សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ អ្នកនាំពាក្យក្រសួងពាណិជ្ជកម្ម ឯកឧត្តម ប៉ែន សុវិជាតិ បានឱ្យដឹងថា ការអនុវត្តកិច្ចព្រមព្រៀង ក្រោមកិច្ចព្រមព្រៀងពាណិជ្ជកម្មសេរី កម្ពុជា និងកូរ៉េ CKFTA បានជំរុញឱ្យការនាំចេញទំនិញទៅកាន់ទីផ្សារកូរ៉េមានការកើនឡើងក្រោយពេលដែលកិច្ចព្រមព្រៀងបានចូលជាធរមានក្នុងខែធ្នូ ឆ្នាំ២០២២។
ការអនុវត្តកិច្ចព្រមព្រៀងពាណិជ្ជកម្មសេរី កម្ពុជា-កូរ៉េ CKFTA បានជំរុញឱ្យការនាំចេញរបស់កម្ពុជាទៅកាន់ប្រទេសកូរ៉េមានកំណើនគួរឱ្យកត់សម្គាល់ ដោយត្រូវបានគេរំពឹងថា នឹងជំរុញពាណិជ្ជកម្មរវាងប្រទេសទាំងពីរ ដោយប្រទេសកូរ៉េខាងត្បូងយល់ព្រមដកពន្ធ លើផលិតផលចំនួន ៩៥,៦ ភាគរយ ដែលនាំចូលពីកម្ពុជា ខណៈកម្ពុជានឹងលុបចោលការយកពន្ធលើទំនិញនាំចូល ៩៣,៨ ភាគរយ។
ឯកឧត្តម ប៉ែន សុវិជាតិ បានមានប្រសាសន៍ថា៖
”នៅក្នុងឆ្នាំ២០២២ ផលិតផលកម្ពុជាសំខាន់នាំចេញទៅកាន់កូរ៉េគឺសំលៀកបំពាក់ និង ស្បែកជើង ដែលកើនឡើងគួរឲ្យកត់សម្គាល់ ហើយកិច្ចព្រមព្រៀង FTA បានជំរុញការនាំចេញឱ្យកើនឡើង។ នៅឆ្នាំ២០២២កន្លងទៅ ផលិតផលកម្ពុជាសំខាន់នាំចេញទៅកាន់កូរ៉េខាងត្បូង មានសម្លៀកបំពាក់ និងវាយន ភ័ណ្ឌ ស្បែកជើង កាបូបធ្វើដំណើរ ផលិតផលកសិកម្ម រួមមានកៅស៊ូ ស្រូវ អង្ករ ស្វាយ និងដំឡូងមី គ្រឿងបន្លាស់ ឧបករណ៍អេឡិចត្រូនិច ភេសជ្ជៈកាបូបស្ពាយ ឱសថ និងក្រដាសកាតុងធ្វើកេស ទៅកាន់ប្រទេសកូរ៉េខាងត្បូង”
យោងតាមរបាយការណ៍របស់សមាគមពាណិជ្ជកម្មអន្តរជាតិកូរ៉េ (KITA) បានឱ្យដឹងថា កម្ពុជាបាននាំចេញទំនិញគិតជាទឹកប្រាក់ ៤៤,៣ លានដុល្លារ ទៅកាន់កូរ៉េ ក្នុងខែមករាឆ្នាំ២០២៣នេះ ពោលគឺកើនឡើង ៣៩,៧ភាគរយ បើប្រៀបធៀបនឹងខែមករា ឆ្នាំ២០២២ ហើយការនាំចូលពីកូរ៉េកើនឡើង ៣៤ ភាគរយគិតជាទឹកប្រាក់ ៤៧,៤ លានដុល្លារ។
សូមរម្លឹកថា កិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ (CKFTA) ត្រូវបានចូលជាធរមានកាលពីថ្ងៃទី១ ខែធ្នូ ឆ្នាំ២០២២ ដែលរំពឹងថា នឹងជំរុញកំណើននៃការនាំចេញរវាងប្រទេសទាំងពីរ និងចូលរួមស្ដារសេដ្ឋកិច្ចឡើងវិញ បន្ទាប់ពីរងគ្រោះដោយតែវិបត្តិកូវីដ-១៩ និងផលប៉ះពាល់នៃឥទ្ធិពលសង្រ្គាមរុស្ស៉ី-អ៊ុយក្រែន៕
Account
Security
Favourite Content