សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្របគ្នាជាមួយនឹងការជំរុញកំណើនផលិតផលក្នុងស្រុក កម្ពុជាក៏កំពុងតែជំរុញផលិតផលទាំងនោះ ដើម្បីបាននាំចេញទៅលក់នៅទីផ្សារខាងក្រៅប្រទេសបន្ថែមទៀតផងដែរ។ យ៉ាងណាក៏ដោយ ការរៀបចំក្នុងការនាំចេញផលិតផលក៏មិនស្រួលពេកដែរ ហេតុដូច្នេះហើយបានជាភាគីពាក់ព័ន្ធ ជាពិសេសក្រសួងពាណិជ្ជកម្ម បានដាក់ចេញនូវវិធានការ និងយុទ្ធសាស្ត្រផ្សេងៗ ដើម្បីអាចជួយដល់ម្ចាស់អាជីវកម្ម ពាណិជ្ជករ ក៏ដូចជាសហគ្រិនឱ្យសម្រេចបានគ្រប់លក្ខខណ្ឌនៃការនាំចេញ។
ពាក់ព័ន្ធនឹងរឿងនេះ ឯកឧត្តមឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា បានឱ្យដឹងថា បច្ចុប្បន្ននេះ ស្ថាប័នពាក់ព័ន្ធ មិនថារដ្ឋ ឬឯកជននោះទេ គឺកំពុងតែខិតខំប្រឹងប្រែង ដើម្បីធ្វើយ៉ាងណាឱ្យផលិតផលកម្ពុជាសម្រេចបាននូវការនាំចេញទៅក្រៅឱ្យបានកាន់តែច្រើន ព្រោះកាលណាមានការនាំចេញបានច្រើន ជីវភាពប្រជាជនក៏ប្រសើរ ហើយសេដ្ឋកិច្ចកម្ពុជា ក៏លូតលាស់ទៅតាមនោះដែរ។
ឯកឧត្តមឧកញ៉ាបានបន្តមានប្រសាសន៍ទៀតថា ៖
«ឥឡូវនេះ គេមានក្រុមការងារ ដែលធ្វើការលើការជួយបញ្ជ្រាបចំណេះដឹងលើការនាំចេញ ពិសេសគឺនិតិវិធីនៃការរៀបចំឯកសារតែម្ដង។ ក្រសួងដែលពាក់ព័ន្ធទៀតសោត មានតួនាទីធ្វើការយ៉ាងជិតស្និទ្ធជាមួយម្ចាស់អាជីវកម្ម ក្នុងការពាំនាំនូវតម្រូវការទីផ្សារខាងក្រៅទៅជូនពួកគាត់ ព្រោះសំខាន់ណាស់ដែលអ្នកផលិតត្រូវយល់ដឹងពីតម្រូវការទីផ្សារ។»
អ្នកស្រី សេង ច័ន្ទមុនីរតន៍ ប្រធានសហគ្រាសផលិតទឹកត្រី សេង រី ដែលជាម្ចាស់អាជីវកម្មមួយរូបក្នុងចំណោមម្ចាស់អាជីវកម្មជាច្រើនរូបទៀត ដែលបានចូលរួមស្ដាប់នូវបទបង្ហាញស្ដីពីការនាំចេញកម្ពុជា កាលពីពេលកន្លងទៅក្រោមការរៀបចំឡើងដោយក្រសួងពាណិជ្ជកម្ម។
អ្នកស្រីបានបង្ហាញនូវសុទិដ្ឋិនិយមខ្ពស់ក្រោយចូលរួមវេទិកាបញ្ជ្រាបចំណេះដឹងនោះថា៖
«កន្លងមក ខ្ញុំតែងតែមានបំណងចង់នាំយកផលិតផលរបស់ខ្ញុំទៅលក់នៅទីផ្សារខាងក្រៅ ប៉ុន្តែមិនអាចធ្វើទៅបាន ដោយសារតែខ្ញុំមិនដឹងថាគួរចាប់ផ្ដើមពីចំណុចណាទៅ។ ខ្លួនមានផលិតផលក្នុងដៃស្រាប់ហើយ ប៉ុន្តែមិនដឹងថាផលិតផលរបស់ខ្លួនមានគុណភាពស្របតាមស្តង់ដារនាំចេញ ឬនៅ ម្យ៉ាងទៀត តើទីផ្សារណាដែលមានតម្រូវការទៅលើផលិតផលរបស់យើង»។
យ៉ាងណាក៏ដោយ ថ្វីត្បិតថាមិនទាន់បានយល់នូវគ្រប់និតិវិធីនៅក្នុងការនាំចេញផលិតផល ប៉ុន្តែយ៉ាងហោចណាស់ អ្នកស្រីសប្បាយចិត្តដែលបានដឹងផ្លូវដែលត្រូវដើរ ជាពិសេសដឹងថាគួរសួរទៅកាន់ភាគីណា នៅពេលដែលខ្លួនមានចម្ងល់។
ពីវិស័យឯកជនឯណោះវិញ ឯកឧត្តមឧកញ៉ា ងួន ម៉េងតិច ក៏នៅតែបន្តជំរុញឱ្យម្ចាស់អាជីវកម្មពាំនាំនូវចម្ងល់របស់ខ្លួន សាកសួរទៅកាន់ភាគីពាក់ព៍ន្ធ ជាពិសេសក្រសួងពាណិជជកម្ម ខណៈដែលក្រសួង និងស្ថាប័នពាក់ព័ន្ធរង់ចាំទទួលដោះស្រាយជូនដើម្បីធ្វើយ៉ាងណាឱ្យសេដ្ឋកិច្ចកម្ពុជាមានកំណើនខ្ពស់៕
Account
Security
Favourite Content