សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានជំរុញឱ្យអន្តរក្រសួងពាក់ព័ន្ធ និងរដ្ឋបាលខេត្តកំពង់ឆ្នាំងត្រូវរួមគ្នាគិត រួមគ្នាសម្រេចចិត្ត និងរួមគ្នាទទួលខុសត្រូវចំពោះការថែរក្សាបឹងទន្លេសាបដែលជាធនធានធម្មជាតិដ៏មានតម្លៃឱ្យបានគង់វង្សសម្រាប់មនុស្សជំនាន់ក្រោយ។
ថ្លែងក្នុងកិច្ចប្រជុំអន្តរក្រសួងស្ដីពីការពិភាក្សាការងារគ្រប់គ្រងដីនៅតំបន់បឹងទន្លេសាបនៃខេត្តកំពង់ឆ្នាំង នារសៀលថ្ងៃទី១០ ខែកុម្ភៈ ឆ្នាំ២០២៥ ឯកឧត្តម សាយ សំអាល់ បានឱ្យដឹងថា ដោយអនុវត្តតាមគោលនយោបាយរបស់រាជរដ្ឋាភិបាលកម្ពុជា ក្រសួងបានអនុវត្តផែនការចុះបញ្ជីដីនៅតំបន់បឹងទន្លេសាប រួមនឹងខេត្តកំពង់ឆ្នាំងទាំងមូល និងត្រៀមអនុវត្តតាមសំណូមពរមួយចំនួនរបស់រដ្ឋបាលខេត្ត ស្រុកផងដែរ។
ឯកឧត្តមឧបនាយករដ្ឋមន្ត្រីបានសង្កត់ធ្ងន់ថា ៖
«កិច្ចការបឹងទន្លេសាប គឺជាកិច្ចការមួយដែលយើងទាំងអស់គ្នាត្រូវហ៊ានសម្រេចចិត្តក្នុងការកំណត់គោលការណ៍នៃការដឹកនាំគ្រប់គ្រងបឹងទន្លេសាបនេះឱ្យបានជាក់លាក់ដោយមិនអាចបណ្ដែតបណ្ដោយបាននោះទេ ជៀសវាងប្រឈមនឹងការបាត់បង់» ។
ឯកឧត្តមឧបនាយករដ្ឋមន្ត្រី សាយ សំអាល់ បានស្នើឱ្យពិនិត្យពិច្ច័យឱ្យបានច្បាស់លាស់នៅតំបន់ខ្លះក្នុងតំបន់បឹងទន្លេសាបដើម្បីឈានទៅកំណត់ឡើងវិញ និងមិនត្រូវឱ្យមានការកាត់ឆ្វៀលដីធ្វើជាកម្មសិទ្ធិរបស់ខ្លួនទៀតទេ ។
ឯកឧត្តមឧបនាយករដ្ឋមន្ត្រី ក៏បានបញ្ជាក់ទៀតថា ៖
«យើងទាំងអស់គ្នាត្រូវរួមគ្នាគិត រួមគ្នាសម្រេចចិត្តនិងរួមគ្នាទទួលខុសត្រូវចំពោះមនុស្សជំនាន់ក្រោយក្នុងការថែរក្សាបឹងទន្លេសាបដែលជាធនធានធម្មជាតិដ៏មានតម្លៃនេះឱ្យបានស្ថិតស្ថេរ គង់វង្ស ពីព្រោះបឹងទន្លេសាបមានផលប្រយោជន៍យ៉ាងមហាសាលសម្រាប់ប្រទេសជាតិដែលអាចជួយទ្រទ្រង់សេដ្ឋកិច្ច សង្គម និងវប្បធម៌របស់ប្រជាជនខ្មែរគ្រប់រូប»។
បើតាមឯកឧត្តម សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានថ្លែងឱ្យដឹងទៀតថា ក្នុងមួយឆ្នាំ បឹងទន្លេសាបអាចផ្ដល់ជាសេដ្ឋកិច្ចដលពលរដ្ឋក្នុងប្រទេសកម្ពុជាគិតជាទឹកប្រាក់ប្រមាណ២ពាន់លានដុល្លារអាមេរិកក្នុងមួយឆ្នាំ ដូចជា ផ្ដល់ផលត្រី ផ្ដល់ជាមធ្យោបាយសម្រាប់ដឹកជញ្ជូន និងនាំភ្ញៀវទេសចរទស្សនាជុំវិញតំបន់បឹងទន្លេសាបជាដើម ។ ដូច្នេះបើសិនជាមិនថែរក្សាបឹងទន្លេសាប មិនទប់ស្កាត់ការទន្ទ្រានដីបឹងទន្លេសាប នៅថ្ងៃអនាគត បឹងនេះនឹងលែងមានជីវជាតិ ដីខ្សោះ បាត់បង់ធនធានធម្មជាតិ បាត់បង់ត្រី នោះនឹងធ្វើឱ្យពលរដ្ឋដែលធ្លាប់អាស្រ័យផលពីបឹងទន្លេសាបបាត់បង់ផលប្រយោជន៍ដូចគ្នា ។
ទន្ទឹមនឹងនេះដែរ រាជរដ្ឋាភិបាលកម្ពុជា តាមរយៈក្រសួងរៀបចំដែនដី នគរូបនីយកម្ម និងសំណង់ បានពន្លឿនការចុះបញ្ជីដីធ្លីឱ្យចប់រួចរាល់នៅក្នុងឆ្នាំ២០២៥នេះ ហើយតាមរយៈការបញ្ចប់ការចុះបញ្ជីដីធ្លីនេះដែរ នឹងអាចកំណត់ព្រំប្រទល់ដី និងកម្មសិទ្ធិដីធ្លី បញ្ចប់ការទន្ទ្រានដីព្រៃ ដីរដ្ឋ ធ្វើជាកម្មសិទ្ធិជាដើម ៕
Account
Security
Favourite Content