សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ យោងតាមរបាយការណ៍ពីអគ្គនាយកដ្ឋានគយ និងរដ្ឋាករ កម្ពុជា (អគរ) បានបង្ហាញថា ទំហំពាណិជ្ជកម្មទ្វេភាគីរវាងកម្ពុជា និងចិន បានកើនឡើងដល់ជាង ៥.៦ ពាន់លានដុល្លារ ក្នុងរយៈពេល៤ខែនៃឆ្នាំ២០២៥ ដែលមានការកើនឡើងចំនួន២៧ភាគរយធៀបទៅនឹងរយៈពេលដូចគ្នាកាលពីឆ្នាំមុន និងគិតជាទឹកប្រាក់មានចំនួន ៤.៤៨ពាន់លានដុល្លារ។ ទោះជាយ៉ាងណាក្តី ការនាំចេញរបស់កម្ពុជាទៅកាន់ប្រទេសចិនបានធ្លាក់ចុះបន្តិច ក្នុងចំនួន ១.៧ ភាគរយ ធៀបនឹងរយៈពេលដូចគ្នានៃឆ្នាំមុន ដែលមានទំហំសរុប ៤៧៨.៦៣ លានដុល្លារ។ ផ្ទុយទៅវិញ ការនាំចូលពីប្រទេសចិនបានកើនឡើងដល់ចំនួន ៣០.៥ភាគរយ គិតជាទឹកប្រាក់ចំនួន ៥.២១ពាន់លានដុល្លារ។
ទិន្នន័យនេះបានគូសបញ្ជាក់ពីទំនាក់ទំនងសេដ្ឋកិច្ចដែលកំពុងកើនឡើងរវាងប្រទេសទាំងពីរ ដោយប្រទេសចិននៅតែជាដៃគូពាណិជ្ជកម្មដ៏ធំបំផុតមួយរបស់កម្ពុជា ជាប្រភពសំខាន់នៃទំនិញប្រើប្រាស់ វត្ថុធាតុដើម និងឧបករណ៍ឧស្សាហកម្ម។
ទាក់ទិននឹងរឿងនេះ ទាំងភាគីរដ្ឋាភិបាល និងវិស័យឯកជន កំពុងជំរុញស្វែងរកផ្លូវពាណិជ្ជកម្មជំនួស និងវិនិយោគក្នុងការពង្រឹងខ្សែច្រវាក់ផ្គត់ផ្គង់ក្នុងស្រុក ហើយក៏បានចង្អុលបង្ហាញផងដែរអំពីការបង្កើនការវិនិយោគរបស់ចិននៅក្នុងហេដ្ឋារចនាសម្ព័ន្ធ ភស្តុភារ និងផលិតកម្មនៅកម្ពុជា។
ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម ក្នុងវេទិកា ស្តីពី “ទំនាក់ទំនងកម្ពុជា-ចិនក្នុងបរិបទថ្មី” បានគូសបញ្ជាក់អំពីការពង្រីកកិច្ចសហប្រតិបត្តិការសេដ្ឋកិច្ចរវាងកម្ពុជា និងចិន ដោយកត់សម្គាល់ថា ភាពជាដៃគូបានដើរតួនាទីយ៉ាងសំខាន់ក្នុងការជំរុញកំណើនសេដ្ឋកិច្ច ការវិនិយោគ ពាណិជ្ជកម្ម និងការអភិវឌ្ឍន៍ហេដ្ឋារចនាសម្ព័ន្ធ។
ឯកឧត្តម សុវិជាតិ បានគូសបញ្ជាក់ទៀតថា៖ ប្រជាជាតិទាំងពីរចែករំលែកទស្សនៈវិស័យរួមគ្នាសម្រាប់ការអភិវឌ្ឍ ការចែករំលែកធនធាន សន្តិសុខ និងការផ្លាស់ប្តូរវប្បធម៌ ដែលឆ្លុះបញ្ចាំងពីសម្ព័ន្ធភាពដែលរីកចម្រើននិងប្រកបដោយយុទ្ធសាស្ត្រ។
ឯកឧត្តមបានបន្តឱ្យដឹងថា៖
«កិច្ចសហប្រតិបត្តិការពាណិជ្ជកម្ម កំពុងលើកទឹកចិត្តដល់ផលិតករកម្ពុជាឱ្យផ្លាស់ប្តូរពីការនាំចេញវត្ថុធាតុដើម ទៅជាការអភិវឌ្ឍផលិតផលសម្រេច ដែលជំរុញដោយតម្រូវការទីផ្សារ និងការរំពឹងទុករបស់អ្នកប្រើប្រាស់។ ការផ្លាស់ប្តូរនេះកំពុងជួយប្រទេសកម្ពុជាក្នុងការបន្ថែមតម្លៃ និងបង្កើនតួនាទីរបស់ខ្លួនក្នុងខ្សែច្រវាក់ផលិតកម្ម»។
បើតាមការបញ្ជាក់របស់ឯកឧត្តម ក្រសួងពាណិជ្ជកម្មកំពុងធ្វើការផ្សព្វផ្សាយម៉ាកយីហោ និងផលិតផលក្នុងស្រុករបស់កម្ពុជាយ៉ាងសកម្ម។ កិច្ចខិតខំប្រឹងប្រែងទាំងនេះមានគោលបំណងពង្រឹងឧស្សាហកម្មក្នុងស្រុក លើកកម្ពស់ស្តង់ដារគុណភាព ពង្រឹងការប្រកួតប្រជែងរបស់កម្ពុជានៅក្នុងទីផ្សារក្នុងតំបន់ និងសកលលោក ហើយជាមួយគ្នានោះ ក្រសួងក៏ខិតខំប្រឹងប្រែងធ្វើយ៉ាងណាដើម្បីទាក់ទាញការវិនិយោគពីបរទេសកាន់តែច្រើនផងដែរ។
យ៉ាងណាក៏ដោយ បើទោះបីជាមានអតុល្យភាពពាណិជ្ជកម្មនៅតែធំក៏ដោយ អ្នកជំនាញសេដ្ឋកិច្ចបានកត់សម្គាល់ថា ទស្សនវិស័យពាណិជ្ជកម្មរយៈពេលវែងរបស់កម្ពុជា ជាមួយប្រទេសចិននៅតែមានភាពវិជ្ជមាន ជាពិសេសនៅពេលដែលកិច្ចខិតខំប្រឹងប្រែងក្នុងការជំរុញផលិតកម្មក្នុងស្រុក និងធ្វើពិពិធកម្មការនាំចេញនៅតែបន្តមានរូបរាង៕
Account
Security
Favourite Content