សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពពី Global Times បានលើកឡើងថា តម្លៃមាសបានឡើងថ្លៃដល់កម្រិតខ្ពស់កាលពីថ្ងៃពុធកន្លងទៅនេះ ហើយវាអាចនឹងឡើងថ្លៃបន្ថែមទៀតនៅប៉ុន្មានខែខាងមុខទៀត។
តម្លៃមាសនៅលើទីផ្សារអន្តរជាតិបានឡើងថ្លៃដល់កម្រិតខ្ពស់ ០,៥ ភាគរយ ឬ ២ ៤៨០ ដុល្លារក្នុងមួយអោន។ ចាប់តាំងពីខែមីនាមក តម្លៃមាសបានបន្តកើនឡើងរហូតដល់ ២ ៤០០ ដុល្លារក្នុងមួយអោន។ ក្រុមអ្នកវិភាគបាននិយាយថា ទោះបីជាតម្លៃមាសកំពុងឡើងដល់កម្រិតខ្ពស់ក៏ដោយ ប៉ុន្តែវានៅតែមានឱកាសច្រើនក្នុងការឡើងថ្លៃបន្ថែមទៀត ដោយសារភាពមិនច្បាស់លាស់នៅក្នុងសេដ្ឋកិច្ចពិភពលោក និងលទ្ធភាពដែលប្រទេសជាច្រើននឹងបន្តការបន្ធូរបន្ថយរូបិយវត្ថុរបស់ពួកគេដែលអាចនាំឱ្យមានអតិផរណា។
យោងតាមរបាយការណ៍ព្យាករណ៍ដោយប្រធានការិយាល័យវិនិយោគរបស់ធនាគារកណ្តាលអាមេរិកបានឲ្យដឹងថា តម្លៃមាសអាចនឹងឡើងថ្លៃដល់ ៣ ០០០ ដុល្លារក្នុងមួយអោនក្នុងរយៈពេល ១២ ទៅ ១៨ ខែបន្ទាប់ ហើយតម្លៃដ៏ខ្ពស់នេះនឹងត្រូវបានជំរុញយ៉ាងខ្លាំងពីការកើនឡើងនៃតម្រូវការមិនមែនសម្រាប់ពាណិជ្ជកម្ម។ បច្ចុប្បន្ននេះ ការទិញមិនមែនពាណិជ្ជកម្មបានរក្សាតម្លៃមាសជាមធ្យមប្រហែល ២ ២០០ ដុល្លារក្នុងមួយអោនបើប្រៀបធៀបនឹងឆ្នាំមុន ដោយសារមាសគឺជាទ្រព្យសម្បត្តិមានសុវត្ថិភាព ចំពេលសេដ្ឋកិច្ចពិភពលោកមានភាពមិនប្រាដកប្រជា។
ជាក់ស្តែង នៅទីផ្សារក្នុងស្រុករបស់ប្រទេសចិន តម្លៃមាសនៅទីក្រុងសៀងហៃបានឡើងថ្លៃដល់ ៨០,០៨ ដុល្លារក្នុងមួយក្រាម ដែលកើនឡើង ១,៥៤ ភាគរយធៀបនឹងកាលជួញដូរពីលើកមុន។ មិនត្រឹមតែប៉ុណណ្ណោះ តម្លៃមាសគ្រឿងអលង្ការមួយចំនួនបានឡើងដល់ ១០៣ ដុល្លារក្នុងមួយក្រាម។ អ្នករស់នៅទីក្រុងសៀងហៃម្នាក់អាយុ ៦៥ ឆ្នាំ បានលើកឡើងថា គាត់បានប្រញាប់ទៅហាងមាសមួយដើម្បីទិញមាស ២០ ក្រាម ប៉ុន្តែគាត់ស្តាយដែលមិនបានទិញច្រើនជាងនេះ។
ក្នុងអំឡុងពេលប៉ុន្មានខែថ្មីៗនេះ អតិថិជនជាច្រើនបានសាកសួរអំពីតម្លៃមាស និងជំរុញការទិញមាស ដើម្បីធានាសុវត្ថិភាពហិរញ្ញវត្តុរបស់ពួកគេ។ នៅក្នុងត្រីមាសទីមួយនៃឆ្នាំ ២០២៤ តម្រូវការមាសនៅក្នុងទីផ្សារប្រទេសចិនបានឈានដល់ ១១០,៥ តោន ដែលកើនឡើង ៦៨ ភាគរយបើធៀបនឹងរយៈពេលដូចគ្នាកាលពីឆ្នាំមុន។ មិនត្រឹមតែប៉ុណ្ណោះ គេកត់សម្គាល់ឃើញថា កំណើនតម្រូវការមាសក្នុងត្រីមាសទីមួយមានភាពរឹងមាំបំផុតចាប់តាំងពីឆ្នាំ ២០១៣។
នាពេលថ្មីៗនេះ ការស្ទង់មតិដែលធ្វើឡើងដោយក្រុមប្រឹក្សាមាសពិភពលោក បានចង្អុលបង្ហាញពីឆន្ទៈដ៏មុតមាំរបស់ធនាគារកណ្តាលក្នុងការបង្កើនទុនបម្រុងមាសរបស់ពួកគេ។ ការស្ទង់មតិនេះបានរកឃើញហេតុផលបីធំៗសម្រាប់ការកាន់កាប់មាសរបស់ធនាគារកណ្តាលមានដូចជា៖ អត្រាការប្រាក់ (៩៦ ភាគរយ) ការព្រួយបារម្ភអំពីអតិផរណា (៨៦ ភាគរយ) និងអស្ថិរភាពភូមិសាស្ត្រនយោបាយ (៧២ ភាគរយ) ។ ទាក់ទងនឹងសមាមាត្រនៃមាសនៅក្នុងទុនបម្រុងក្នុងរយៈពេល ៥ ឆ្នាំខាងមុខ បានបង្ហាញថា ធនាគារកណ្តាល ៦៦ ភាគរយនឹងមានទុនបម្រុងមាសរបស់ពួកគេអាចខ្ពស់ជាងមធ្យម ដែលអាចកើនឡើងបន្ថែម ៣ ភាគរយ៕
Account
Security
Favourite Content