សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ វិនិយោគិនចិន មកពីក្រុមហ៊ុន និងសហគ្រាសចំនួន២១ បានមកទស្សនកិច្ចនៅក្នុងប្រទេសកម្ពុជា ដើម្បីស្វែងយល់ពីសក្ដានុពលវិនិយោគ ខណៈចិនកំពុងឈរនៅលំដាប់ទី១ ដែលមានបណ្តាក់ទុនវិនិយោគច្រើនជាងគេនៅកម្ពុជាក្នុងឆ្នាំ២០២៥នេះ ។
នៅក្នុងដំណើរទស្សនកិច្ច និងស្វែងរកការវិនិយោគពីសំណាក់វិនិយោគិនចិន ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានជួបសម្តែងការគួរសម និងណែនាំឱកាសវិនិយោគជូនដល់វិនិយោគិនចិនមកពីសហគ្រាសចំនួន ២១ ក្នុងវិស័យនានា ដូចជា អប់រំ, សុខាភិបាល ភោជនីយដ្ឋាន ភេសជ្ជៈ ប្រព័ន្ធផ្សព្វផ្សាយ និងសម្ភារៈបរិក្ខាសំណង់ ។
នៅក្នុងឱកាសនោះដែរ ឯកឧត្តមបណ្ឌិតសភាចារ្យរដ្ឋលេខាធិការ បានគូសបញ្ជាក់ពីការចូលរួមចំណែកយ៉ាងសកម្មរបស់ក្រសួងសេដ្ឋកិច្ច និងហិរញ្ញវត្ថុ ក្នុងការជំរុញកំណើនសេដ្ឋកិច្ចជាតិ និងលើកស្ទួយធុរកិច្ច ការវិនិយោគ តាមរយៈការអនុវត្តគោលនយោបាយនានារបស់រាជរដ្ឋាភិបាល ជាពិសេស ការអនុវត្ត «កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤» និង «កម្មវិធីពិសេសជំរុញការវិនិយោគក្នុងភូមិភាគឦសាន» ដែលស្ថិតក្រោមឆ័ត្រគណៈកម្មាធិការគោលនយោបាយសេដ្ឋកិច្ច និង ហិរញ្ញវត្ថុ ។
កម្មវិធីពិសេសទាំង ២ នេះ មានគោលដៅជំរុញការវិនិយោគតាមរយៈការផ្តល់ការលើកទឹកចិត្តបន្ថែមដល់គម្រោងវិនិយោគ ដែលក្នុងនោះ ខេត្តព្រះសីហនុ មានសក្តានុពលលើវិស័យទេសចរណ៍ ឧស្សាហកម្ម ឡូជីស្ទីក អចលនវត្ថុ និងពាណិជ្ជកម្មផលិតផលឧស្សាហកម្ម។ ចំណែកឯ នៅខេត្តភូមិភាគឦសាន មានសក្តានុពលលើវិស័យកសិកម្ម, កសិ-ឧស្សាហកម្ម និង ទេសចរណ៍ ។ កម្មវិធីពិសេសនេះ មានយន្តការសម្របសម្រួលពិសេស ដែលមានសមាសភាពអន្តរក្រសួងស្ថាប័ន ដើម្បីសម្រួលនីតិវិធី បានឆាប់រហ័ស មានប្រសិទ្ធភាព និងតម្លាភាពជូនដល់វិនិយោគិន ។
គួររម្លឹកថា វត្តមានរបស់វិនិយោគិនចិននៅកម្ពុជាបង្កើតការងារដល់ប្រជាពលរដ្ឋខ្មែរ តាមរយៈការវិនិយោគលើគម្រោងថ្មីក្នុងតំបន់សក្ដានុពល ជាពិសេសរាជធានីភ្នំពេញ ខេត្តព្រះសីហនុ និងបណ្ដាខេត្តជាប់ព្រំដែន ដូចជាស្វាយរៀង និងបន្ទាយមានជ័យ ។ជាការកត់សម្គាល់ គម្រោងវិនិយោគធំៗជាច្រើននៅកម្ពុជា គឺមានប្រភពទុនមកពីប្រទេសចិន និងគ្រប់គ្រងដោយវិនិយោគិន ដូចជាសំណង់អគារខ្ពស់ៗ រោងចក្រឧស្សាហកម្មធុនធំ រោងចក្រផលិតសំបកកង់យានយន្ត រោងចក្រដំឡើង និងផ្គុំរថយន្តជាដើម ៕
Account
Security
Favourite Content