅថ្មីៗនេះ ក្រសួង ក៏ដូចជាអង្គភាពពាក់ព័ន្ធបានបើកកិច្ចប្រជុំមួយដោយមានការចូលរួមរវាងលេខាធិការនៃគណៈកម្មាធិការជាតិកម្មសិទ្ធិបញ្ញា និងនាយកកម្មសិទ្ធិបញ្ញានៃក្រសួងពាណិជ្ជកម្ម និងអង្គការកម្មសិទ្ធិបញ្ញាពិភពលោក (WIPO) និងបានបង្ហាញពីគម្រោងលើកកម្ពស់ផលិតផលសម្គាល់ភូមិសាស្ត្ររបស់កម្ពុជា និងផលិតផលម៉ាកយីហោរួមសម្រាប់ទីផ្សារចិន។
កិច្ចប្រជុំក៏បានពិភាក្សាអំពីវិធីលើកកម្ពស់កេរ្តិ៍ឈ្មោះផលិតផល និងទីផ្សារពាណិជ្ជកម្មតាមប្រព័ន្ធអេឡិចត្រូនិក ក៏ដូចជាការចូលរួមក្នុងការតាំងពិព័រណ៍អន្តរជាតិនៅក្នុងប្រទេសចិនផងដែរ។
ប្រធាននាយកដ្ឋានកម្មសិទ្ធិបញ្ញានៃក្រសួងពាណិជ្ជកម្ម បានបញ្ជាក់ថា កិច្ចប្រជុំនេះមានគោលបំណងរៀបចំវគ្គបណ្តុះបណ្តាលស្តីពីការការពារកម្មសិទ្ធិបញ្ញានៅក្នុងប្រទេសចិន និងសម្របសម្រួលជាមួយសមាគមម៉ាកសម្គាល់ភូមិសាស្ត្រ និងទំនិញ និងសមាគមពាណិជ្ជនិមិត្តសញ្ញារួម ឬអ្នកផលិត ក្នុងការជ្រើសរើសផលិតផលដែលមានសក្តានុពល និងគុណភាពខ្ពស់សម្រាប់ការចុះបញ្ជី ការការពារ និងការនាំចេញទៅកាន់ប្រទេសចិន។
លោក សួន វិជ្ជា ប្រធាននាយកដ្ឋានកម្មសិទ្ធិបញ្ញានៃក្រសួងពាណិជ្ជកម្មបានមានប្រសាសន៍ថា ៖ បច្ចុប្បន្ន ប្រទេសកម្ពុជាមានផលិតផលសម្គាល់ភូមិសាស្ត្រចំនួន៧ និងម៉ាកយីហោរួមចំនួន ៨ ។ ផលិតផលចំនួន ៣ ក្នុងចំណោមនោះជាផលិតផលសក្តានុពលសម្រាប់នាំចេញទៅកាន់ទីផ្សារប្រទេសចិន រួមមាន៖ ស្ករត្នោតកំពង់ស្ពឺ អំបិលកំពត-កែប និងទឹកឃ្មុំព្រៃមណ្ឌលគិរី។
ជាមួយគ្នានេះ ដើម្បីឱ្យគម្រោងនេះទទួលបានជោគជ័យ ក្រសួងបានជំរុញឱ្យអង្គការកម្មសិទ្ធិបញ្ញាពិភពលោក (WIPO) រៀបចំឯកសារទស្សនទានច្បាស់លាស់ និងងាយស្រួលក្នុងពេលអនុវត្ត។
សូមបញ្ជាក់ថា បច្ចុប្បន្ននេះ ប្រទេសកម្ពុជាមានផលិតផលមួយចំនួនដែលត្រូវបានកំណត់ថាជាផលិតផលសម្គាល់ភូមិសាស្ត្រដូចជា ម្រេចកំពត ស្ករត្នោតកំពង់ស្ពឺ ក្រូចថ្លុងកោះទ្រង់ និងទឹកឃ្មុំព្រៃមណ្ឌលគិរី ។ ដោយឡែកមានតែម្រេចកំពត និងស្ករត្នោតកំពង់ស្ពឺទេ ដែលត្រូវបានចុះបញ្ជីជាអន្តរជាតិជាផលិតផលសម្គាល់ភូមិសាស្ត្រ នៅលើទីផ្សារអឺរ៉ុប។
យោងតាមក្រសួងពាណិជ្ជកម្ម បានលើកទឹកចិត្តឱ្យពាណិជ្ជករចូលរួមពិព័រណ៍ទំនិញអ្នកប្រើប្រាស់អន្តរជាតិចិនលើកទី៤ (The fourth China International Consumer Products Expo) ឱ្យបានច្រើន ជាពិសេសក្រុមហ៊ុនក្នុងស្រុក ដើម្បីនាំទំនិញ ឬផលិតផលដែលកម្ពុជាផលិតបានទៅកាន់ទីផ្សារអន្តរជាតិ ខណៈពិព័រណ៍នេះមានគោលបំណងបង្ហាញ និងផ្សព្វផ្សាយផលិតផលពិសេសៗរបស់ទីក្រុងសម្ព័ន្ធមេត្រីអន្តរជាតិចំនួន៤៤របស់ខ្លួន និងជួយសម្រួលដល់កិច្ចសហប្រតិបត្តិការជាក់ស្ដែងបន្ថែមទៀត។
ក្រសួងពាណិជ្ជកម្ម ក៏បានបញ្ជាក់ថា គណៈកម្មការរៀបចំពិព័រណ៍បានផ្តល់ស្តង់មួយចំនួនសម្រាប់ដាក់តាំងបង្ហាញផលិតផលសក្តានុពលកម្ពុជា ស្របតាមប្រភេទផលិតផល និងបរិមាណដែលព្រឹត្តិការណ៍នេះនឹងប្រព្រឹត្តទៅចាប់ពីថ្ងៃទី១៣ ដល់ទី១៨ ខែមេសា ឆ្នាំ២០២៤ នៅមជ្ឈមណ្ឌល Hainan International Convention Centerទីក្រុង ហៃគូ ខេត្តហៃណាន ប្រទេសចិន។
ឯកឧត្តម ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានឱ្យដឹង ពិព័រណ៍ទំនិញប្រើប្រាស់ចិនអន្តរជាតិដូចរាល់ឆ្នាំដែរ ដោយភាគីចិន ចង់ឱ្យពាណិជ្ជករអន្តរជាតិ រួមទាំងកម្ពុជា មានឱកាសក្នុងការដាក់តាំងបង្ហាញម៉ាកទំនិញរបស់ខ្លួន ដើម្បីទទួលបានដៃគូថ្មីៗ និងទីផ្សារបន្ថែមទៀត សម្រាប់ផលិតផលរបស់ខ្លួន។
យោងតាម សម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) បានឱ្យដឹងថា កាលពីខែមេសាឆ្នាំមុន មានម៉ាកផលិតផលជាង ៣ ពាន់នៃប្រទេស និងតំបន់ចំនួន ៦៥ បានចូលរួមតាំងបង្ហាញក្នុងពិព័រណ៍នេះ ដែលបានទាក់ទាញទស្សនិកជនលើសពី ៣២ ម៉ឺននាក់ ហើយសម្រាប់ ពិព័រណ៍ទំនិញអ្នកប្រើប្រាស់អន្តរជាតិចិនឆ្នាំនេះ ជាឱកាស ដែលអ្នកវិនិយោគក្នុងស្រុក អាចបង្ហាញពីផលិតរបស់ខ្លួន ទៅកាន់ទីផ្សារចិន និងទីផ្សារអន្តរជាតិ៕
Account
Security
Favourite Content