សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរ៉ែនិងថាមពល បានដាក់សំណើទៅសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងដាក់តំបន់ព្រៃឡង់ជាតំបន់ក្រហម ដោយមិនឱ្យពង្រីកការធ្វើអាជីវកម្ម និងរុករករ៉ែបន្តទៀតនោះទេ ហើយសម្ដេចធិបតីក៏បានយល់ព្រមតាមសំណើ។ នេះបើតាមឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល មានប្រសាសន៍ក្នុងសន្និសីទមួយកាលពីពេលថ្មីៗនេះ ។
ឯកឧត្តម កែវ រតនៈ បានមានប្រសាសន៍ថា សម្ដេចធិបតីបានយល់ព្រមតាមសំណើរបស់ក្រសួង ដោយទី១.ចាត់ទុកតំបន់ព្រៃឡង់ជាតំបន់ក្រហម ដោយមិនចេញអាជ្ញាបណ្ណ ធនធានរ៉ែគ្រប់ប្រភេទបន្ថែមទៀតនោះទេ លើកលែងតែក្រុមហ៊ុនចំនួន២ដែលបានអនុញ្ញាតពីមុនមករួចហើយ ។ ទី២ ពិនិត្យលទ្ធភាពកាត់បន្ថយផ្ទៃដីដែលសិក្សារួច និងដីមិនមានសក្ដានុពលសម្រាប់ធ្វើអាជីវកម្មធនធានរ៉ែ ទី៣. មិនអនុញ្ញាតឱ្យពង្រីកផ្ទៃដីបន្ថែមទៀតនោះទេសម្រាប់អាជ្ញាបណ្ណដែលមានស្រាប់។ មានន័យថាអាជ្ញាបណ្ណដែលទទួលបានពីមុនមកប៉ុណ្ណាឱ្យធ្វើប៉ុណ្ណឹង ។
ឯកឧត្តមបន្តថា គិតមកដល់បច្ចុប្បន្ន មានក្រុមហ៊ុនរុករក និងធ្វើអាជីវកម្មរ៉ែ នៅក្នុងប្រទេសកម្ពុជាចំនួន១៣ ទទួលបានអាជ្ញាបណ្ណពីរាជរដ្ឋាភិបាលក្នុងនោះ ខេត្តកំពង់ធំមាន៣ក្រុមហ៊ុន ក្នុងនោះ២ក្រុមហ៊ុនទទួលបានអាជ្ញាបណ្ណ ស្វែងរុករក និង១ក្រុមហ៊ុនជាអាជ្ញាបណ្ណធ្វើអាជីវកម្មរ៉ែមាស ។ ខេត្តក្រចេះមានក្រុមហ៊ុន៧ជាអាជ្ញាបណ្ណស្វែងរុករករ៉ែ ខេត្តព្រះវិហារមានក្រុមហ៊ុន២ ជាប្រភេទអាជ្ញាបណ្ណស្វែងរុករក និងស្ទឹងត្រែងមាន១ជាប្រភេទអាជ្ញាបណ្ណស្វែងរុករក ។
ឯកឧត្តមបន្ថែមថា នេះជាសមិទ្ធផលមួយក្នុងចំណោមសមិទ្ធផលជាច្រើនទៀតដែលកើតចេញក្រោយពេលកកើតរាជរដ្ឋាភិបាលថ្មីក្នុងអាណត្តិទី៧នៃរដ្ឋសភា និងក្នុងអំឡុងរយៈពេល៩០ថ្ងៃ នៃការកាន់តំណែងរបស់សម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រីនៃព្រះរាជាណាចក្រកម្ពុជា ។
សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងកាលពីថ្ងៃទី ២២ វិច្ឆិកា ២០២៣ កន្លងមកនេះថា រាជរដ្ឋាភិបាលក្នុងអាណត្តិទី៧នៃ នឹងបន្តអភិវឌ្ឍន៍ប្រទេសដោយគម្រោងវិនិយោគណាមួយត្រូវតែគិតគូរដល់ពលរដ្ឋ និងសង្គមជាធំ ជាពិសេសនោះគឺការអភិវឌ្ឍប្រកបដោយចីរភាព ៕
Account
Security
Favourite Content