ត្បូងឃ្មុំ ៖ រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានលើកឡើងថា បងប្អូនប្រជាកសិករត្រូវគិតគូរពីនិរន្តរភាពសេដ្ឋកិច្ច និងផែនការច្បាស់លាស់ក្នុងការពង្រីកការចិញ្ចឹមគោរបស់បងប្អូន បូករួមទាំងយុទ្ធសាស្ត្រ និងសមត្ថភាពដាំស្មៅជាចំណីគោ ពិនិត្យមើលតម្រូវការទីផ្សារ ព្រមទាំងការកាត់បន្ថយចំណាយមិនចាំបាច់។ បន្ថែមពីនេះទៅទៀត ត្រូវមានការសហការ និងធ្វើការរួមគ្នា និងប្រើប្រាស់កិច្ចសន្យាកសិកម្មក្នុងការទិញលក់ជាដើម។

លោក ហ៊ត លាង ជាកសិករចិញ្ចឹមគោម្នាក់រស់នៅក្នុងខេត្តត្បូងឃ្មុំ ដោយទទួលបានការបណ្ដុះបណ្ដាលពីមន្រ្តីជំនាញនៃមន្ទីរកសិកម្មខេត្តត្បូងឃ្មុំ អំពីបច្ចេកទេសចិញ្ចឹម និងបង្កាត់ពូជគោបែបលក្ខណៈបច្ចេកទេស បានធ្វើឱ្យកសិករវ័យជាង ៥០ឆ្នាំរូបនេះប្ដូរពីការចិញ្ចឹមគោបែបលក្ខណៈគ្រួសារមកជាការចិញ្ចឹមគោបែបលក្ខណៈបច្ចេកទេសវិញ និងទទួលបានផលល្អប្រសើរ។

លោក ហ៊ត លាង បានបញ្ជាក់ឱ្យដឹងថា កន្លងមកលោកចិញ្ចឹមគោតាមបែបប្រពៃណី ដូចជាការលែងឱ្យគោស៊ីស្មៅដោយខ្លួនឯង នៅតាមវាលស្រែ-ចម្ការ និងការបណ្ដោយឱ្យគោបន្តពូជខ្លួនឯងជាដើម។ ការធ្វើបែបនេះ មិនបានធ្វើឱ្យការចិញ្ចឹមគោ របស់លោកប្រសើរនោះទេ ទើបលោក ចង់បោះបង់ការចិញ្ចឹមនៅឆ្នាំ២០១៦ ព្រោះមិនចំណេញ។

លោកបានមានប្រសាសន៍ 

“នៅឆ្នាំ២០១៦ ខ្ញុំបានទទួលការណែនាំជាបន្តបន្ទាប់ ពីមន្ទីរកសិកម្មខេត្ត ពីរបៀបចិញ្ចឹមគោតាមបច្ចេកទេសធ្វើឱ្យការចិញ្ចឹមគោការបែបបច្ចេកទេស ធ្វើឱ្យការចិញ្ចឹមគោ របស់លោកកាន់តែប្រសើរឡើង ខ្ញុំអាចលក់គោ២ ទៅ៣ដង ក្នុងមួយឆ្នាំ។”

ពេលនោះមន្ត្រីជំនាញពេទ្យសត្វនៃមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានចុះណែនាំ និងផ្តល់បច្ចេលទេសចិញ្ចឹមមានដូចជាការផ្តល់ចំការជ្រើសរើស និងបង្កាត់ ពូជ ការថែទាំ ការចាក់ថ្នាំការពារជំងឺឆ្លងការទម្លាក់សត្វល្អិត និងការធ្វើជីវសុវត្ថិភាព ឱ្យយើងដាំស្មៅ ធ្វើរោងឱ្យមានរបៀបរៀបរយមិនលែងគោពាសវាលពាសកាល ហើយគាត់មានផ្ដល់បច្ចេកទេស បង្រៀនដល់កសិដ្ឋាន ខ្ញុំធ្វើតាមក្បួនបច្ចេកទេស នោះធ្វើឱ្យកសិដ្ឋានមានការរីកចម្រើនជាបន្តបន្ទាប់។

លោក ហ៊ត លាង បានបន្ថែមថា បច្ចុប្បន្ននេះនៅក្នុងកសិដ្ឋានរបស់លោកមានគោសរុបជាង ៤០០ក្បាល ដោយជាមធ្យមអាចលក់បានចាប់ពី ៦ ទៅ ៨ក្បាលក្នុង១ថ្ងៃ ដោយគោមួយក្បាលលក់ចេញមានទម្ងន់ជាង៣០០គីឡូក្រាម ហើយក្រៅពីចំណូលបានពីលក់គោរស់ នៅមានចំណូលដ៏សំខាន់មួយទៀតគឺលក់លាមកគោ ក្នុង១ឆ្នាំលក់បានប្រមាណជាង៨០លានរៀលទៀតផង។  សូមជម្រាបជូនថា បច្ចុប្បន្ន លោក ហ៊ត លាង ជាអ្នកចិញ្ចឹមគោយកសាច់ និងគោយកកូន ដែលភាគច្រើនជាគោពូជប្រាម៉ាន់ស និងក្រហម ហើយបច្ចុប្បន្ននេះលោកមានគោចំនួន ៧៨០ ក្បាល បូករួមទាំងការដាំស្មៅចំនួន ១៣ហិកតាផងដែរ។ មុខរបរចិញ្ចឹមគោ តាមបែបបច្ចេកទេស បានធ្វើឱ្យគ្រួសារលោក ហ៊ួត លៀង មានជីវភាពប្រសើរឡើង៕