សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពព័ត៌មានពី BBC បានរាយការណ័ថា កំណើនសេដ្ឋកិច្ចចិនកើនឡើងយឺត ដោយសារភាពតានតឹងពាណិជ្ជកម្មដែលបង្កឡើងដោយពន្ធគយរបស់ប្រធានាធិបតីអាម៉េរិក Donald Trump និងវិបត្តិទីផ្សារអចលនទ្រព្យដែលបន្តកើតមាននៅក្នុងស្រុក។
យោងតាមតួលេខផ្លូវការបានបង្ហាញថា កំណើនសេដ្ឋកិច្ចចិនកើនឡើង ៥,២% ក្នុងរយៈពេលបីខែនៃត្រីមាសទី២ ដោយគិតចាប់ពីខែមេសា ដល់ខែមិថុនា បើធៀបនឹងរយៈពេលដូចគ្នាកាលពីឆ្នាំមុន។ យ៉ាងណាមិញ តួរលេខនេះបានធ្លាក់ចុះធៀបនឹងត្រីមាសទី១ (ខែមករាដល់ខែមីនា) ដែលមាន ៥,៤% ប៉ុន្តែចិនអាចចៀសផុតពីការធ្លាក់ចុះសេដ្ឋកិច្ចខ្លាំង ដោយសារទីក្រុងប៉េកាំងចេញវិធានការជួយទ្រទ្រង់សេដ្ឋកិច្ច និងកិច្ចព្រមព្រៀងកាត់បន្ថយសម្ពាធពាណិជ្ជកម្មជាមួយនឹងទីក្រុងវ៉ាស៊ីនតោន។ ការិយាល័យស្ថិតិជាតិរបស់ចិនបាននិយាយនៅក្នុងសេចក្តីថ្លែងការណ៍មួយថា សេដ្ឋកិច្ចរបស់ខ្លួនអាចទប់ទល់នឹងសម្ពាធបាន និងធ្វើឱ្យមានភាពប្រសើរឡើងជាលំដាប់ ទោះបីជាមានបញ្ហាប្រឈមក៏ដោយ។
នៅព្រឹកថ្ងៃអង្គារ៍សប្ដាហ៍នេះ តួលេខផ្លូវការនៅក្នុងខែមិថុនា បានបង្ហាញពីការធ្លាក់ចុះនៃតម្លៃផ្ទះថ្មីដែលទើបសាងសង់រួចក្នុងល្បឿនលឿនបំផុតប្រចាំខែធៀបទៅនឹងខែមុនៗ។ ទិន្នន័យនេះបង្ហាញថា វិស័យអចលនទ្រព្យរបស់ចិនកំពុងបន្តជួបការលំបាក បើទោះបីជាមានវិធានការជាច្រើនដើម្បីគាំទ្រដល់តម្លៃអចលនទ្រព្យក៏ដោយ ខណៈដែលអ្នកសេដ្ឋកិច្ចមួយចំនួនបានព្យាករណ៍ថា ចិនប្រហែលជាមិនអាចសម្រេចគោលដៅកំណើនសេដ្ឋកិច្ចប្រចាំឆ្នាំ២០២៥ ក្នុងរង្វង់ ៥% បាននោះទេ ឬអាចស្ថិតនៅកម្រិត ៤% តែប៉ុណ្ណោះ។
គួរឲ្យបញ្ជាក់ដែរថា សង្គ្រាមពន្ធគយដ៏តានតឹងរវាងប្រធានាធិបតីចិន Xi Jinping និង Trump បាននាំឱ្យអាម៉េរិកដាក់ពន្ធលើការនាំចូលពីចិន ១៤៥% ហើយចិនបានវាយបកមកវិញជាមួយនឹងពន្ធ ១២៥% លើការនាំចូលពីអាម៉េរិក។ នៅកិច្ចប្រជុំក្នុងទីក្រុងហ្សឺណែវកាលពីខែឧសភា មហាអំណាចទាំងពីរបានព្រមព្រៀងគ្នាបន្ថយសម្ពាធពាណិជ្ជកម្មសម្រាប់រយៈពេលខ្លី ៩០ ថ្ងៃ ដោយអាម៉េរិកបានទម្លាក់ពន្ធលើទំនិញប្រទេសចិនពី ១៤៥% មកត្រឹម ៣០% ខណៈដែលចិនបន្ទាបពន្ធលើទំនិញនាំចូលពីអាម៉េរិកពី ១២៥% មកត្រឹម ១០%។ យ៉ាងណាក្ដី ទោះបីជាការព្រមព្រៀងគ្នាកាត់បន្ថយសម្ពាធពាណិជ្ជកម្មរយៈពេលខ្លីក៏ដោយ ប៉ុន្តែភាគីទាំងពីរបានចោទប្រកាន់គ្នាពីបទរំលោភលើកកិច្ចព្រមព្រៀង៕
Account
Security
Favourite Content