បរទេស៖ យោងតាមប្រភពពីរ៉យទ័របានរាយការណ៍ថា តម្លៃមាសបានឡើងថ្លៃ ១,៤ ភាគរយ ឬ ២ ៣៥៨ ដុល្លារក្នុងមួយអោន ដែលជាកម្រិតខ្ពស់បំផុតក្នុងរយៈពេលពីរសប្តាហ៍ចុងក្រោយ ដោយសារទិន្នន័យសេដ្ឋកិច្ចថ្មីៗរបស់សហរដ្ឋអាមេរិកបង្ហាញសញ្ញានៃការធ្លាក់ចុះនៃសេដ្ឋកិច្ចធំបំផុតរបស់ពិភពលោកបានជំរុញការភ្នាល់សម្រាប់ការកាត់បន្ថយអត្រាការប្រាក់ពីធនាគារកណ្តាលនៅឆ្នាំនេះ។

លោក Bart Melek ប្រធានផ្នែកយុទ្ធសាស្រ្តនៅ TD Securities លើកឡើងថា ទីផ្សារកំពុងចាប់ផ្តើមរំពឹងកាន់តែខ្លាំងឡើងថា ធនាគារកណ្តាលរបស់សហរដ្ឋអាមេរិកនឹងចាប់ផ្តើមបន្ធូរបន្ថយគោលនយោបាយហិរញ្ញវត្ថុរបស់ខ្លួន។ នៅក្នុងសប្តាហ៍ចុងក្រោយនេះ ការទាមទារអត្ថប្រយោជន៍សម្រាប់អ្នកគ្មានការងារធ្វើនៅសហរដ្ឋអាមេរិកបានធ្លាក់ចុះ ដែលបង្ហាញថា ទីផ្សារការងារមានស្ថិរភាព។ កាលពីសប្តាហ៍មុន ទិន្នន័យបានបង្ហាញពីការបង្រួបបង្រួមនៅក្នុងទីផ្សារការងារ សម្ពាធតម្លៃ និងការលក់រាយចុះខ្សោយ ខណៈដែលសកម្មភាពសេដ្ឋកិច្ចនៅតែខ្វះខាតនៅក្នុងត្រីមាសទីពីរ។

លោក Jim Wyckoff អ្នកវិភាគទីផ្សារជាន់ខ្ពស់នៅក្រុមហ៊ុន Kitco Metals បង្ហាញថា ការឡើងថ្លៃនៃតម្លៃមាសកើតឡើង បន្ទាប់ពីរបាយការណ៍បង្ហាញថា ការលក់រាយរបស់សហរដ្ឋអាមេរិកចុះខ្សោយ។

នៅទូទាំងពិភពលោក តម្លៃមាសបានឡើងថ្លៃដល់កម្រិតខ្ពស់ ២ សប្តាហ៍ជាប់ៗគ្នា ដែលជំរុញដោយតម្រូវការទ្រព្យសម្បត្តិមានសុវត្ថិភាពចំពេលមានភាពតានតឹងនៅមជ្ឈិមបូព៌ា និងការកើនឡើងការព្យាករណ៍ថា ធនាគារកណ្តាលអាមេរិកអាចនឹងកាត់បន្ថយអត្រាការប្រាក់នៅចុងឆ្នាំនេះ ខណៈដែលបច្ចុប្បន្ននេះ ពាណិជ្ជករព្យាករណ៍ថា ឱកាសប្រហែល ៦៤ ភាគរយដែលធនាគារកណ្តាលអាម៉េរិក Fed អាចកាត់បន្ថយអត្រាការប្រាក់នៅក្នុងខែកញ្ញា។ អត្រាការប្រាក់ទាបអាចកាត់បន្ថយឱកាសនៃការទិញមាស។ យ៉ាងណាមិញ លោក Neel Kashkari ប្រធានធនាគារកណ្តាលប្រចាំទីក្រុងបានលើកឡើងថា អាម៉េរិក ទំនងជានឹងចំណាយពេល ១ ឬ ២ ឆ្នាំ ដើម្បីសម្រេចគោលដៅអតិផរណាស្នូលធ្លាក់ចុះដល់ ២ ភាគរយ។ ការកាត់បន្ថយអត្រាការប្រាក់នឹងអាស្រ័យលើលក្ខខណ្ឌសេដ្ឋកិច្ចដោយសង្កត់ធ្ងន់លើការសម្រេចអត្រាអតិផរណាស្របតាមគោលដៅ ទោះបីជាមានកំណើនសេដ្ឋកិច្ចកើនឡើងគួរឱ្យកត់សម្គាល់ក៏ដោយ។ លើសពីនេះ តម្លៃមាសក៏ត្រូវបានជំរុញដោយភាពមិនប្រាកដប្រជានៃភូមិសាស្ត្រនយោបាយ និងសេដ្ឋកិច្ច ក៏ដូចជាការទិញរបស់ធនាគារកណ្តាលជាប់លាប់បានរួមចំណែកដល់តម្លៃមាសឡើងថ្លៃខ្ពស់បំផុតជិត ២ ៥០០ ដុល្លារក្នុងមួយអោនកាលពីខែឧសភា៕